13 قاراشا – حالىقارالىق زاعيپتار كۇنىنە وراي ۇيىمداستىرىلعان كەزدەسۋگە كىتاپ اۆتورى جانە جەرگىلىكتى زيالى قاۋىم وكىلدەرى, كىتاپحانا وقىرماندارى قاتىستى.
«كەشتىڭ ماقساتى – حالىقارالىق زاعيپتار كۇنىنىڭ ءمانى مەن ماڭىزى تۋرالى كەڭىنەن ناسيحاتتاۋ جانە كىتاپحانا وقىرماندارىنا ولكەمىزدىڭ اقىن-جازۋشىلارىنىڭ شىعارماشىلىعىن قولجەتىمدى ەتۋ ەدى. وسىعان وراي ءبىزدىڭ كىتاپحانادا «ولكە قالامگەرلەرىنىڭ شىعارماشىلىعى – برايل قارپىندە» جاڭا اقپاراتتىق-كىتاپحانالىق جوبا قولعا الىنعان. مىنە, بۇگىن وسى جوبا اياسىندا جارىق كورگەن تۇڭعىش كىتاپتى تانىستىرىپ وتىرمىز. اسانتەمىر قارشىعا ۇلىنىڭ «شىدەرلى شەر» كىتابى – ءبىزدىڭ كىتاپحانا قورىنا قوسىلعان قازىنالى تۋىندى», دەدى كىتاپحانا ديرەكتورى مارفۋعا ايتقاليەۆا.
شىرايلى شاراعا قاتىسقان اقىن, جۇبانتانۋشى ۇزىلدىك ەلەۋباەۆا, قازاقستان جازۋشىلار وداعىنىڭ مۇشەسى, «اقبەرەن» جاس اقىندار مەكتەبىنىڭ جەتەكشىسى تالاپ تايماس ۇلى, اقىن, قازاقستان جازۋشىلار وداعىنىڭ مۇشەسى مۇنايدار بالمولدا, كورۋ قابىلەتى بۇزىلعان بالالارعا ارنالعان باتىس قازاقستان وبلىستىق ارناۋلى مەكتەپ-ينتەرناتىنىڭ قازاق ءتىلى جانە ادەبيەت ءپانىنىڭ مۇعالىمى ايجان بەكەتاەۆا جانە باسقالارى كەشتىڭ شىرايىن كىرگىزىپ, جاڭا كىتاپ تۋرالى ءوز ويلارىمەن ءبولىستى.
ەڭ اسەرلى ءسات كىتاپ اۆتورى ورتاعا شىققاندا بولدى. اسانتەمىر قارشىعا ۇلى ءوزىنىڭ شىعارماشىلىق جولى, جاڭا كىتاپتىڭ مازمۇنى جايلى ايتىپ, وقىرمانداردىڭ سۇراقتارىنا جاۋاپ بەردى. اقىننىڭ ولەڭدەرىن ءوز اۋزىنان تىڭداعان جۇرتشىلىق قىزۋ قول سوقتى. كوزى كورمەيتىن وقىرماندار جاڭا كىتاپتان اقىننىڭ ولەڭدەرىن ساۋساقپەن «تانىپ» وقىپ, جىلى اسەرگە بولەندى.
– بۇل كەزدەسۋ وزىمە دە ەرەكشە اسەر ەتتى. ءبىز ون ەكى مۇشەمىز ساۋ بولا تۇرا, ەكى اياعىمىزبەن قارا جەردى نىق باسىپ جۇرسەك تە كوپ نارسەنىڭ قادىرىنە جەتە بەرمەيمىز. ءبىر-ءبىرىمىزدى كورە الماي, كۇستانالاۋعا ءازىر تۇرامىز كەيدە. ال مىنا جەردەگى ورتانىڭ سەزىمتالدىعى, ءبىر-بىرىنە قۇرمەتى كوپ ويعا قالدىردى. بىزگە قاراعاندا وسى جەردەگى ادامدار الدەقايدا باقىتتىراق پا دەپ ويلادىم, – دەيدى اسانتەمىر.
كەزدەسۋ قوناقتارى كىتاپحانا قورىنا كەلىپ تۇسكەن ارناۋلى ادەبيەتتەردەن جاساقتالعان «بيبليوNews» كىتاپ كورمەسىن دە تاماشالادى. كىتاپحانا باسشىلىعىنىڭ ايتۋىنشا, «ولكە قالامگەرلەرىنىڭ شىعارماشىلىعى – برايل قارپىندە» جوباسى الداعى ۋاقىتتا دا جالعاسىن تاپپاق.
باتىس قازاقستان وبلىسى
