سۋرەتتى تۇسىرگەن جۇماباي مۇسابەكوۆ
وبلىس ورتالىعىندا وتكەن سالتاناتتى جيىندا وبلىستىق جەدەل جاردەم ستانساسى ورتالىعىنىڭ ديرەكتورى ساۆەلي پاك وبلىس اكىمىنىڭ قولىنان جاڭا «جەدەل جاردەم» كولىگىنىڭ كىلتىن الدى. بىلتىر ساتىپ الىنعان 35 سانيتارلىق اۆتوماشينانى ەسەپكە الساق, ستانسا 100 پايىزعا ارنايى كولىكپەن قامتاماسىز ەتىلدى دەۋگە بولادى. سونداي-اق حالىق سانىنا شاققانداعى بريگادالار سانى 75-كە جەتتى. جالپى 10 مىڭ ادامعا 1 بريگادا دەپ ەسەپتەلەدى, ال وبلىستاعى حالىق سانى – 667 مىڭ ادام. دەمەك بريگادا سانى ءتيىستى مولشەردەن استى. بۇل – دارىگەرلەر دەر كەزىندە بارادى دەگەن ءسوز.
جەدەل جاردەم كارەتالارى بارلىق قاجەتتى قۇرالدارمەن, اتاپ ايتقاندا, وكپەنى جاساندى جەلدەتەتىن «Wienman» اپپاراتتارى, ديستانتسيالىق ەلەكتروكارديوگراف, «Corpuls» دەفيبريللياتورى, «Accuvac pro Wienman» ەلەكتر اسپيراتورى, ومىرتقانى قوزعالتپاي ۇستاۋعا ارنالعان ديپ-پانەل, رەانيماتسياعا ارنالعان ورىن, وتتەگى باللوندارى, پاتسيەنتتى تاسىمالداۋ كەزىندە پايدالانىلاتىن ارنايى توسەك, جۇمساق زەمبىلدەرمەن جابدىقتالعان. ودان بولەك اۋىلدىق مەديتسينالىق پۋنكتتەر مەن امبۋلاتوريالار ءۇشىن 13 ماشينا الۋ قاراستىرىلعان, ءتىپتى ونىڭ 8-ءى اۋداندارعا جەتكىزىلدى.
وبلىس اكىمى بەيبىت يساباەۆ جەدەل جاردەم پاركىن جاڭارتۋ ەل پرەزيدەنتىنىڭ مەديتسينالىق قىزمەتتەردىڭ, اسىرەسە اۋىلدىق جەرلەردە قولجەتىمدىلىگى مەن ساپاسىن ارتتىرۋ جونىندەگى تاپسىرماسىنا سايكەس جۇرگىزىلىپ جاتقانىن جەتكىزدى.
«بيىل مەملەكەتتىك قولداۋدىڭ ناتيجەسىندە وبلىستىڭ التى اۋدانىنىڭ اۋىلدارىندا 12 بلوكتى-ءمودۋلدى مەديتسينالىق كەشەن سالىنادى. 2024 جىلعا دەيىن مۇنداي نىساندار ءوڭىردىڭ تاعى 40 اۋىلىندا بوي كوتەرەدى. 2023 جىلدان باستاپ «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اۋىلدىق جەرلەردە تاعى 59 نىسان سالىنادى. سانيتارلىق اۆتوكولىكتەردى جاڭارتۋ دا مەديتسينالىق كومەك كورسەتۋ ساپاسىن ارتتىرۋعا ەلەۋلى ىقپال ەتەدى. بىلتىر 35 جەدەل جاردەم اۆتوكولىگى ساتىپ الىندى, بۇگىن تاعى 40 سانيتارلىق كولىكتىڭ كىلتىن تابىستايمىز. وسى ارقىلى پاتسيەنتتەرگە جەدەل جاردەمنىڭ جەتۋ ۋاقىتى قىسقارىپ, العاشقى كومەكتى دەر كەزىندە كورسەتۋ مۇمكىندىگى ارتا تۇسەدى دەپ ويلايمىن. حالىقتىڭ ءومىرى مەن دەنساۋلىعىن ساقتاۋ – قاشاندا نەگىزگى باسىمدىق بولىپ قالا بەرەدى», دەدى ب.يساباەۆ.
جالپى, پرەزيدەنتتىڭ تاپسىرماسىنا سايكەس رەسپۋبليكالىق بيۋدجەتتەن اقسۋ جانە كەربۇلاق اۋداندارىنداعى اۋرۋحانالاردى, وبلىستىق بالالار اۋرۋحاناسىن كۇردەلى جوندەۋگە, سونداي-اق تالدىقورعان قالاسىنداعى ونكولوگيالىق ديسپانسەردىڭ ماتەريالدىق-تەحنيكالىق بازاسىن نىعايتۋعا قاراجات بولىنەدى. وعان قوسا 2023 جىلدان باستاپ «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جەتىسۋ وبلىسىندا ءوڭىردىڭ اۋىلدىق ەلدى مەكەندەرىندە 59 نىسان سالىنادى, ونىڭ 15-ءى دارىگەرلىك امبۋلاتوريا, 39-ى فاپ, 5-ەۋى مەديتسينالىق پۋنكت بولماق.
وبلىس ەكىگە بولىنگەننەن كەيىن, جەتىسۋدا حالىق سانى ەداۋىر ازايدى. تيىسىنشە ءار سالانىڭ ماماندارى دا ەكىگە ءبولىنىپ, ەلگە قىزمەت ەتىپ جاتىر. وسىدان 2-3 جىل بۇرىن تالدىقورعان قالاسىنىڭ كىرەبەرىسىنە الماتى وبلىستىق سوتىنا ارناپ جاڭا ءزاۋلىم عيماراتتىڭ قابىرعاسى قالانعان بولاتىن. الايدا بۇگىندە سول قۇرىلىس نىسانى جەتىسۋ وبلىسىنىڭ سوتىنا ءتيىمسىز دەپ تانىلىپ وتىر. بۇرىنعىداي ەمەس, سوت قىزمەتكەرلەرىنىڭ سانى قىسقارعان. سول سەبەپتى دە قۇرىلىس ۋاقىتشا توقتاتىلعان ەدى. ەندى سول نىساندى كارديوحيرۋرگيالىق ورتالىق رەتىندە بەيىمدەپ سالۋ تۋرالى ۇسىنىس قولداۋ تاپتى.
«سىرقاتتى ەرتە كەزدەن انىقتاپ, جۇرەككە كۇردەلى وپەراتسيالاردى دەر كەزىندە جاساۋعا مۇمكىندىك بەرەتىندىكتەن, ورتالىقتىڭ جۇمىسى انا مەن بالا ءولىمىن ازايتۋعا ىقپال ەتەدى دەپ ويلايمىن. ورتالىق جوعارى تەحنولوگيانى قولدانا وتىرىپ, وسى ايماقتاعى عانا ەمەس, كورشى وڭىرلەردە تۇراتىن بالالار مەن ەرەسەكتەرگە دە ساپالى مەديتسينالىق قىزمەت كورسەتەدى. جالپى جەتىسۋ جۇرتشىلىعىنا پايدالى نىسان بولادى», دەيدى ب.يساباەۆ.
وسى رەتتە تاعى ءبىر قۋانىشتى جاڭالىقتى جاريا ەتە كەتسەك. كۇنى كەشە پانفيلوۆ اۋدانى جاركەنت قالاسىندا «مەرەي» بالالاردى وڭالتۋ ورتالىعى اشىلدى. بۇل – بۇرىنعى وبلىس اكىمىنىڭ رەزيدەنتسياسى بولعان عيمارات. كوپكە بەلگىلى, وسى نىساندى وڭالتۋ ورتالىعىنا بەرۋ تۋرالى شەشىم بيىلعى ناۋرىز ايىندا قابىلدانعان ەدى.
عيماراتتى جاڭعىرتۋ جۇمىستارىنا, قاجەتتى قۇرال-جابدىقتار مەن جيھازدار ساتىپ الۋعا 80 ملن تەڭگە جۇمسالعان. ورتالىقتا مونتەسسوري كابينەتى, فيزيوتەراپيا, ەمدىك دەنە شىنىقتىرۋ, سول سياقتى سەنسور, ماسساج, پروتسەدۋرالىق كابينەتتەر, لوگوپەد, دەفەكتولوگ بولمەلەرى, تۇز شاحتاسى, باسسەين ت.ب بار. ەكى كورپۋستان تۇراتىن عيماراتتىڭ جالپى الاڭى – 910,4 شارشى مەتر. نىسان 40 ورىنعا لايىقتالعان.
ەسكە سالا كەتەيىك, جىل باسىنان بەرى جەتىسۋ وبلىسىنا قاراستى الاكول, سارقان, قاراتال اۋداندارىندا ەرەكشە قاجەتتىلىگى بار بالالارعا ارنالعان جالپى سانى 140 ورىندى وڭالتۋ ورتالىقتارى اشىلعان. قازىر ءبارى ەل يگىلىگىنە قىزمەت ەتىپ جاتىر.
جەتىسۋ وبلىسى
