قازاقستان قۇرىلىس سالۋشىلار قاۋىمداستىعىنىڭ پرەزيدەنتى ۆيكتور ميكريۋكوۆتىڭ ايتۋىنشا, جىل سايىن تۇرعىن ءۇي قۇرىلىسىنا ۇلەستىك قاتىسۋ تۋرالى زاڭدى بۇزعان قۇرىلىس سالۋشىلاردىڭ ارەكەتتەرىنەن ءوز ءۇيىن كۇتىپ جۇرگەن 15 مىڭعا جۋىق ۇلەسكەر زارداپ شەگەدى.
«مۇنداي قۇرىلىس سالۋشىلارعا قاراستىرىلعان جاۋاپكەرشىلىك بولماشى عانا ءارى ولار بۇل جازالاردان قورىقپايدى. مەملەكەتتىك ورگانداردا ءتيىستى تەكسەرۋ جۇرگىزۋگە وكىلەتتىگى از. زاڭدى جاپپاي بۇزۋ ماسەلەسىن شەشۋ –زاڭدى ساقتايتىن قۇرىلىسشىلار ءۇشىن جەڭىلدىكتەر مەن ارتىقشىلىقتار شەڭبەرىن كەڭەيتۋگە كومەكتەسەدى. جاسىراتىنى جوق, بۇگىندە كاسىبىن ادال جۇرگىزەتىن قۇرىلىس سالۋشىلار ءار ءتۇرلى كوميسسيالاردى تولەۋگە ايتارلىقتاي شىعىندانادى. بۇل رەتتە ىنتالاندىرۋشى ارتىقشىلىقتار مەن جەڭىلدىكتەردى كورمەيدى», - دەيدى ول.
زاڭناماعا سايكەس قۇرىلىس سالۋشىلارى تۇرعىن ءۇيدى سالۋ كەزىندە ۇلەسكەرلەردىڭ قاراجاتىن مىناداي ءۇشى جاعدايدا تارتا الادى: بىرىڭعاي وپەراتوردىڭ («قازاقستاندىق تۇرعىن ءۇي كومپانياسى» اق) كەپىلدىگى بولعان كەزدە, اكىمدىكتىڭ رۇقساتىمەن جانە ەدب جوباسىنا قاتىسقان كەزدە, قاڭقا سالىنعاننان كەيىن اكىمدىكتىڭ رۇقساتىمەن.
دەمەك, ۇلەسكەرلەردىڭ قاراجاتىن تارتۋ ءۇشىن قۇرىلىس سالۋشىنىڭ قولىندا «قازاقستاندىق تۇرعىن ءۇي كومپانياسى» اق-تان نەمەسە اكىمدىكتەن كەپىلدىك قۇجاتى بولۋى كەرەك. كەپىلدىك قۇرىلىسقا قاراجات سالعان ۇلەسكەرلەر ناتيجەسىندە پاتەرىن الا الاتىنىن كەپىلدەندىرەدى.
سالىنىپ جاتقان ۇيدە تۇرعىن ءۇي ساتىپ الۋ كەزىندە تۇرعىن ءۇي قۇرىلىسىنا ۇلەستىك قاتىسۋ تۋرالى كەلىسىمشارت زاڭدى كەلىسىم بولىپ سانالادى. بۇل قۇجات تۇرعىن ءۇي قۇرىلىسىنا ۇلەستىك قاتىسۋدىڭ بىرىڭعاي اقپاراتتىق جۇيەسىن پايدالانا وتىرىپ, ۋاكىلەتتى كومپانيانىڭ ۇسىنۋى بويىنشا كوپپاتەرلى تۇرعىن ءۇيدىڭ ورنالاسقان جەرى بويىنشا جەرگىلىكتى اتقارۋشى ورگاندا ەسەپكە الىنۋعا (تىركەلۋگە) جاتادى.
«قازاقستان قۇرىلىسشىلارىنىڭ قاۋىمداستىعى» رقب توراعاسى ءامىرجان نۇركامزينوۆتىڭ ايتۋىنشا, قۇرىلىس سالۋشىلارعا ۇلەسكەرلەردى تارتۋدا زاڭمەن قويىلعان تالاپتار كۇردەلى. سوندىقتان كوپتەگەن قۇرىلىسقا قاراجات تارتۋ ءۇشىن سالۋشى «سۇر» سحەمالاردى ىزدەۋگە تالپىنادى, ينۆەستتسيالاۋ كەلىسىمشارتى, برونداۋ كەلىسىمشارتى جاساۋعا تىرىسادى.
ء «ىس جۇزىندە مۇنداي قۇرىلىس سالۋشىلار قۇرىلىس مەرزىمىن ايتارلىقتاي ۇزارتقان, كەيبىرى قۇرىلىس جۇمىستارىن توقتاتىپ, جوبادان كەتىپ تىنعان. ۇلەسكەرلەر قاراجاتسىز, ءۇيسىز قالعان جاڭدايلار بار. وسىنداي جاعدايلار قوعامدا الەۋمەتتىك شيەلىنىستى تۋدىرادى. سوندىقتان اكىمدىكتەرگە ۇلەسكەرلەردىڭ قاراجاتىن تارتۋعا رۇقساتى جوق قۇرىلىس سالۋشىلار تۋرالى اقپاراتتى جۇيەلى تۇردە جاريالاپ وتىرۋ كەرەك, وسىلايشا ازاماتتاردى ىقتيمال سالدار تۋرالى حاباردار ەتۋ كەرەك», - دەيدى سپيكەر.
قازاقستاندا قۇرىلىس كومپانيالاردىڭ باسىم بولىگىنە ۇلەسكەرلەردەن قاراجات تارتۋ ءۇشىن «قازاقستان تۇرعىن ءۇي كومپانياسى» اق نەمەسە اكىمدىكتەن رۇقسات الۋ قيىن شارۋا. ويتكەنى زاڭدا وسى قىزمەتپەن اينالىسا الاتىن قۇرىلىس سالۋشىلار ءۇشىن ناقتى تالاپتار قاراستىرىلعان. قۇرىلىس سالۋشىلاردىڭ قاجەتتى تاجىريبەسى, قارجىسى جانە تاعى باسقا مۇمكىندىكتەرى بولۋى كەرەك.
ۇلتتىق پالاتا قازىرگى كەزدە يندۋستريا جانە ينفراقۇرىلىمدىق دامۋ مينيسترلىگىمەن بىرلەسىپ, ۇلەستىك قۇرىلىسقا زاڭدى تۇردە قاتىسقىسى جانە قۇرىلىس ساتىسىندا پاتەرلەردى ساتقىسى كەلەتىن قۇرىلىس سالۋشىلار ءۇشىن كەيبىر تالاپتاردى تومەندەتۋ بويىنشا جۇمىس جۇرگىزىپ جاتىر.
«اتامەكەن» ۇكپ قۇرىلىس دەپارتامەنتىنىڭ ساراپشىسى دانيار مولكەنوۆ ۇلەستىك قۇرىلىس مەحانيزمى قۇرىلىس سالۋشىلار ءۇشىن دە, ازاماتتار ءۇشىن دە ءتيىمدى ەكەنىن اتاپ ءوتتى. ويتكەنى سالىنىپ جاتقان تۇرعىن ءۇيدىڭ شارشى مەترىنىڭ باعاسى قايتالاما نارىققا قاراعاندا ەداۋىر تومەن.
«قۇرىلىس كومپانيالارىنىڭ كەڭ اۋقىمىنا رۇقسات بەرۋ كەزىندە بەلگىلى ءبىر تاۋەكەلدەر بار بولسا دا ۇلەستىك قۇرىلىس نارىعىن دامىتۋ قاجەت. رۇقسات الۋدىڭ قوسىمشا مەحانيمزدەرىن ويلاپ تابۋ كەرەك. مۇنداي تاسىلدەردىڭ ءبىرى جەكە ساقتاندىرۋ كومپانيالارى ارقىلى ساقتاندىرۋ ءتاسىلى. جالپى, ءبىز قۇرىلىس سالۋشىلارعا ونى اينالىپ ءوتۋ جولدارىن ىزدەمەي, زاڭ شەڭبەرىندە جۇمىس ىستەۋ تيىمدىرەك بولۋىن قامتاماسىز ەتۋىمىز كەرەك», دەپ اتاپ ءوتتى دانيار مولكەنوۆ.
«اتامەكەن» ۇكپ كوپپاتەرلى تۇرعىن ۇيلەر سالاتىن بارلىق كومپانيانى زاڭ شەڭبەرىندە جۇمىس ىستەۋگە شاقىرادى. سالىنىپ جاتقان پاتەرلەردى ساتۋ ءتيىستى رۇقسات بولعان جاعدايدا عانا جۇزەگە اسىرۋ قاجەت ەكەنىن ەسكە سالادى.
ۇلتتىق پالاتا ۇلەستىك قۇرىلىسقا قاتىسۋ ءۇشىن قاجەتتى رۇقسات العىسى كەلەتىن, بىراق بيۋروكراتيالىق كەدەرگىلەرگە بايلانىستى وعان قول جەتكىزە الماعان كومپانيالارعا قولداۋ كورسەتەتىن بولادى.
