جىل سايىن ERG كاسىپورىندارىندا وسى كوللەدجدەردىڭ جۇزدەگەن ستۋدەنتى وندىرىستىك تاجىريبەدەن وتەدى. ولاردىڭ باسىم بولىگى وقۋىن تامامداعان سوڭ ونەركاسىپتكە ەڭبەك ەتۋگە دايار. توپتىڭ قوستاناي, پاۆلودار جانە اقتوبە وبلىسىنداعى كاسىپورىندارىنا 5 جىلدا كوللەدجدەردىڭ 3 مىڭعا جۋىق تۇلەگى جۇمىسقا ورنالاسقان. سوڭعى ساۋالناما جاستاردى مۇنداعى ەڭبەكاقى مەن قىزمەتتە ورلەۋ مۇمكىندىگى جانە تۇراقتىلىق (52%, 45% جانە 45%) قىزىقتىرعانىن كورسەتتى.
– الەم ءبىر ورىندا تۇرمايدى. ءوندىرىس پەن ونداعى قىزمەتكەرلەرگە قويىلاتىن تالاپ وزگەرىپ كەلەدى. سىزدەر مەن ءبىزدىڭ مىندەتىمىز – ستۋدەنتتەردىڭ بارىنشا وزەكتى ءبىلىم مەن قاجەتتى داعدىلاردى مەڭگەرۋىنە جاعداي جاساۋ, - دەدى ەۋرازيالىق توپتىڭ باسقارما توراعاسى سەرىك شاحاجانوۆ.
وقۋ وردالارى مەن ERG-ءدىڭ وسى باعىتتاعى ۇمتىلىسىن ءبىر ارناعا شوعىرلاندىرۋ ءۇشىن كوللەدجدەر اليانسى قۇرىلدى. ازىرگە وداققا جالپى سانى 14 تەحنيكالىق جانە كاسىبي ءبىلىم بەرۋ ۇيىمى وتىر.
اليانستىڭ نەگىزگى مىندەتتەرى:
- كاسىبي, تەحنيكالىق جانە ورتا بىلىمنەن كەيىنگى ءبىلىم بەرۋ باعدارلامالارىن جەتىلدىرۋ. سونىڭ ىشىندە قازاقستانداعى تاۋ-كەن مەتاللۋرگيا سالاسىنىڭ قاجەتتىلىكتەرى مەن كولەدج تۇلەكتەرىنە قويىلاتىن جوعارى كاسىبي قابىلەت تالاپتارىن ەسكەرۋ;
- كوللەدجدەردىڭ سالالىق وقىتۋ-ادىستەمەلىك ورتالىعىن قۇرىپ, دامىتۋ;
- كوللەدجدەردىڭ وقىتۋشىلارى مەن جەتەكشىلەرىنە ارنالعان كوشباسشىلىق باعدارلامالارىن ازىرلەپ, ىسكە اسىرۋ;
- ERG-ءدىڭ قازاقستاندىق كاسىپورىندارىنان باستاماشىل, جوعارى بىلىكتى ماماندارى اراسىنان تالىمگەرلەر پۋلىن جاساقتاۋ;
بۇدان بولەك, اليانس قۇرامىنا ەنگەن تاعى ءبىر كومپانيا – BTS Education كوللەدجدەردىڭ وقىتۋشىلارى مەن ستۋدەنتتەرىنە بىلىكتىلىكتى ارتتىرۋدىڭ ونلاين كۋرستارىن ۇسىنادى. ءارى ءوزىنىڭ جاڭارتىلعان ءبىلىم بەرۋ باعدارلامالارىنىڭ ادىستەمەسىن بەرەدى.
– كەيىنگى كەزدە تەحنيكالىق جانە كاسىبي ءبىلىم بەرۋ سالاسىندا وڭ وزگەرىستەر بايقالادى. بۇگىندە ءبىلىم بەرۋ باعدارلاماسىنىڭ مازمۇنى مەن وقىتۋ مەرزىمدەرىن كوللەدجدەر جۇمىس بەرۋشىمەن بىرلەسە وتىرىپ, وزدەرى ايقىندايدى. 500 كوللەدجدە ءدۋالدى ءبىلىم بەرۋ جۇيەسى ەنگىزىلىپ, ول شامامەن 68 مىڭ ستۋدەنتتى قامتىدى. جۇمىسقا ورنالاسۋ مىندەتتەرىن ۇسىنسا, كاسىپورىنداردىڭ ءوتىنىمى بويىنشا ماقساتتى كادرلار دايارلاۋ ءىسى جۇرگىزىلەدى. اليانس ءبىزدىڭ باستامالارىمىزدى نىعايتىپ, تەحنيكالىق مامانداردى دايارلاۋ ساپاسىن ارتتىرادى دەگەن سەنىمدەمىن, - دەدى وقۋ-اعارتۋ مينيسترلىگىنىڭ باسقارما باسشىسى قالامقاس العازينوۆا.
ERG توپ كاسىپورىندارى ورنالاسقان وڭىرلەردەگى كوللەدجدەردى ۇنەمى قولداپ كەلەدى. ماسەلەن, وقۋ وردالارىنىڭ ماتەريالدىق-تەحنيكالىق بازاسىن نىعايتۋعا بيىل 310 ملن تەڭگە بولىنگەن. 2021 جىلدان بەرى بارلىق كوللەدجدەردىڭ ستۋدەنتتەرىنە اقىلى پراكتيكالار ۇيىمداستىرىلىپ كەلەدى. ايماقتاردى دامىتۋدىڭ ۇشجىلدىق باعدارلاماسى اياسىندا سەرىكتەس-كوللەدجدەرگە 700 ملن تەڭگەدەن استام قاراجات ءبولۋ كوزدەلگەن.
