ءىس-شاراعا جينالعان قاۋىم تۇرىكتىڭ تانىمال اقىنىنا ارنالعان ەسكەرتكىش الدىنا گۇل شوقتارىن قويدى. العاشقى بولىپ ءسوز العان شاھار باسشىسى يۋنۋس ەمرەنىڭ شىعارمالارى مەن ءومىر جولى تۋرالى قىسقاشا بايانداپ ءوتتى.
– باۋىرلاس تۇرىك حالقىنىڭ اتاقتى قالامگەرى يۋنۋس ەمرەنى ءبىز قوجا احمەت ءياساۋيدىڭ سوپىلىق ءىلىمىن جالعاستىرۋشى تۇلعا رەتىندە تانيمىز. البەتتە, ۇلى ويشىلدىڭ شىعارمالارى مەن ەڭبەكتەرى سۇيىسپەنشىلىك پەن مەيىرىمدىلىك, ىزگىلىك پەن ادامگەرشىلىك نەگىزدەرىنەن باستاۋ الادى. «كوك تۇرىك» دەپ رۋح العان كۇللى تۇركى جۇرتىنا بەلگىلى ماعجان جۇماباەۆتىڭ شىعارمالارىنىڭ ءوزى وسى يۋنۋس ەمرەنىڭ مۇراسىمەن تىعىز بايلانىستى, – دەدى ول.
قالا اكىمى ءتۇبى ءبىر تۇركى جۇرتىنىڭ تاريحى مەن مادەنيەتى ورتاق ەكەنىن, رۋحاني بايلانىستار بەرىك ەكەنىن مالىمدەدى. وعان دالەل رەتىندە قازاق-تۇرىك دوستىعىن مىسالعا كەلتىردى. سونىڭ ىشىندە شىمكەنت پەن تۇركيانىڭ يزمير, ەسكيشەحير, ادانا قالالارى اراسىندا دوستىق بايلانىس ورناتىلعانىن ايتتى. شاھار باسشىسىنىڭ ايتۋىنشا, تۇركيا ەلىمەن ستراتەگيالىق ارىپتەستىك وتە بەرىك جانە ساۋدا-ەكونوميكالىق قارىم-قاتىناس پەن بىرلەسكەن جوبالار دا بۇگىندە ءساتتى جۇزەگە اسىپ جاتىر. وسى ورايدا تۇرىكتىڭ ايتۋلى ازاماتىنىڭ ەسكەرتكىشىنىڭ اشىلۋى ەكى ەل اراسىنداعى مادەني-گۋمانيتارلىق جانە ساۋدا-ەكونوميكالىق ارىپتەستىك بايلانىستاردى بۇدان دا جوعارى بەلەسكە كوتەرەتىنىنە سەنىم ءبىلدىردى.
سونداي-اق سالتاناتتى جيىن بارىسىندا تۇركيا رەسپۋبليكاسىنىڭ سىرتقى ىستەر ءمينيسترى مەۆليۋد چاۆوشۋگلۋ تۇركيا رەسپۋبليكاسىنىڭ شىمكەنتتەگى قۇرمەتتى كونسۋلدىعىنىڭ جۇمىسىمەن تانىستى. سونىمەن بىرگە وسى ءىس-ساپار اياسىندا تۇركيا سىرتقى ىستەر ءمينيسترى مەن قالا اكىمىنىڭ قاتىسۋىمەن ارنايى ءىس-شارا ۇيىمداستىرۋ قاراستىرىلعان. وندا شاھاردىڭ بيزنەس وكىلدەرىمەن كەزدەسۋ وتەدى دەپ جوسپارلانىپ وتىر.
شىمكەنت
