قاراقات ابدەن وبلىستاعى ۇلكەن ايماقتاردىڭ ءبىرى بولىپ سانالاتىن ارال قالاسىندا جەرگىلىكتى حالىقپەن جۇزدەسىپ, سايلاۋالدى باعدارلاماسىن تانىستىردى. بۇدان بولەك, كانديدات وسى وڭىردە ۇلتتىق جانە وتباسىلىق قۇندىلىقتاردى نەگىزگە الىپ, كاسىبىن دوڭگەلەتىپ وتىرعان وتباسىلىق بيزنەس وكىلدەرىمەن اڭگىمەلەستى.
ارال وڭىرىندە قوزعالعان ماڭىزدى تاقىرىپتار قىزىلوردا قالاسىنداعى كەزدەسۋدە جالعاستى. جيىن بارىسىندا قوعامداعى وزەكتى ماسەلەلەر, وسكەلەڭ ۇرپاق پەن جاستار تاربيەسى, وتباسى ينستيتۋتىنىڭ ءمانى تالقىلاندى. كانديدات قوعام دەرتىنە اينالعان سينتەتيكالىق ەسىرتكى, قۇمار ويىندار مەن جات مادەنيەتكە ەلىكتەگىش جاستاردىڭ ارەكەتتەرىنە ەرەكشە توقتالدى. ونىڭ ايتۋىنشا, جات قىلىقتاردىڭ ورشۋىنە ۇلتتىق قۇندىلىقتاردىڭ ءتيىستى دەڭگەيدە ناسيحاتتالماۋى, وتباسى تاربيەسىنىڭ السىرەۋى سەبەپ.
كەزدەسۋدە ۇلتتىق كيىم ماسەلەسى دە ءسوز بولدى. «ۇلتتىق كيىم – ەستەتيكالىق ءسان عانا ەمەس, حالقىمىزدىڭ ءتالىم-تاربيەسىن, جاستاردىڭ بويىنا پاتريوتتىق سەزىم ءسىڭىرۋدىڭ ەڭ ءتيىمدى قۇرالى. ءداستۇر دە, ونەر دە, حالقىمىزدىڭ فيلوسوفياسى دا ۇلتتىق كيىمىمىزدە جاتىر. سوندىقتان ۇلتتىق كيىم وندىرۋشىلەرگە بارىنشا قولداۋ كورسەتۋىمىز كەرەك», دەدى قاراقات ابدەن.
