بۇگىن – تاريحي كۇن. بۇگىن ەۋرازيا سىندى الىپ قۇرلىقتىڭ ورتا بەلدەۋىن مەكەن ەتكەن ءۇش ۇلكەن مەملەكەت ءوز تاريحىنىڭ جاڭا پاراعىن اشادى: ەلوردامىز استانادا بەلارۋس, رەسەي جانە قازاقستان پرەزيدەنتتەرى ەۋرازيالىق ەكونوميكالىق وداق قۇرۋ تۋرالى شارتقا قول قويادى. وسى وقيعانىڭ قارساڭىندا ءبىز ءۇش مەملەكەتتىڭ ۇكىمەتتەرىندەگى ينتەگراتسيا ماسەلەلەرىمەن اينالىساتىن, شارت جوباسىن جاساۋعا تىكەلەي قاتىسقان ادامدارمەن – قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆپەن (25 ءساۋىر), بەلارۋس رەسپۋبليكاسىنىڭ ەۋرازيالىق ەكونوميكالىق كوميسسياداعى مۇشەسى سەرگەي رۋماسپەن (27 مامىر) جانە رەسەي فەدەراتسياسى ۇكىمەتى توراعاسىنىڭ ءبىرىنشى ورىنباسارى يگور شۋۆالوۆپەن (28 مامىر) سۇحباتتار جاريالاعان بولاتىنبىز. ەندىگى كەزەك ەۋرازيالىق ەكونوميكالىق كوميسسيا كوللەگياسىنىڭ توراعاسى ۆ.ب.حريستەنكوعا كەلىپ وتىر.
سۇحبات ءماتىنىن وقىرمان نازارىنا ۇسىناردىڭ الدىندا ەۋرازيالىق ەكونوميكالىق كوميسسيا تۋرالى از-كەم ماعلۇمات بەرە كەتكەن ارتىق بولمايدى دەپ ويلايمىز. ەەك – كەدەن وداعى مەن ءبىرتۇتاس ەكونوميكالىق كەڭىستىكتىڭ تۇراقتى تۇردە جۇمىس ىستەيتىن ۇلتۇستىلىك رەتتەۋشى ورگانى. رەسەي فەدەراتسياسى, بەلارۋس رەسپۋبليكاسى جانە قازاقستان رەسپۋبليكاسى پرەزيدەنتتەرىنىڭ شەشىمىمەن قۇرىلعان بۇل ورگان 2011 جىلعى 18 قاراشاداعى «ەۋرازيالىق ەكونوميكالىق كوميسسيا تۋرالى» جانە «ەۋرازيالىق ەكونوميكالىق كوميسسيانىڭ جۇمىسىن رەتتەۋ تۋرالى» شارتتاردىڭ نەگىزىندە جۇمىس ىستەيدى. جوعارى ەۋرازيالىق ەكونوميكالىق كەڭەسكە باعىنىستاعى ۇلتۇستىلىك باسقارۋ ورگانى مارتەبەسىنە يە. ەەك-ءنىڭ باستى مىندەتى – كەدەن وداعى مەن ءبىرتۇتاس ەكونوميكالىق كەڭىستىكتىڭ جۇمىس ىستەۋى مەن دامۋىنا قاجەتتى جاعدايلاردى قامتاماسىز ەتۋ, وسى بىرلەستىكتەر اياسىنداعى ىقپالداستىق جونىندە ۇسىنىستار ازىرلەۋ, 2015 جىلى ەۋرازيالىق ەكونوميكالىق وداقتى قۇرۋعا قاجەتتى ماكروەكونوميكالىق جانە سىرتقى ەكونوميكالىق جاعدايلاردى جاساۋ.
كوميسسيا بۇل مىندەتتىڭ ۇدەسىنەن شىقتى دەي الامىز. ونىڭ ناقتى دالەلى – ەۋرازيالىق ەكونوميكالىق وداق قۇرۋ تۋرالى شارتتىڭ الدىن الا بەلگىلەنگەن ۋاقىتقا دايىن بولۋى. كەشە, 28 مامىرداعى ءتۇس الەتىندە ەۋرازيالىق ەكونوميكالىق كوميسسيا كوللەگياسىنىڭ توراعاسى ۆ.ب.حريستەنكو ماسكەۋدىڭ «روسسيا 24» تەلەارناسىنا سۇحبات بەردى. سۇحباتتا قازاقستان تاۋارلارىنىڭ كەدەن وداعى ەلدەرىنە ەكسپورتى ەسەلەپ ارتقانى ناقتى سان كورسەتكىشتەرىمەن ايتىلدى. رەسەي تەلەارناسىنداعى اڭگىمەدە بۇگىن قول قويىلاتىن شارتتىڭ جالپى كولەمى قوسىمشالارىمەن بىرگە ەسەپتەگەندە 1000 بەتتەن اسىپ كەتەتىندىگى دە ەسكە سالىندى. ارينە, ونىڭ ءار پاراعىنا ەلدەردىڭ تالاي جىلدار بويعى تاعدىرىن ايقىندايتىن قاعيدالار قوسىلىپ, مول مالىمەتتەر قامتىلعانى كۇمانسىز. گازەتتىڭ 3-ءشى بەتىندە وسى جۇمىستى ۇيلەستىرۋدىڭ سوڭعى بەلەسىندە القاعا باسشىلىق جاساعان ۆ.ب.حريستەنكونىڭ سۇحباتى جاريالانىپ وتىر. سۇحباتتى ۇيىمداستىرۋعا كورسەتكەن كومەگى ءۇشىن قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىنە العىسىمىزدى ايتامىز.
– قۇرمەتتى ۆيكتور بوريسوۆيچ! ەۋرازيالىق ەكونوميكالىق وداق قۇرۋ تۋرالى شارتقا استانادا قول قويىلاتىنى زاڭدىلىق دەپ بىلەمىز. قازاقستان پرەزيدەنتى نۇرسۇلتان نازارباەۆتىڭ ەۋرازياشىلدىق يدەياسىن جاڭاشا نەگىزدەۋدىڭ اۆتورى بولىپ تابىلاتىنى بارشاعا بەلگىلى. نۇرسۇلتان ءابىش ۇلى 1994 جىلى ماسكەۋ مەملەكەتتىك ۋنيۆەرسيتەتىندە وسى ۇسىنىستى ورتاعا سالعان كەزدە ونى جۇزەگە اسىرۋعا ونداعان جىلدار كەتەتىنىن ايتقان ەدى. ءاۋ باستاعى ماقساتقا اينالاسى 20 جىلدىڭ ىشىندە قول جەتتى. ەڭ باستىسى, ەۋرازياشىلدىق تەورياسى ناقتى ىسكە ۇلاسا باستادى. بۇل قالاي جۇزەگە اسىرىلدى؟
– ءيا, كوپتەن كۇتكەن كۇنگە دە كەلىپ قالدىق. پرەزيدەنتتەر سامميتىندە تالايدان ويلاستىرىلعان ءىستىڭ زاڭدىق تۇرعىدان رەسىمدەلۋى جاسالادى. بۇل – جيىرما جىلدىق جولدىڭ بيىك بەلەسى. اياق استىنان قولعا الىنعان شارۋا ەمەس. جيىرما جىل بۇرىن بۇل يدەيانى العاش رەت قازاقستان پرەزيدەنتى نۇرسۇلتان ءابىش ۇلى نازارباەۆ ۇسىنعان بولاتىن. وسى جىلدار ىشىندە ءبىزدىڭ ەلدەرىمىزدىڭ بىرىگۋ ۇدەرىسى بىرەسە باياۋ, بىرەسە جىلدام ءجۇرىپ جاتتى. ەندى بۇل وداق وتە ماڭىزدى پىشىنگە اۋىسقالى وتىر. بۇل وداق – ەكونوميكالىق وداق. مۇنىڭ ءوزى وتە ءماندى جاي. ول تەك ەكونوميكالىق سالالاردى عانا قامتيدى. ونىڭ ءبىز ءبىراز جىلدان بەرى قارقىندى تۇردە جۇرگىزىپ كەلە جاتقان جۇمىستىڭ نەگىزىندە قۇرىلاتىنى وتە جاقسى. ءۇش جىلدان بەرى كەدەن وداعى جۇمىس ىستەپ تۇر. سودان بەرى ءبىزدىڭ ەلدەرىمىزدىڭ اراسىنداعى كەدەن شەكارالارى جويىلعان, تاۋارلار قوزعالىسىنا ەندى ەشقانداي كەدەرگى جوق. 2012 جىلدىڭ 1 قاڭتارىنان ءبىز ءبىرتۇتاس ەكونوميكالىق كەڭىستىك ءۇشىن جاعداي جاساۋدى باستاعان ەدىك. ياعني, ونىڭ شەڭبەرىندە تاۋارلاردىڭ, قىزمەتتەردىڭ, كاپيتالدىڭ جانە جۇمىس كۇشىنىڭ قوزعالىس ەركىندىگىنە قول جەتكىزىلگەن. ەۋرازيالىق ەكونوميكالىق وداق وسى ارقاۋدى نەگىزگە الا وتىرىپ قۇرىلۋدا. ياعني, ەەو بۇعان دەيىن كەدەن وداعى مەن ءبىرتۇتاس ەكونوميكالىق كەڭىستىك شەڭبەرىندەگى جەتىستىكتەرگە ارقا سۇيەيدى. بۇدان بىلاي ادامدار ەشقانداي كۆوتاسىز-اق قالاعان ەلىندە جۇمىس ىستەي الاتىن بولادى. سونىمەن بىرگە, بىرقاتار جاڭا سالالار دا قوسىلدى. بۇل ەنەرگەتيكا, كولىك, فارماتسەۆتيكا, مەديتسينا جابدىقتارى سياقتىلار. بۇرىن مۇنىڭ بارىنە ارنايى رۇقسات قاجەت بولاتىن. سوعان وراي ءوزارا كەلىسىلگەن ونەركاسىپ ساياساتى دەگەن ۇعىم دا ورنىعا باستادى. دەمەك, ءبىز ءوز دامۋىنىڭ ستراتەگياسىن ايقىن كورە الاتىن ەكونوميكالىق وداققا قول جەتكىزگەلى وتىرمىز. ول وداق ۇلتتىق ستراتەگيالاردى, مىسالى, «قازاقستان – 2050» ستراتەگياسىن دامىتادى, ونى جۇزەگە اسىرۋعا مول مۇمكىندىكتەر اشادى. قىسقاسى, ەۋرازيالىق ەكونوميكالىق وداقتىڭ جوباسى ءوزىنىڭ قيسىندى كەزەڭىنە كەلدى دەي الامىز. ارينە, بۇل ينتەگراتسيانىڭ ەڭ بيىك ءپىشىنى بولماس, بىراق ەداۋىر جوعارى ءپىشىنى. وسى باعىتتا ءبىزدىڭ ءبارىمىز ءالى تالاي ءىس تىندىرۋىمىز كەرەك, بىراق وسى بەلەستىڭ ءوزى وتە ۇلكەن بەلەس بولىپ تاريحىمىزعا ەنەدى.
– ءسىز كەيىنگى كەزدە باسقارعان كوللەگيا ەۋرازيالىق ەكونوميكالىق وداقتى قۇرۋ ءجونىندەگى شارتتىڭ جوباسىن دايىنداۋ بويىنشا قىرۋار جۇمىس اتقاردى. وسى جۇمىستىڭ قانداي بەلەستەرىن بولە ايتۋعا بولار ەدى؟
– ەكونوميكالىق وداقتى قۇرۋ ماسەلەلەرىن تالقىلاۋدا ەڭ نەگىزگى پىكىر يەلەرى ءۇش ەلدىڭ باسشىلارى بولعانىن باسىن اشىپ ايتۋ كەرەك. بارلىق باستى, قاعيداتتى ماسەلەلەردى ءۇش پرەزيدەنت بىرلەسە شەشىپ وتىردى. ال ەندى شارت جوباسىن جاساۋ جونىندەگى جۇمىستىڭ كولەمىنە كەلەيىك. جالپى, ەۋرازيالىق ەكونوميكالىق وداقتى قۇرۋ تۋرالى شارت دەگەنىمىز نە؟ شارت دەگەنىمىز شامامەن مىڭ بەتتەي قۇجات, وندا 32 قوسىمشا بار. بۇل ءوز-وزىنەن دۇنيەگە كەلە قالعان قۇجات ەمەس, پىكىر الىسا, ايتىسا, تالاسا-تارتىسا ءجۇرىپ جاسالعان قۇجات. ونى جاساۋ بارىسىندا ءار ەل ءوزىنىڭ ۇستانىمدارىن بارىنشا قورعادى. قۇجاتتى دايىنداۋ بارىسىندا ەندى بەس, ون, ون بەس جىلدان كەيىن نە بولادى, ءبىز نەگە قول جەتكىزەمىز دەگەن سۇراقتارعا جاۋاپ ىزدەلدى. شارتتا قۋات رىنوگى, مۇناي, مۇناي ونىمدەرى, گاز سياقتى كۇردەلى ماسەلەلەر قامتىلدى. 2025 جىلعا دەيىن وسى سالالار بويىنشا ورتاق رىنوك قۇرىلاتىنى كوزدەلدى, سول كەزدە ەلدەر ءبىر-ءبىرىنىڭ رىنوگىنا ەمىن-ەركىن ەنە بەرەتىن بولادى. 2019 جىلدان كەشىكتىرمەي ەنەرگەتيكانىڭ ورتاق رىنوگى دا قۇرىلۋعا ءتيىس. مۇنىڭ ءوزى قازاقستاندىق ەنەرگەتيكتەر ءۇشىن وتە پايدالى. ايتالىق, سول كەزدە ەكىباستۇز ەنەرگەتيكتەرى رەسەي جانە بەلارۋس رىنوكتارىندا ءوز ونىمدەرىن قازىرگىدەن الدەقايدا ەركىن ساتا الادى. مۇنىڭ بارىنە ۇزاق ۋاقىت اقىلداسۋدىڭ, كەرەك جەرىندە تالاسىپ الۋدىڭ ارقاسىندا قول جەتتى. سوندىقتان بۇل جۇمىستىڭ بارلىق بەلەستەرى ماڭىزدى دەپ ايتا الامىن.
– شارتتا قامتىلماي قالعان ماسەلەلەر دە بار عوي؟
– مۇمكىن بولعانىنشا كەڭ اياداعى ماسەلەلەر قامتىلدى. سونىمەن بىرگە, «كادردان تىس» قالىپ قويعان جايلار دا بار, ارينە. ولار دا ماڭىزدى. بىراق ولارعا كەيىنىرەك قايتا ورالۋعا تۋرا كەلەدى. مىسالى, الكوگول مەن تەمەكى ونىمدەرى سونداي بولىپ شىقتى. بۇعان دەيىن ورتاق رىنوك قۇرۋ پىشىمىندە بۇل جونىندەگى ماسەلەلەردىڭ شەشىمىن تابۋدىڭ ءساتى تۇسكەن جوق. اكتسيز ساياساتىن, سالىقتىڭ كولەمىن كەلىسۋ كەرەك بولدى. ماسەلەنىڭ كۇردەلىلىگىنە بايلانىستى ولاردى قاراستىرۋ ەلدەردىڭ ۇكىمەتتەرىنە تاپسىرىلدى. رەتتەلگەننەن كەيىن قايتادان قارالادى. اۋەل باستا شارتتىڭ اياسىندا قامتىلۋعا ءتيىستى دەپ ويلاستىرىلعان, بىراق «بورتتىڭ سىرتىندا» قالىپ قويعان ماسەلەلەر دە جەتكىلىكتى. مەملەكەتتەر باسشىلارى ەكونوميكالىق وداق تۋرالى قۇجاتتىڭ اياسىندا گۋمانيتارلىق جايلار, مىسالى, ءبىلىم بەرۋگە, مەديتسينالىق قىزمەت كورسەتۋگە, زەينەتاقىمەن قامتۋعا قاتىستى ماسەلەلەر ەڭبەك ميگراتسياسىنىڭ ەركىندىگىنە بايلانىستى تۇستاردا عانا قالدىرىلعانى ءجون دەپ شەشتى. ونداعى وي, مىسالى, جۇمىسقا قازاقستاننان رەسەيگە, بەلارۋسقا بارعان نەمەسە رەسەيدەن, بەلارۋستان قازاقستانعا بارعان ادامداردىڭ ديپلومدارى قابىلداناتىنداي, مويىندالاتىنداي بولۋى, مەديتسينالىق كومەككە ەركىن قول جەتكىزۋى قامتاماسىز ەتىلسىن دەگەندىك ەدى. زەينەتاقى ماسەلەلەرى دە وسىلايشا شەشىلەدى. مۇنىڭ ءوزى ەۋرازيالىق ەكونوميكالىق وداق ەڭ الدىمەن ەكونوميكالىق بىرلەستىك رەتىندە قۇرىلعالى وتىرعانىن ايقىن اڭعارتا تۇسەدى.
ەگەر ءبىز جەكەلەگەن كورسەتكىشتەر بويىنشا, ايتالىق, قازاقستاننىڭ ەكسپورتى ءجونىندەگى پوزيتسيالارعا قارايتىن بولساق, وندا سوڭعى ەكى-ءۇش جىلدىڭ ىشىندە سىزدەردىڭ ەلدەرىڭىزدەن شىعارىلاتىن تسەمەنت پەن كونديتەر ونىمدەرىنىڭ ەكسپورتى بىرنەشە ەسە ارتقانىن كورەمىز. مىسالى, كونديتەر ەكسپورتى 5 ەسە, تسەمەنت ەكسپورتى 11 ەسە وسكەن.
سالالاردىڭ ىقپالداسۋعا دايىندىق دەڭگەيى بىردەي ەمەس. قىزمەت كورسەتۋ سەكتورى, كاپيتالدىڭ قوزعالىس سەكتورى ينتەگراتسيانىڭ باستاپقى بەلەسىندە تۇر. ورتاشا ستراتەگيالىق مىندەتتەر بويىنشا, 2025 جىلعا قاراي قارجىلىق قىزمەت كورسەتۋدىڭ ورتاق رىنوگىن قۇرۋىمىز كەرەك. ونىڭ جالپى رەتتەۋشىلىك تەتىكتەرى جاسالىپ, ورتالىعى الماتىدا بولۋعا ءتيىس. بۇل تۇرعىدان قاراعاندا, وسى ماقساتقا دەپ ويلاستىرىلعان ون جىلدىق كەزەڭ, ەداۋىر ۇزاق ۋاقىت سياقتى كورىنگەنىمەن, مۇندايلىق ۇلكەن سەكتورلاردى ءبىر ىزگە ءتۇسىرۋ ءۇشىن قاجەتتى كەزەڭ.
– پرەزيدەنت نازارباەۆ جاقىندا ەۋرازيالىق ەكونوميكالىق وداقتىڭ تەك ەكونوميكالىق مۇددەلەردى كوزدەيتىنىن تاعى دا ايتتى. سونىڭ ءوزىندە دە وسى ماسەلەنى ساياسي ساۋداعا سالۋشىلار ءالى دە تابىلادى. ءسىز ولارعا نە دەر ەدىڭىز؟
– كسرو-نى قالپىنا كەلتىرۋ جونىندە نەشە ءتۇرلى قيال-عاجايىپ اڭگىمەلەر, قورقىنىشتى حيكايالار تالاي ايتىلعان. بۇل تاقىرىپقا سۇمدىقتار تۋرالى فيلمدەر جانرىندا لەنتالار تۇسىرۋگە دە بولار ەدى. بىراق مۇنىڭ اقيقاتقا ەشقانداي قاتىسى جوق. ۋاقىت باسقا, زامان باسقا, قوعام باسقا. ماسەلە تەك تەڭ ارىپتەستىك نەگىزدەگى ەكونوميكالىق ينتەگراتسيا تۋرالى عانا بولىپ وتىر. الدەبىر ەل ءوزىنىڭ وسى ەكونوميكالىق وداققا مۇشەلىگى ارقىلى ەگەمەندىگىنەن ايىرىلۋى مۇمكىن دەگەن اڭگىمەگە كەلسەك, مەن قايتا كەرىسىنشە ءاربىر ەل ءوز ەگەمەندىگىن كۇشەيتە تۇسەدى دەر ەدىم. ودان دا وتكىزىپ ايتايىن. قايتا شاعىنداۋ ەلدەر رەسەيمەن سالىستىرعاندا كوبىرەك ەگەمەندىككە يە بولادى دەۋدىڭ دە ءجونى بار. ەندىگى جەردە ولاردىڭ ىقپالى ون ەسەدەي كەڭەيە تۇسكەن رىنوكقا تارايتىن بولادى. ارينە, بۇل ەگەمەندىكتى تەرەڭدەتە تۇسەتىن, مۇمكىندىكتى كەڭەيتە بەرەتىن ولجا. بۇعان ەڭ جاقسى دالەل – وزدەرىنىڭ تابىستى بيزنەسىن وركەندەتۋگە جولى اشىلعان, جاسامپازدىققا بەت الىپ, ناقتى ناتيجەلەرگە جەتكەن ادامداردىڭ تابىستىلىعى. ول جاعىن بىلاي قويعاندا, قاراپايىم ادامدار ءۇشىن ەڭ باستى پايدا تىنىشتىق, تۇراقتىلىق پەن بولاشاعىن ايقىن كورۋ ەكەنىن دە ۇمىتپاعان ءجون. ادامدارعا تۇبەگەيلى وزگەرىستەردىڭ تىم جىلدام جۇزەگە اسىرىلماعانى كەرەك. كەلەر كۇنگە سەنىمدى بولۋعا ءدال وسى شارت كەڭ كوكجيەك اشادى.
استانادا قول قويىلاتىن شارت بەلگىلى ءبىر دارەجەدە ەۋروپا وداعىن قۇرۋ تۋرالى شارتقا, بەلگىلى ءبىر دارەجەدە كەزىندەگى ريم شارتىنا ۇقساستاۋ كەلەدى. بىراق, بەلگىلى ءبىر دارەجەدە عانا. نەگە دەسەڭىز, ۋاقىت وزگەرىپ كەتتى. ەۋرازيالىق ەكونوميكالىق وداق قۇرامىنا ءۇش ەلدى – قازاقستان, بەلارۋس پەن رەسەيدى بىرىكتىرەتىن حالىقارالىق وڭىرلىك ينتەگراتسيانىڭ حالىقارالىق ۇيىمى بولىپ تابىلادى جانە, تيىسىنشە, ورتاق ەكونوميكالىق كەڭىستىكتە وسى ءۇش مەملەكەتكە قاتىستى نارسەنىڭ ءبارىنىڭ باسىن قوسادى. قاراپايىم ادامدار تۇرعىسىنان قاراعاندا بۇل ەكونوميكالىق وداق ەلدەر ەكونوميكالارىنىڭ كەدەرگىسىز ورتاعا تولىقتاي قول جەتكىزۋىنە ەسەپتەلگەن. ول ءتورت ەركىندىككە – تاۋارلاردىڭ, قىزمەتتەردىڭ, كاپيتالدىڭ جانە جۇمىس كۇشىنىڭ قوزعالىس ەركىندىگىنە نەگىزدەلگەن. جۇمىس كۇشىنىڭ كوزى بولىپ تابىلاتىن ادامدار ءۇشىن بۇل ءوز مۇمكىندىگىن ەكونوميكالىق وداقتىڭ بۇكىل كەڭىستىگىندە ەشبىر شەكتەۋسىز تانىتا الۋعا جول اشۋ دەگەن ءسوز. وسى ارقىلى 170 ميلليوننان استام ادامدىق الىپ رىنوك قۇرىلىپ وتىر. بۇل رىنوكتا باسەكەلەستى بيزنەستى دامىتۋعا بار كۇش-جىگەردى جۇمساۋعا جاعداي جاسالادى. مۇنىڭ ءوزى ىشكى درايۆەر, ءبىزدىڭ ەلدەرىمىز ءۇشىن دامۋدىڭ باستاۋ كوزى, ول قازىردىڭ وزىندە ناقتى ناتيجە بەرىپ, جاقسى جەتىستىككە يە ەتىپ وتىر.
بولاشاقتىڭ كەلبەتى نەگىزىنەن ىقپالداسۋ ۇدەرىستەرىنىڭ قالاي جۇرەتىنىنە بايلانىستى قالىپتاسادى. ەۋرازيالىق ەكونوميكالىق وداقتى قۇرۋدىڭ تۇپكى ماقساتىنا كەلەتىن بولساق, بۇگىنگى الەمدە كوپ نارسە, ورىن الىپ وتىرعان بارلىق قاراما-قايشىلىقتاردى ەسكەرىپ ايتقاندا, وڭىرلىك ينتەگراتسيالىق ءبىرلەستىكتەردىڭ ءوزارا ۇنقاتىسۋىنا قاتىستى. بۇل تۇرعىدان قاراعاندا ەۋرازيالىق ەكونوميكالىق وداقتى قۇرۋدىڭ ۋاقىت تالابى ەكەندىگى ءسوزسىز.
سۇحباتتاسقان
ساۋىتبەك ابدراحمانوۆ.
