ەل ىشىندە كوكەيكەستى ساۋالدارىنا جان جۇباتار جاۋاپ تاپپاي جۇرگەن جاندار از ەمەس. ونىڭ كوپشىلىگى الەۋمەتتىك-تۇرمىستىق جايعا بايلانىستى. مينيسترمەن كەزدەسۋ بارىسىندا كوپتەگەن ساۋالدىڭ تۋىنداۋى دا سوندىقتان. قولعا الىنىپ جاتقان بىرقاتار شارادان قۇلاعدار بولعاننان كەيىن كوپشىلىكتىڭ كەۋدەسىندە ءۇمىت وتى لاۋلاعانىن دا ايتا كەتەلىك. مينيستر كوپبالالى وتباسىلاردى الەۋمەتتىك جاعىنان قولداۋ, الەۋمەتتىك قىزمەت كورسەتۋ جۇيەسىن جاڭعىرتىپ, جەتىلدىرۋ جانە زەينەتاقىمەن قامسىزداندىرۋ شارالارىن جان-جاقتى تاراتىپ, تۇسىنىكتى ەتىپ ايتىپ بەردى. حالىقتى الەۋمەتتىك قولداۋدى جاقسارتۋعا باعىتتالعان الەۋمەتتىك كودەكستىڭ جوباسى ازىرلەنگەنىنە دە توقتالدى.
– كودەكستىڭ جوباسىن ازىرلەۋ بارىسىندا ۇزىن-ىرعاسى 1 مىڭنان اسا ۇسىنىس ءتۇستى. 50-دەن اسا زاڭ مەن 200 زاڭعا تاۋەلدى اكتىلەر تارازى باسىنا تارتىلىپ, جان-جاقتى زەردەلەندى. 80-نەن اسا زاڭعا وزگەرىستەر ەنگىزىلمەك. سونداي-اق 10 زاڭ ءوزىنىڭ كۇشىن جويادى. مەملەكەت تاراپىنان كومەكتى قامتاماسىز ەتە وتىرىپ, اتالعان كودەكس ازاماتتاردى ءومىر بويى سۇيەمەلدەيتىن بولادى. بۇل ورايدا حالىقتىڭ جەكەلەگەن وسال ساناتتارىن قولداۋ تاسىلىنەن وتباسىن نىعايتۋ جانە دامىتۋ ءۇشىن بازالىق جاعدايلار جاساۋعا كوشۋ جۇزەگە اسىرىلماق, – دەدى مينيستر.
جۇرتشىلىقپەن جۇزدەسۋ بارىسىندا مينيستر الەۋمەتتىك كودەكستى جۇزەگە اسىرۋ قۇرالدارىنىڭ قۇرامداس ءبىر بولىگى وسى جىلدىڭ 1 قىركۇيەگىنەن باستاپ قاناتقاقتى رەجىمدە ىسكە قوسىلعان وتباسىنىڭ تسيفرلىق كارتاسى ەكەنىنە توقتالدى. جاڭا جوبانىڭ جاناشىرلىعى از ەمەس. ماسەلەن, مەملەكەتتىك ورگاندارعا ازاماتتاردىڭ جۇگىنۋىن كۇتپەستەن پرواكتيۆتى فورماتتا كومەك كورسەتۋگە جول اشپاق. جوبا قولعا الىنعاننان بەرى 36 مىڭ ادامعا مەملەكەتتىك كورسەتىلەتىن قىزمەتتەردى كورسەتۋ ءۇشىن سمس-حابارلامالار جولدانعان. بۇل رەتتە ءوتىنىشسىز جاردەماقى نەمەسە تولەم الۋ مۇمكىندىگىن 7 مىڭنان اسا ادام پايدالاندى. جاڭا جوبانىڭ ءتيىمدى ەكەنى العاشقى قادامنان-اق بايقالىپ وتىر. جيىنعا قاتىسقان جۇرتشىلىق تا ونىڭ ەڭ الدىمەن وزدەرى ءۇشىن بارىنشا قولايلى ەكەنىن ۇعىنىپ, كوڭىلدەرى توعايىپ قالدى.
ەڭ الدىمەن حالىقتىڭ الەۋمەتتىك-تۇرمىستىق جاعدايىن جاقسارتۋعا باعىتتالعان سان سالالى شارالاردىڭ تۇپكى نەگىزى – ادىلەتتى ورنىقتىرۋ. مينيستر مەملەكەت باسشىسىنىڭ تاپسىرمالارىمەن الەۋمەتتىك كودەكس جوباسىن ىسكە اسىرۋ شەڭبەرىندە ءبىر جارىم جاسقا دەيىنگى بالا كۇتىمى بويىنشا مەملەكەتتىك جاردەماقى مەن مەملەكەتتىك الەۋمەتتىك ساقتاندىرۋ قورىنىڭ الەۋمەتتىك تولەمدى تولەۋ مەرزىمىن ۇزارتۋ, ماراپاتتالعان انالارعا بەرىلەتىن جاردەماقى مولشەرىن ۇلعايتۋ جولىمەن بالالى وتباسىلاردى قولداۋ شارالارىن كۇشەيتۋ كوزدەلگەنىن ايتىپ ءوتتى. بۇل جاڭالىقتى جيىنعا قاتىسىپ وتىرعان كوپبالالى انالار قۋانا قابىلدادى. قىمباتشىلىق قوس بۇيىردەن قىسىپ تۇرعان كەزدە ەلدىڭ قامىن جەگەن قامقور قادامنىڭ بەلگىسى. 2024 جىلدىڭ 1 قاڭتارىنان باستاپ بالالاردىڭ 18 جاسقا تولعانعا دەيىنگى ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن ارنايى جيناقتاۋ شوتتارىنا اۋدارۋ كوزدەلگەن. بۇل دا, شىن مانىندە, ادىلدىكتىڭ سالتانات قۇرۋى.
الەۋمەتتىك قىزمەت كورسەتۋ جۇيەسىن ۋاقىت تالابىنا ساي جاڭعىرتۋ قىزمەتتەردىڭ قولجەتىمدىلىگىن كەڭەيتۋ ەسەبىنەن جۇزەگە اسىرىلماق. بۇدان باسقا دا ارناۋلى الەۋمەتتىك قىزمەت الۋشىلاردىڭ وتباسىنىڭ جۇمىسسىز مۇشەلەرىن الەۋمەتتىك قىزمەتتەرگە تارتۋ جوسپارلانۋدا.
– الەۋمەتتىك كودەكس جوباسىندا جالپى تاريفتەردىڭ ورنىنا ارنايى الەۋمەتتىك قىزمەتتەردى جان باسىنا شاققانداعى قارجىلاندىرۋ قاعيداتى ەنگىزۋ كوزدەلىپ وتىر. قىزمەتتەردىڭ ساپاسىن ارتتىرۋ, مۇگەدەكتىڭ توبىن بەلگىلەۋ, مەديتسينالىق الەۋمەتتىك ساراپتامانى سىرتتاي جۇرگىزۋدى ەنگىزۋ جانە الەۋمەتتىك قىزمەتتەر پورتالىن دامىتۋ جونىندەگى جۇمىس جالعاسادى, – دەدى مينيستر.
كوپشىلىكتى قىزىقتىرعان ماسەلەنىڭ ءبىرى – زەينەتاقىمەن قامتاماسىز ەتۋ. ءمينيستردىڭ ايتۋىنا قاراعاندا, كەلەسى جىلدىڭ 1 قاڭتارىنان باستاپ بازالىق زەينەتاقىنىڭ ەڭ تومەنگى جانە ەڭ جوعارى مولشەرلەمەلەرىن كەزەڭ-كەزەڭىمەن ارتتىرۋ باستالادى. بۇل ورايدا جىلدىق ءوسىم شامامەن 13 پايىزدى قۇرايتىنىن ايتا كەتكەن ءجون. سونىمەن قاتار ىنتىماقتى زەينەتاقىنى ەسەپتەۋ ءۇشىن ەڭ جوعارى تابىس مولشەرى 46-دان 55 ايلىق ەسەپتىك كورسەتكىشكە دەيىن ۇلعايتىلماق. قولعا الىنىپ جاتقان جاڭا ءىس-شارالار پاكەتى 2025 جىلعا قاراي جيىنتىق زەينەتاقىنى ورتا ەسەپپەن 27 پايىزعا ارتتىرۋعا مۇمكىندىك بەرەدى.
جۇرتشىلىقپەن جۇزدەسۋدەن كەيىن مينيستر باق وكىلدەرىمەن كەزدەسىپ, رەسمي ساپارى جايىندا, الداعى ۋاقىتتا اتقارىلاتىن قىرۋار جۇمىستىڭ ءمان-مازمۇنىن قاۋزاپ سۇحبات وتكىزدى.
مينيستر جۇمىس ساپارى بارىسىندا وڭىردەگى بەلسەندى جاستار مەن ەرىكتىلەرمەن دە كەزدەسۋ وتكىزدى. جاس مامانداردى جۇمىسپەن قامتۋ جايىن جانە قولداۋدىڭ كەيبىر تۇرلەرى تۋرالى تارقاتىپ ايتىپ ءتۇسىندىردى. ماسەلەن, بەلسەندى جاستارعا ەڭبەك مينيسترلىگى جۇمىس كۇشىنىڭ كاسىبي داعدىلارىن كۇشەيتۋ زاڭنامالىق بەكىتۋمەن رەتتەۋ, جۇمىسپەن قامتۋ ورتالىقتارىن الداعى ۋاقىتتا مانساپ ورتالىقتارىنا اينالدىرۋدى, سونداي-اق بارلىق قىزمەتتى اۋقىمدى تسيفرلاندىرۋدى كوزدەيتىن جۇمىسپەن قامتۋ سالاسىنداعى جاڭا ساياسات ازىرلەنگەنى جونىندە تەرەڭىرەك توقتالدى. ونىڭ ايتۋىنشا, الداعى ۋاقىتتا جاستاردى جۇمىسپەن قامتۋ ماسەلەسىنە ايرىقشا نازار اۋدارىلماق.
– ءار جىل سايىن «جاستار پراكتيكاسى», «العاشقى جۇمىس ورنى», «ديپلوممەن – اۋىلعا!» ءتارىزدى جوبالاردى ىسكە اسىرۋ شەڭبەرىندە وسى ءوڭىردىڭ 3,8 مىڭ ادامىن ناتيجەلى جۇمىسپەن قامتۋ جوسپارلانۋدا, – دەدى مينيستر.
ويعا العان شارۋا وڭىنان وڭعارىلسا, جاستار ناتيجەلى جۇمىسقا ورنالاسىپ, الەۋمەتتىك-تۇرمىستىق جاعدايىن جاقسارتىپ, ەل ىشىندەگى جۇمىسسىزدىقتىڭ قاتارى سەيىلە تۇسەر ەدى. ءمينيستردىڭ ايتۋىنا قاراعاندا, بيزنەستىڭ ۇلتتىق جوبالارى مەن جەكە باستامالارى شەڭبەرىندە قۇرىلاتىن بارلىق جۇمىس ورىندارى ەلەكتروندىق ەڭبەك بيرجاسىندا ورنالاستىرماق. بۇل جاي جۇمىس ىزدەگەن ادامنىڭ دا, جۇمىسشى ىزدەگەن جۇمىس بەرۋشىنىڭ دە بىرەگەي الاڭىنا اينالماق. شىن مانىندە ءتيىمدى ءتاسىل. ايتالىق قازىر ەلەكتروندىق ەڭبەك بيرجاسىندا 110 مىڭنان اسا بوس جۇمىس ورنى تۋرالى اقپارات تۇر. سونداي-اق جۇمىس ىزدەۋشىلەردەن 138 مىڭنان اسا تۇيىندەمە ۇسىنىلعان. دەمەك الداعى ۋاقىتتا بۇرىنعىداي جۇمىس ىزدەۋشىلەر تابانىنان تاۋسىلىپ بوس جۇمىس ورنىن ىزدەمەيتىن بولادى. ەلەكتروندى ەڭبەك بيرجاسى ارقىلى ونلاين كۋرستاردان ءوتىپ, جاڭا كاسىبي داعدىلاردى دا ۇيرەنۋگە بولادى ەكەن. سايىپ كەلگەندە بۇل دا زور مۇمكىندىك.
كەزدەسۋ بارىسىندا مينيستر ءوڭىردىڭ بەلسەندى جاستارى قويعان بارلىق سۇراققا تۇشىمدى جاۋاپ بەردى. تۇستەن كەيىن مينيستر وبلىس ورتالىعىنداعى ساۋىقتىرۋ ورتالىعىندا جانە كاسىبي-تەحنيكالىق ءبىلىم بەرەتىن وقۋ ورىندارىندا بولدى.
كوكشەتاۋ
