«سامۇرىق-قازىنا» ۇلتتىق ءال-اۋقات قورى» اق باسقارما توراعاسى الماسادام ساتقاليەۆتىڭ ايتۋىنشا, IPO-عا شىعارىلايىن دەپ وتىرعان اكتسيا, كومپانيانىڭ بۇكىل اكتسياسىنىڭ 5 پايىزىن قۇرايدى.
«قالعان اكتسيالار قازىرگى ۋاقىتتا قازاقستان ۇلتتىق بانكىنە تيەسىلى. وسىلايشا, IPO-نىڭ ناتيجەلەرى بويىنشا قور كەم دەگەندە 85 پايىز اكتسيالارعا يەلىك ەتۋدى جالعاستىرادى. ۇسىنىستىڭ شەڭبەرىندە ءبىر اكتسيانىڭ باعاسى شامامەن 5,1 تلرن تەڭگە مولشەرىندە كاپيتالداندىرۋدى بولجاي وتىرىپ, ءبىر اكتسيا ءۇشىن 8 406 تەڭگەنى قۇرايدى. ينۆەستورلاردىڭ وتىنىمدەرىن قابىلداۋ 2022 جىلدىڭ 9 قاراشاسىندا باستالىپ, ينستيتۋتسيونالدىق ينۆەستورلار ءۇشىن 2022 جىلدىڭ 30 قاراشاسىندا, ال بولشەك ينۆەستورلار ءۇشىن 2022 جىلدىڭ 2 جەلتوقسانىندا اياقتالادى», دەدى قور توراعاسى.
«قازمۇنايگاز» ۇلتتىق كومپانياسىنىڭ باسقارما توراعاسى ماعزۇم مىرزاعاليەۆ كومپانيانىڭ جەتىستىكتەرىن ايتا كەلە, قاي تۇرعىدان العاندا دا IPO-عا شىعۋعا لايىقپىز دەگەن ەمەۋرىندى جەتكىزدى.
«قازمۇنايگاز» كومىرسۋتەكتەردى بارلاۋ مەن وندىرۋدەن باستاپ تاسىمالداۋعا, وڭدەۋگە جانە سەرۆيستىك قىزمەتتەر كورسەتۋگە دەيىنگى بارلىق وندىرىستىك تسيكل بويىنشا اكتيۆتەردى باسقارادى, سونداي-اق مۇناي-گاز سالاسىنداعى مەملەكەتتىك ساياساتتى ازىرلەۋگە جانە ىسكە اسىرۋعا قاتىسادى. كومپانيا ەلدەگى مۇناي مەن گاز كوندەنساتىن وندىرۋدە 25 پايىز, تاسىمالداۋدا 56 پايىز جانە مۇناي وڭدەۋدە 82 پايىزدى قامتيدى. شوعىرلاندىرىلعان اكتيۆتەرىمىز 15 ترلن تەڭگەدەن استى. بيىل «قازمۇنايگازدىڭ» قۇرىلعانىنا 20 جىل تولدى. قازىردىڭ وزىندە كومپانيا كورپوراتيۆتىك باسقارۋ مەن اشىقتىقتىڭ ەڭ جوعارى ستاندارتتارىنا سايكەس كەلەدى. ءوزىنىڭ ەۋرووبليگاتسيالارىنىڭ شىعارىلىمدارى ارقىلى حالىقارالىق جانە قازاقستاندىق باعالى قاعازدار نارىقتارىندا كەڭىنەن تانىمال. ۇكىمەت پەن قوردىڭ «قازمۇنايگاز» اكتسيالارىنىڭ ءبىر بولىگىن ەركىن نارىقتا ساتۋ تۋرالى شەشىمى الەۋەتتى ينۆەستورلارعا كومپانيانىڭ اكتسيالارىن ساتىپ الۋعا مۇمكىندىك بەرەدى, قازاقستانداعى باعالى قاعازدار جانە قور بيرجالارى نارىعىنىڭ دامۋىنا ىقپال ەتەدى. ءبىز ءوز تاراپىمىزدان ينۆەستورلارىمىز ءۇشىن تارتىمدى بولۋى جانە ولاردىڭ ينۆەستيتسيالىق پورتفەلدەرىندە لايىقتى ورىن الۋى ءۇشىن بار كۇشىمىزدى سالامىز», دەدى كومپانيا باسشىسى.
جوسپارلانىپ وتىرعان IPO ۇكىمەت بەكىتكەن جەكەشەلەندىرۋدىڭ 2021-2025 جىلدارعا ارنالعان كەشەندى جوسپارىن ىسكە اسىرۋ اياسىندا وتكىزىلەدى. قور AIX جانە KASE قاعيدالارى مەن ەرەجەلەرىنە سايكەس قازاقستاندىق جانە حالىقارالىق بولشەك جانە ينستيتۋتسيونالدىق ينۆەستورلارعا AIX قازاقستاندىق الاڭدارىندا جانە قازاقستاندىق قور بيرجاسىندا (KASE) اكتسيالار ۇسىنۋعا نيەتتى.
«KMG» ساۋدا كودى (تيكەرى) بار AIX-ءتىڭ رەسمي تىزىمىنە اكتسيالار 2022 جىلعى 7 جەلتوقساندا ەنگىزىلەدى, ال AIX-تە ساۋدا-ساتتىققا رۇقسات 2022 جىلعى 8 جەلتوقساننان باستاپ بەرىلمەك. «قازمۇنايگازدىڭ» جاي اكتسيالارى «KMGZ» ساۋدا كودى بار KASE ليستينگىنە ەنگىزىلگەن.
ينۆەستورلاردىڭ وتىنىمدەرىن قابىلداۋ 2022 جىلعى 9 قاراشادا ساعات 12:00-دە باستالادى جانە ينستيتۋتسيونالدىق ينۆەستورلار ءۇشىن 2022 جىلعى 30 قاراشادا ساعات 18:00-دە, ال بولشەك ينۆەستورلار ءۇشىن 2022 جىلعى 2 جەلتوقساندا ساعات 15:00-دە اياقتالادى.
