قورعانىس مينيسترلىگى 2011 جىلدان بەرى قارۋلى كۇشتەردىڭ ساپالى وفيتسەرلەر كورپۋسىن قالىپتاستىرۋ جونىندەگى باعدارلاماعا سايكەس, جوعارى وقۋ ورىندارى تۇلەكتەرىنىڭ تاعدىرىن ءجىتى قاداعالاپ وتىرادى. بۇل جولعى كەزدەسۋگە 2020 جىلى اسكەري ينستيتۋتتى بىتىرگەن, قىزمەتتە جەتىستىككە جەتكەن جانە جوعارى لاۋازىمدارعا تاعايىندالعان 12 وفيتسەر شاقىرىلدى.
ينستيتۋتتان سوڭ ولار ءتۇرلى لاۋازىمدار اتقارا ءجۇرىپ, تالىمگەرلەرىنىڭ سەنىمىنەن شىعا بىلگەنىن ايتا كەتۋ كەرەك. جينالعاندارعا جاس وفيتسەرلەردىڭ قىزمەتتەگى جەتىستىكتەرى تۋرالى بەينەروليكتەر كورسەتىلدى.
– بۇگىن ءبىز اسكەري وقۋ ورنىنىڭ ۇزدىك تۇلەكتەرىنە قۇرمەت كورسەتىپ وتىرمىز. بۇل – مەن ءۇشىن ۇلكەن ماقتانىش. وسىدان قىرىق جىل بۇرىن سىزدەر سەكىلدى مەن دە الماتى جوعارى جالپى اسكەري كوماندالىق ۋچيليششەسىنە وقۋعا ءتۇسىپ, كوپتەگەن وفيتسەر سياقتى 1987 جىلى ءبىتىرىپ شىقتىم. ومىردە اۆوكۋ تۇلەگى دەگەن ابىرويلى اتاقتى لايىقتى الىپ ءجۇرمىز, – دەدى گەنەرال-پولكوۆنيك رۋسلان جاقسىلىقوۆ.
ۆەدومستۆو باسشىسى سونداي-اق مادەنيەتى جوعارى, ۇيىمداستىرۋشىلىق قابىلەتكە يە ۇزدىك تۇلەكتەر ءوز ءىسىنىڭ ناعىز كاسىپقويلارى ەلىمىزدىڭ قارۋلى كۇشتەرىندە جۇرگىزىلىپ جاتقان رەفورمالاردىڭ لوكوموتيۆىنە اينالاتىنىن اتاپ ءوتتى.
– قازاقستان ارمياسىنىڭ بولاشاعى سىزدەر. سول سەبەپتى قارۋلى كۇشتەردى ودان ءارى دامىتۋ, مەملەكەتتىڭ تۇراقتىلىعى مەن قاۋىپسىزدىگىنە كەپىلى بولارلىق اسكەري ءبىلىمنىڭ بارلىق سپەكترىنە يە بولۋلارىڭىز كەرەك, – دەدى قورعانىس ۆەدومستۆوسىنىڭ باسشىسى جاس وفيتسەرلەرگە.
كەزدەسۋدە قۇرلىق اسكەرلەرى اسكەري ينستيتۋتىنىڭ تۇلەگى اعا لەيتەنانت تەمىرلان داۋرەنبەك ۇلى ءسوز سويلەدى. ول وزدەرىنە جان-جاقتى ءبىلىم بەرگەن وقىتۋشىلار قۇرامى مەن كومانديرلەرگە العىسىن ءبىلدىرىپ, قورعانىس مينيسترىنە جاس وفيتسەرلەردىڭ جاۋىنگەرلىك تاپسىرمالاردى ورىنداۋعا دايىن ەكەنىن جانە قۇرلىق اسكەرلەرى اسكەري ينستيتۋتىنىڭ تۇلەگى اتاعىن لايىقتى الىپ جۇرۋگە بار كۇشىن سالاتىنىن جەتكىزدى.
جيىندا اسكەري وقۋ ورنىنىڭ تۇلەگى اعا لەيتەنانت دياس نۇريامەننىڭ اناسى اسەم بالاپانوۆا ءسوز الىپ, ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ ۇجىمىنا ريزاشىلىعىن ءبىلدىردى.
– مەنىڭ ۇلىم 2020 جىلى ينستيتۋتتى قىزىل ديپلوممەن ءبىتىردى. مەن ونىڭ قارۋلى كۇشتەر قاتارىندا قىزمەت اتقاراتىنىن ماقتان تۇتامىن. وتان قورعاۋ وڭاي جۇمىس ەمەس. اشىق اسپان استىنداعى بەيبىت ەلىمىز گۇلدەنە بەرسىن, – دەگەن اسەم بالاپانوۆا بارلىق انالارعا اق تىلەگىن جەتكىزدى.
جاس كومانديرلەر «قازاقستان رەسپۋبليكاسىنىڭ قارۋلى كۇشتەرىنە 30 جىل» ەستەلىك بەلگىسىمەن ماراپاتتالىپ, ولارعا ارميانىڭ قۇرىلۋى مەن قالىپتاسۋى تۋرالى كىتاپ تاپسىرىلدى.
