ادەتتەگىدەي جىلىتۋ ماۋسىمى باستالىسىمەن گاز سالاسى ماماندارىنىڭ جۇمىسى دا كوبەيەدى. ويتكەنى جەكە سەكتوردىڭ تۇرعىندارى گازدى تۇتىنۋ ەرەجەلەرىن دۇرىس ساقتامايدى. ماسەلەن, كوپ جاعدايدا گاز پەشى مۇرجاسىنىڭ جاعدايىنا ءمان بەرمەيدى. تازالانباعان مۇرجا بىتەلىپ قالىپ, جانعان گازدىڭ كوزگە كورىنبەيتىن, ءيىسى سەزىلمەيتىن ءتۇتىنى ءۇي ىشىنە جايىلادى. ال ونىڭ سوڭى جازاتايىم وقيعالارعا دۋشار ەتەرى داۋسىز. سوندىقتان «قازترانگاز ايماق» وندىرىستىك فيليالىنىڭ ماماندارى قاۋىپتىڭ الدىن الۋ جۇمىستارىن قارقىندى جۇرگىزىپ جاتىر.
مامانداردىڭ ايتۋىنشا, ۇيلەردىڭ بىرىندە مۇرجا بىتەلگەن بولسا, ەندى بىرىندە پەشتىڭ اقاۋى انىقتالىپ جاتادى. مۇنى تۇرعىنداردىڭ وزدەرى دە مويىنداپ وتىر. سوندىقتان ولار دا سالا ماماندارىنىڭ كومەگىنە جۇگىنگەندى ءجون سانايدى.
«جۇمىستى ونىڭ قىر-سىرىن بىلەتىن ارنايى ماماندار اتقارعانى دۇرىس. ءوزىمىزدىڭ قولىمىزدان كەلمەيدى. ءوز بەتىمىزشە ىستەگەن كۇننىڭ وزىندە ءتۇرلى ولقىلىقتار شىعىپ جاتادى. مۇنىڭ سوڭى جازاتايىم وقيعالارعا الىپ كەلەدى. ءوزىمىز كورىپ ءجۇرمىز, گاز سالاسىنىڭ ماماندارى تۇرعىندارعا گازدى تۇتىنۋدىڭ نەگىزگى تالاپتارىن تۇسىندىرەدى, ەسكەرتۋ جاسايدى. وسىدان ناتيجە شىعارا ءبىلۋىمىز كەرەك. كەمشىلىكتەر, نەگىزىنەن, مۇرجا مەن جەلدەتۋ ارناسىندا كەزدەسەتىنىن دە جاقسى بىلەمىز. ءبىز جىل سايىن ماماندارمەن ارنايى كەلسىمشارتقا وتىرامىز. سونىڭ ناتيجەسىندە ولار ورىن العان كەمشىلىكتەردى وزدەرى رەتتەيدى», دەيدى جەرگىلىكتى تۇرعىن نۇسىپقالي نۇرمەت ۇلى.
رەسمي دەرەككە نازار اۋدارساق, گازدى قولدانۋ تالاپتارىن ساقتاماۋ سالدارىنان بىلتىرعى جىلىتۋ ماۋسىمىندا 98 تۇرعىن ۋلانعان. بيىلعى جاعداي دا كوڭىل كونشىتىپ وتىرعان جوق. قازىردىڭ وزىندە 36 ادام گازدان ۋلانىپ, ونىڭ ىشىندە ەكەۋى باقيلىق بولعان. سوندىقتان گاز سالاسىنىڭ ماماندارى: «تۇرعىندار قاۋىپسىزدىككە باسا ءمان بەرسە ەكەن», دەگەن تىلەكتەرىن جەتكىزدى.
«گازدىڭ ءيىسى سەزىلگەن جاعدايدا تۇرعىنداردىڭ ەڭ ءبىرىنشى مىندەتى – 104 ءنومىرى ارقىلى ۇزدىكسىز قىزمەت ىستەيتىن مەكەمەگە حابارلاسۋ. سونداي-اق ءۇيدىڭ ەسىك-تەرەزەلەرىن اشىپ, جەلدەتۋ قاجەت. نەگىزى, الدىن الۋ شارالارى بويىنشا ءاربىر ۇيگە گاز ءيىسىن انىقتايتىن قۇرال ورناتىلۋى كەرەك», دەيدى «قازترانسگاز ايماق» اق جامبىل وندىرىستىك فيليالى اپاتتىق ديسپەتچەرلىك قىزمەتىنىڭ باسشىسى ءاليايدار جاڭابەكوۆ.
«قازترانسگاز ايماق» فيليالىنىڭ قىزمەتكەرلەرى تۇرعىنداردى اقپاراتتاندىرۋ, ولاردىڭ اراسىندا ءتۇسىندىرۋ جۇمىستارىن جۇيەلى تۇردە جۇرگىزىپ كەلەدى. ماسەلەن, بىلتىر 200 مىڭنان اسا تۇسىندىرمە پاراعىن تاراتىپ, الەۋمەتتىك جەلى مەن وبلىستىق تەلەارنالارعا قاۋىپسىزدىكتى ساقتاۋ تۋرالى بەينەروليكتەر شىعارعان. جالپى, وڭىردە 220 مىڭنان اسا ابونەنت «كوگىلدىر وتىندى» قولدانادى. سالا ماماندارى تۇتىنۋشىلارعا وزدەرىنىڭ قاۋىپسىزدىگى ءۇشىن مامانداندىرىلعان ۇيىمدارمەن كەلىسىمشارت جاساۋدى ۇسىنادى. ياعني ۇيدەگى گاز جابدىقتارىنا تەحنيكالىق قىزمەت كورسەتۋدى بىلىكتى مامانعا سەنىپ تاپسىرعان ءجون.
