ەلىمىز ەكونوميكالىق ينتەگراتسياعا ءتۇسۋ جولىنىڭ باستاۋىندا تۇر

استانا. 28 مامىر. بۇگىن استانادا «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتتىڭ پروفەسسورلىق-وقىتۋشىلىق قۇرامىمەن جانە ستۋدەنتتەرمەن كەزدەستى. بۇل تۋرالى «قازاقپارات» حابارلادى. كەزدەسۋدە ەۋرازيالىق ەكونوميكالىق وداقتىڭ قۇرىلۋى تۋرالى جانە ەلىمىزدىڭ بولاشاق دامۋىنىڭ الەۋەتى تالقىلاندى. باۋىرجان بايبەك: «مەنىڭشە, ەۋرازيالىق ەكونوميكالىق وداقتى قۇرۋ تۋرالى تاريحي شەشىمنىڭ قارساڭىندا ەكونوميكالىق ىقپالداستىقتىڭ مۇمكىندىكتەرى مەن كەلەشەگى توڭىرەگىندە تالقىلاۋلار جۇرگىزۋ ماڭىزدى. ەكونوميكالىق ىقپالداستىققا ءتۇسۋ بارىسىندا ءبىز بۇل تەك جولدىڭ باستاپقى كەزەڭى عانا ەكەنىن ءتۇسىنۋىمىز كەرەك», – دەدى. جيىندا ب.بايبەك مەملەكەت باسشىسى نۇرسۇلتان نازارباەۆتىڭ وسىدان 20 جىل بۇرىن اتاپ وتكەن ەكونوميكالىق ينتەگراتسيانىڭ نەگىزگى پرينتسيپتەرىنە دە توقتالدى. «نۇر وتان» پارتياسى توراعاسىنىڭ ءبىرىنشى ورىنباسارى: «سول كەزدە ءبىزدىڭ مەملەكەت  باسشىسى ايتقان كوپتەگەن ماسەلەلەردى كوپشىلىك جەتەسىنە جەتىپ,  تۇسىنگەن جوق. ەلباسى سول كەزدە ىقپالداستىقتىڭ ءتورت باسىم باعىتىن اتاپ ءوتتى. بىرىنشىدەن, ول – پراگماتيزم. مەملەكەت پەن حالىقتىڭ مۇددەلەرىن ەسكەرۋ ارقىلى تەك قانا ەكونوميكالىق بايلانىستاردى دامىتۋ.  ەكىنشىدەن, مەملەكەت باسشىسى كوپدەڭگەيلى, كوپجىلدامدىقتى ينتەگراتسيانى ءسوز ەتتى. ۇشىنشىدەن, ىقپالداستىق ەرىكتى, اشىق جانە تەڭقۇقىلى بولۋى ءتيىس دەدى. تورتىنشىگە ايماقتىق قاۋىپسىزدىكتى جاتقىزدى.  بۇگىن الەمدە ءتۇرلى قاۋىپ-قاتەرلەر كوپ. بىرلەسە ءجۇرىپ, دامىعان ماڭىزدى. مىنا باسەكەگە جانە تارتىسقا تولى دۇنيەدە جالعىز ءجۇرۋ قيىن», – دەدى. الداعى ۋاقىتتا وسىنداي جيىندار رەسپۋبليكانىڭ بارلىق جوعارى وقۋ ورىندارىندا وتەدى دەپ كۇتىلۋدە. جولدىباي بازار. دەرەككوز: «قازاقپارات». فوتو: primeminister.kz.