جالپى, سايلاۋ دەسە جۇرتشىلىقتىڭ ەلەڭ ەتە قالاتىنى راس. داۋىس بەرۋگە بارماعانداردىڭ ءوزى «كىم جەڭىسكە جەتتى ەكەن؟» دەپ سايلاۋدىڭ قورىتىندىسىن بىلۋگە اسىعادى. «مەنىڭ داۋىسىم نە شەشەدى؟» دەگەندەردىڭ ءۇيدىڭ سىرتىندا ساياسات جايلى سايراي جونەلەتىنىن تالاي كوردىك. سايىپ كەلگەندە, ەلدىڭ تاعدىرى شەشىلەتىن ماڭىزدى ناۋقان تۋرالى ءار تۇرعىننىڭ وزىندىك پىكىرى بار. ەندىگى جەردە سايلاۋشىلاردىڭ بەلسەندىلىگىن ارتتىرىپ, باياندى بولاشاققا دەگەن سەنىمدى قالىپتاستىرۋ ماڭىزدى.
بۇل ماسەلەنى مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا كوتەرىپ, سايلاۋ جۇيەسىن جاڭعىرتۋدى تاپسىرعان بولاتىن. سەبەبى كوپشىلىك دەپۋتاتتارعا سەنۋ بىلاي تۇرسىن, كوپشىلىگىن تانىمايدى دا. ءماجىلىس دەپۋتاتتارى ءوز الدىنا, جەرگىلىكتى اتقارۋشى بيلىك تۇرعىندارمەن دۇرىس بايلانىس ورناتپاعان. سونىڭ سالدارىنان حالىق سايلاۋعا سەلقوس قارايدى. ءار داۋىستىڭ ماڭىزدى ەكەنىنە سەنبەيدى. وسىنداي ولقىلىقتان كەيىن پرەزيدەنت ارالاس سايلاۋ جۇيەسىنە كوشۋدى ۇسىنعان بولاتىن. «سايلاۋدىڭ وسى تاسىلىنە ورالۋ ءبىز ءۇشىن وتە ماڭىزدى. بۇل قادام – پارتيالاردىڭ ءماجىلىس پەن ماسليحاتقا ءوتۋ شەگىن تومەندەتۋ ءۇشىن وسىعان دەيىن قابىلدانعان شەشىمنىڭ زاڭدى جالعاسى. بۇدان بىلاي ماجوريتارلىق جۇيە بويىنشا ءاربىر ايماق پارلامەنتتىڭ تومەنگى پالاتاسىنا ءوزىنىڭ كەمىندە ءبىر دەپۋتاتىن سايلاي الادى. جاڭا ۇلگى كوزقاراسى ءارتۇرلى ازاماتتاردىڭ ماجىلىسكە كەلۋىنە مۇمكىندىك بەرەدى», دەگەن ەدى مەملەكەت باسشىسى.
وتكەن جىلى ەلىمىزدە تۇڭعىش رەت اۋىل اكىمدەرى تىكەلەي سايلانىپ, تۇرعىنداردىڭ بەلسەندىلىگىمەن ەستە قالعان ەدى. جاڭا فورماتتا ۇيىمداستىرىلعان ساياسي ناۋقان تيىمدىلىگىن دالەلدەدى. تاڭداۋ تۇرعىنداردىڭ وزىنە بەرىلسە, كەز كەلگەن تۇرعىن ءوز اۋىلىنىڭ بولاشاعىنا بەيجاي قارامايتىنىن اڭعاردىق. كوپشىلىكتىڭ كۇتكەنى دە سول. بۇعان دەيىن اۋىل اكىمىن حالىقتىڭ وكىلى بولىپ سانالاتىن جەرگىلىكتى ءماسليحات دەپۋتاتتارى سايلاسا, بۇدان بىلاي جۇرتشىلىق ەلگە باسشىلىق ەتۋگە لايىق ازاماتتى ءوزى تاڭدايدى. مۇنداي جۇيە داۋىس بەرۋشىلەرگە دە, اكىم كرەسلوسىنان ۇمىتكەرلەرگە دە تاڭسىق دۇنيە بولعانى راس. جاڭا ۇلگىدەگى اۋقىمدى رەفورما وتەدى دەگەننەن بەرى اتقارۋشى ورگاندار مەن كانديداتتاردىڭ الاڭداعانى ءوز الدىنا, تۇرعىندار دا كادىمگىدەي قوبالجىعان. ساراپشىلاردىڭ ايتۋىنشا, كەز كەلگەن جاڭا باستامادا قاتەلىك, جوباعا جاتسىنۋ بولادى. بىراق بۇل رەفورما دۇرىس ءارى دەر كەزىندە ىسكە استى. ۇتىمدى شەشىم! «حالىق ۇنىنە قۇلاق اساتىن مەملەكەت» تۇجىرىمداماسى وسىلاي جۇزەگە اسۋعا ءتيىس. بيلىك پەن قوعام اراسىندا ناتيجەلى ديالوگتىڭ باستالعانى قۋانتادى.
كەز كەلگەن سايلاۋ وتەتىنى الدىن الا بەلگىلى بولادى. ماڭىزدى ناۋقانعا دايىندىق جۇمىستارى ەرتە قولعا الىنادى. داۋىس بەرۋ كۇنى ۇيىمداستىرۋشىلار اق تەر, كوك تەر بولىپ جانتالاسىپ جۇرگەنى. مەملەكەتتىڭ بولاشاعىنا بەيجاي قارامايتىن تۇرعىندار دا تاڭنان تاڭداۋىن جاساپ, بەلسەندىلىك تانىتادى. ۇيىمداستىرۋ جۇمىستارى جان-جاقتى جۇرگىزىلىپ جاتىر. داۋىس بەرۋگە نيەت بولسا جەتكىلىكتى. دەنساۋلىق جاعدايىنا بايلانىستى ۋچاسكەگە كەلە المايتىن ازاماتتارعا ولاردىڭ ءوتىنىشى نەگىزىندە كوميسسيا مۇشەلەرى ۇيلەرىنە بارادى. ءتىپتى ۋاقىتشا ۇستاۋ يزولياتورلارىندا داۋىس بەرۋ ورنى قاراستىرىلعان. سوندا تەمىر توردىڭ ار جاعىنداعى ازاماتتىڭ ءوزى تاڭداۋ جاساپ جاتقاندا, تەپسە تەمىر ۇزەتىن ازاماتتىڭ داۋىس بەرۋدەن قالىس قالۋى قانشالىقتى اقىلعا سىيىمدى؟
قوعامداعى كەمشىلىك پەن ولقىلىق كوپتىڭ كومەگىمەن, تاڭداۋىمەن تۇزەلەدى ەمەس پە. قازاق ەلىنىڭ جاعدايىن سىرتتان كەلىپ بىرەۋلەر جوندەپ بەرمەيتىنى بەسەنەدەن بەلگىلى. ەلدىك ماسەلە دە كوپتىڭ ۇسىنىسىمەن, كەز كەلگەن دەڭگەيدەگى سايلاۋعا بارىپ, ءوز تاڭداۋىن جاساۋمەن شەشىلەتىنى انىق. دەموكراتيالىق سايلاۋ مەن ەلدىك ماسەلەنى ويلاۋ ءبىر-بىرىمەن تىعىز بايلانىستى. ەندەشە, سايلاۋدا داۋىس بەرۋ – ءار ازاماتتىڭ مىندەتى. ال ازاماتتارى نەمقۇرايدىلىق تانىتقان قوعامنىڭ تاسى ورگە دومالامايتىنى ايدان انىق. وسەتىن ەلدىڭ ازاماتتارى سايلاۋدا ءوز تاڭداۋىن جاسايتىنى ءسوزسىز.
