بايقاۋعا استانا, قاراعاندى, چەليابى قالالارى مەن قوستاناي وبلىسىنىڭ 16-35 جاس ارالىعىنداعى قىلقالام شەبەرلەرىنەن ۇزىن سانى 80-نەن استام تۋىندى كەلىپ ءتۇستى. قازىلار القاسى ولاردى «بەينەلەۋ ونەرى», «گرافيكا», ء«مۇسىن», «دەكوراتيۆتى-قولدانبالى قولونەر» دەپ اتالاتىن 4 اتالىم بويىنشا باعالادى.
– بيىلعى كونكۋرستا اكۆارەلمەن سالاتىن سۋرەتشىلەردىڭ, گرافيكتەر مەن دەكوراتيۆتى-قولدانبالى ونەر شەبەرلەرىنىڭ جۇمىستارى ەرەكشە. بايقاۋعا قاتىسۋشىلاردىڭ ىشىندە كاسىبي سۋرەتشىلەرمەن قاتار, اۋەسقوي جاستار دا بار. جۇمىستاردى باعالاۋ بارىسىندا قينالىڭقىراپ قالعان كەزدەرىمىز بولدى. سوندىقتان ۇيىمداستىرۋشىلارعا كونكۋرس بيۋدجەتىن ۇلعايتىپ, اۋەسقوي سۋرەتشىلەرگە ارنالعان جەكە اتالىم تاعايىنداۋ تۋرالى ءوتىنىش ايتتىق, – دەيدى قازىلار القاسىنىڭ مۇشەسى ءماريا جۇماعۇلوۆا.
وبلىستىق مادەنيەت باسقارماسىنىڭ باسشىسى ەرلان قالماقوۆتىڭ ايتۋىنشا, بايقاۋدىڭ مازمۇنىمەن قوسا, گەوگرافياسى دا جىل ساناپ كەڭىپ كەلەدى. كونكۋرسقا قاتىسۋشىلار اراسىنداعى باسەكە دە جوعارى. مىسالى, بيىلعى بايقاۋعا رەسەيدەن بىرنەشە قىلقالام شەبەرى ءوز جۇمىستارىن جىبەرگەن.
قازىلار القاسى «جاس تولقىن» بايقاۋىنىڭ گران-پري سىيلىعىنا استانا قالاسىنان كەلگەن دارىندى سۋرەتشى ايدانا ءمىنايداروۆانى لايىق دەپ ۇيعارىپتى. جاس قىلقالام شەبەرىنىڭ قولىنان قاعازعا تامعان اكۆارەل بوياۋلار راسىمەن دە ءسابيدىڭ جانارىنداعى ءموپ-ءمولدىر الەمنىڭ شىنايى بەينەسىندەي بولىپ تۇنا قالعان.
ليساكوۆ قالاسىنان كەلگەن كاسىبي سۋرەتشى يرينا كروپوتوۆا «گرافيكا» اتالىمى بويىنشا جەڭىمپاز اتاندى. ال 17 جاستاعى ۆيكتوريا بورودكينا «دەكوراتيۆتى-قولدانبالى ونەر» اتالىمى بويىنشا ءبىرىنشى ورىندى يەلەندى.
قازىلاردىڭ ايتۋىنشا, كونكۋرسقا قاتىسقان شەبەرلەردىڭ شىعارمالارىندا قاعاز ساز, كەندىر ءجىپ, كومىر, مونشاق, ءجۇن سياقتى نەشە ءتۇرلى دۇنيەلەر دە پايدالانىلعان. مىسالى, ء«مۇسىن» اتالىمى بويىنشا 34 جاستاعى مۇعالىم الەكسەي ماحوۆسكيدىڭ تۋىندىسى وزىق شىقتى. اۋەسقوي ءمۇسىنشى قاعاز سازدان جاسالعان كومپوزيتسيالىق تۋىندىسىنا انا مەن بالانىڭ اراسىنداعى سۇيىسپەنشىلىكتى ارقاۋ ەتكەن.
قاعاز ساز دەگەن كادىمگى دارەتحانا قاعازىن جەلىمگە, كۇنباعىس مايى مەن سۇيىق سابىنعا شىلاپ ءيى قانعان سوڭ, بىرنەشە ساعات توڭازىتقىشقا قويعاننان كەيىن الىناتىن ماتەريال ەكەن. جۇمساق كۇيىندە كادىمگى پلاستيلينگە, قاتتى كۇيدە گيپسكە ۇقسايدى. الەكسەي ماحوۆسكي سارىكول اۋدانىنا قاراستى ۆەسەلىي پودول اۋىلىنداعى مەكتەپتە مۇعالىم بولىپ جۇمىس ىستەيدى.
قوستاناي وبلىسى
