MNP (Mobile Number Portability) قىزمەتى قازاقستاندا 2016 جىلى ىسكە قوسىلدى. سول ۋاقىتتان بەرى بۇل قىزمەت وزەكتىلىگىن جوعالتقان جوق. 2016-2021 جىلدار اراسىندا وسى قىزمەت بويىنشا تۇسكەن ءوتىنىم سانى 129-148 مىڭ ارالىعىندا قۇبىلعان. اسىرەسە, رەكوردتى كورسەتكىش 2022 جىلى تىركەلگەن. جىل باسىنان بەرى 21 قازانعا دەيىنگى ارالىقتا قىزمەتتىڭ بۇل ءتۇرى 160,2 مىڭ رەت قولدانىلىپتى.
«بۇل رەتتە 85,4 مىڭ ابونەنت بىردەن Beeline-عا اۋىستى. 2021 جىلى دا Beeline ليدەر اتاندى – پورتاتسيا ۇلەسى 53 پايىزدى قۇرادى. 2022 جىلى شىلدەنىڭ باسىندا Beeline ابونەنتتىك بازا بويىنشا دا ليدەرلىكتى ساقتاپ قالدى. قازىر بۇل بايلانىس وپەراتورىنىڭ 10,3 ملن ابونەنتى بار. وتكەن جىلمەن سالىستىرعاندا ابونەنت سانى وسكەن (+6,6 پايىز). بۇل وپەراتور نارىقتىڭ 42 پايىزىن قالىپتاستىرىپ وتىر. ال Kcell ۇيالى بايلانىس وپەراتورىنىڭ ابونەنت سانى – 8 ملن نەمەسە نارىقتىڭ 32,6 پايىزى. ءوز كەزەگىندە تەلە2/Altel وپەراتورىنىڭ ابونەنت سانى 6,2 ملن-دى قۇرايدى», دەپ مالىمدەدى Finprom.
جالپى, 2022 جىلدىڭ قازانىنداعى دەرەك بويىنشا ەلدە 25,3 ملن ۇيالى بايلانىس ابونەنتى بار. بىلتىرمەن سالىستىرار بولساق, 4,5 پايىزعا كوپ. ايتا كەتۋ كەرەك, قازان ايىنداعى كۇرت ءوسىم الدىڭعى ءۇش جىلدىق قۇلدىراۋدان كەيىن بولىپ وتىر. ماسەلەن, بىلتىر وسىنداي كەزەڭدە ابونەنت سانى – 1,1 پايىزعا, 2020 جىلى – 5,3 پايىزعا, 2019 جىلى 2,6 پايىزعا قىسقارعان ەدى.
راسىن ايتساق, ۇيالى بايلانىس سەكتورى ينتەرنەتتىڭ كەلۋى جانە ونىڭ قولجەتىمدىلىگىنىڭ ارتۋى ارقىلى تسيفرلىق قىزمەتتەردى دامىتۋدىڭ درايۆەرىنە اينالا باستادى. ال تەلەفون ءنومىرىن اۋىستىرعاننان كەيىن دە بايىرعى وپەراتوردى ساقتاپ قالۋ قىزمەتى بۇل نارىقتى ودان ءارى اشىق جانە باسەكەگە قابىلەتتى ەتە تۇسپەك.
