ورتالىق ازياداعى ەڭ ءىرى حالىقارالىق IT-ستارتاپتار تەحنوپاركى سانالاتىن Astana Hub پەن TikTok قىسقا بەينەروليكتەر جاساۋعا ارنالعان جەتەكشى پلاتفورما Digital Bridge 2022 شەڭبەرىندە ىنتىماقتاستىق تۋرالى مەموراندۋمعا قول قويدى. ىلە ولار TikTok Startup اكادەمياسى ستارتاپتارى ءۇشىن ەكسكليۋزيۆتى ءبىلىم بەرۋ باعدارلاماسىن ىسكە قوستى. پلاتفورما مەن تەحنوپاركتى يننوۆاتسياعا جانە بيزنەسكە كومەكتەسۋگە دەگەن ۇمتىلىس بىرىكتىرىپ وتىر. اكادەميانىڭ مىندەتى – ستارتاپتارعا جاڭا ءوسۋ نۇكتەلەرىن تابۋعا, ساراپشىلاردان بىرەگەي ءبىلىم الۋعا جانە TikTok پلاتفورماسىنىڭ مۇمكىندىكتەرىن اشۋعا كومەكتەسۋ.
باعدارلاماعا قاتىسۋعا Fintech, E-com, Games&Apps, Foodtech, Edtech, Entertainment, Health&Wellness جانە باسقا دا سالالاردان تەحنولوگيالىق ستارتاپتاردىڭ وكىلدەرى شاقىرىلدى. وتىنىمدەردى قابىلداۋ قازان ايىنىڭ سوڭىندا اشىلدى جانە ىرىكتەۋ ناتيجەسىندە 218 ستارتاپ ءبىلىم بەرۋ كۋرسىنا قول جەتكىزە الادى. ۆەبينارلار 31 قازاننان باستاپ ءوتىپ جاتىر. ال ەمتيحاندى ءساتتى تاپسىرعان العاشقى جيىرما قاتىسۋشى 9 جانە 10 قاراشادا استاناداعى وفلاين-ۆوركشوپتارعا بارادى.
– ءبىلىم باعدارلاماسى – Digital Bridge 2022 فورۋمى اياسىندا قول قويىلعان Astana Hub پەن TikTok اراسىنداعى ىنتىماقتاستىق تۋرالى مەموراندۋمنىڭ جەمىسى. باعدارلاماعا قاتىسۋشىلاردىڭ اراسىندا Documentolog, Mitwork, Aviata, EasyTap, iDos Games سياقتى كوماندالار, سونداي-اق جاڭا باستاپ جاتقان جانە تاجىريبەلى بىرقاتار وتاندىق ستارتاپ بار. بۇل ورايدا نارىقتىڭ TikTok پلاتفورماسىنداعى ماركەتينگ بەلسەندىلىگىن دامىتۋعا ۇمتىلىپ جاتقانىن كورۋگە بولادى. Astana Hub پەن TikTok سەرىكتەستىگى قازاقستاندىق ءىت-ەكوجۇيەنى تانىتۋعا ۇلەس قوسىپ, ەلىمىزگە ءىت-كومپانيالاردى تارتۋعا جاعداي جاسايدى دەگەن ۇمىتتەمىن, – دەيدى Astana Hub باس ديرەكتورى ماعجان ماديەۆ.
TikTok-تىڭ شىعىس ەۋروپاداعى باس ديرەكتورى اناستاسيا پانينا اتاپ وتكەندەي, TikTok StartUp اكادەمياسى اياسىندا كاسىپكەرلەرگە جاڭا ءبىلىم الۋعا جانە TikTok پەن Astana Hub ۇزدىك ساراپشىلارىنىڭ تالىمگەرلىگىمەن جاڭا بيىكتەرگە جەتۋگە جول اشىلماق. ال ۇزدىك قاتىسۋشىلارعا ارنالعان گرانتتار ولارعا وزدەرىنىڭ يدەيالارىن ىسكە اسىرۋعا مۇمكىندىك بەرەدى.
اكادەميانىڭ بارلىق ستارتاپ ستۋدەنتتەرى ءبىرشاما يگىلىككە قول جەتكىزە الادى. ماسەلەن, ارتىقشىلىقتىڭ ءبىرى – TikTok for Business كومانداسىنىڭ مەنتورشيپى. وندا ناۋقاندى نولدەن باستاپ تولىق پىسىقتاۋ كىرەدى. بىرەگەي ءبىلىم بەرۋ مازمۇنى, جەتەكشى بەينە پلاتفورمانىڭ ساراپتاماسى جانە ءتيىمدى ناۋقانداردى قالاي باستاۋ كەرەگىن ۇيرەنۋ مۇمكىندىگى ۇسىنىلادى. ساراپشىلار چات ارقىلى قولداۋ كورسەتىپ وتىرادى.
وقىتۋ قورىتىندىسى بويىنشا ۇزدىك جوبالار TikTok-تا 10 مىڭ دوللارعا دەيىن تانىمال بولۋ گرانتتارىن الادى. ولار بۇل سىيلىعىن TikTok-تاعى ماركەتينگتىك ناۋقاندارعا جۇمساي الادى. ەسكە سالا كەتەيىك, TikTok دەگەنىمىز – قىسقا بەينەلەر جاساۋعا ارنالعان جەتەكشى قوسىمشا. ال Astana Hub – قازاقستاندىق جانە شەتەلدىك ءىت-كومپانيالاردىڭ دامۋىنا جاعداي جاساپ وتىرعان حالىقارالىق ءىت-ستارتاپتار تەحنوپاركى.
