«وبلىستاعى ءتۋريزمدى دامىتۋ – ماڭىزدى مىندەتتىڭ ءبىرى. ارينە, اتىراۋ مۇنايىمەن ايگىلى. بىراق, مۇندا تۋريستەردىڭ قىزىعۋشىلىعىن تۋعىزاتىن باسقا دا رۋحاني قۇندىلىقتار بار. ونى بۇكىل قازاقستاننىڭ برەندىنە اينالدىرۋعا بولادى», دەدى پرەزيدەنت.
ق.توقاەۆ ولكەنىڭ تاريحي-مادەني مۇرالارىنا ايرىقشا ءمان بەرۋدى, سونىڭ ىشىندە سارايشىقتى ەل ىشىندە جانە شەت مەملەكەتتەردە دارىپتەۋگە بولاتىنىن, «ورتا عاسىرلىق سارايشىق» جوباسىن سوڭىنا دەيىن جەتكىزۋ كەرەك ەكەنىن اتاپ ءوتتى.
سونداي-اق, ارنايى ۆيزيت-ورتالىقتى ۋاقىتىلى ىسكە قوسۋ ماڭىزى جايلى ايتتى. كونە قالانىڭ ورنىن تۋريستىك نىسان رەتىندە دامىتۋعا جانە ونىڭ تانىمالدىعىن ارتتىرۋعا ارنالعان تۇجىرىمداما ازىرلەۋ قاجەتتىگىن دە ايتتى. .
پرەزيدەنت مادەني تۋريزم سالاسىن تسيفرلاندىرۋعا باسا ءمان بەرۋدى ۇسىندى.
«تۋريستىك نىساندارىمىزدى الەمدىك ستاندارتقا جاقىنداتا بەرۋىمىز كەرەك. بۇل جاقتا ەكولوگيالىق جانە تانىمدىق ءتۋريزمدى دامىتۋعا مول مۇمكىندىكتەر بار. قيعاش وزەنىنىڭ بويىندا لوتوس گۇلدەرى وسەتىنىن, وكىنىشكە وراي, كوبى بىلە بەرمەيدى. بۇل جەر – لوتوستىڭ ەڭ قيىر سولتۇستىكتەگى مەكەنى. ءوزىمىزدىڭ قىزعالداق سياقتى لوتوس القابىن دا تانىمال ەتۋ ءۇشىن ناقتى شارالار قابىلداعان ءجون. وسىنداي تاڭعاجايىپ دۇنيە تۋرالى فيلمدەر ءتۇسىرۋ كەرەك, ولاردى شەتەلدە بەلسەندى تۇردە دارىپتەۋىمىز كەرەك», دەدى توقاەۆ.
سونداي-اق ەل پرەزيدەنتى يندەردەگى تۇزدى كول تۋرالى دا پىكىر ءبىلدىردى. بۇل كول ەمدەۋ-ساۋىقتىرۋ ءتۋريزمىن دامىتۋعا بىردەن ءبىر لايىق مەكەن ەكەنىن ايتىپ, ءتيىستى مەملەكەتتىك ورگانعا كولدىڭ مارتەبەسىن ايقىنداۋدى تاپسىردى.
«جالپى, اتىراۋ مۇناي مەن گازعا عانا ءۇمىت ارتپاي, تۋريزم سەكىلدى بولاشاعى زور سالانى دامىتۋ كەرەك. ەڭ باستىسى, باستامالار باتىل قولعا الىنسىن. ءوڭىردىڭ تۋريستىك الەۋەتىن ارتتىرۋ ءۇشىن ۇكىمەت پەن اكىمدىك جولداردى جوندەپ, تۋريستىك نىسانداردىڭ ينجەنەرلىك كوممۋنيكاتسياسىن رەتكە كەلتىرۋى ءتيىس», دەدى قاسىم-جومارت توقاەۆ.
اتالعان تاپسىرمالار بويىنشا, جۇمىس بارىسى تىكەلەي پرەزيدەنت باقىلاۋىندا بولادى.
«اتىراۋ وبلىسىن دامىتۋ تۋرالى مەنىڭ پايىمدارىم – وسىنداي. بىرقاتار ناقتى تاپسىرما بەرىلدى. ونىڭ ءبارى مۇقيات ويلاستىرىلىپ, ۋاقىتىلى جانە ساپالى ورىندالۋى كەرەك. جۇمىس بارىسى مەنىڭ تىكەلەي باقىلاۋىمدا بولادى, سەبەبى بۇل – وبلىس حالقىنا وتە قاجەت جۇمىس. ونى سوڭىنا دەيىن اتقارىپ شىعۋىمىز كەرەك», دەدى مەملەكەت باسشىسى.
