جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە, الداعى ۋاقىتتا ءوڭىردىڭ چەح رەسپۋبليكاسىمەن اراداعى ىسكەرلىك بايلانىس اياسى كەڭەيمەك. رەسمي قوناقتاردى قارسى العان بەيبىت يساباەۆ وبلىس ەكىجاقتى ساۋدا-ەكونوميكالىق قارىم-قاتىناستى دامىتۋعا دايىن ەكەنىن جەتكىزدى.
ء«بىزدىڭ وڭىرگە ارنايى كەلگەندەرىڭىزگە ريزاشىلىعىمدى بىلدىرەمىن. قوس تاراپتىڭ دا سەرىكتەستىك قاتىناس ورناتۋعا, ءوز ەلدەرىمىزدىڭ يگىلىگى ءۇشىن جاڭا الەۋمەتتىك-ەكونوميكالىق جوبالاردى بىرلەسىپ ىسكە اسىرۋعا نيەتىمىز بار. ماسەلەن, تەكەلىدەگى اشىتقى زاۋىتى چەحيالىق قوندىرعىلارمەن جابدىقتالعان, اسىل تۇقىمدى ءىرى قارا ءوسىرۋ سالاسىن دامىتۋدا دا ەكى ەل اراسىندا بايلانىس ورناعان. الداعى ۋاقىتتا ۇزاقمەرزىمدى قارىم-قاتىناستى ورنىقتىرۋعا مۇمكىندىكتەر مول», دەدى ب.يساباەۆ. سول سياقتى ءوڭىردىڭ الماتى قالاسىندا كەڭسەسى بار ەكەنىن, قاجەت بولسا ينۆەستورلارمەن, بيزنەسمەندەرمەن سول جەردە ىسكەرلىك كەزدەسۋلەر وتكىزۋگە بولاتىنىن دا ايتىپ ءوتتى.
ءوز كەزەگىندە رۋدولف گيكل جىلى قابىلداۋ ءۇشىن العىسىن جەتكىزىپ, تەك اۋىل شارۋاشىلىعى مەن ساۋدا ونەركاسىبىندە عانا ەمەس, چەحيالىقتار تەحنولوگيا سالاسىندا دا ىنتىماقتاسۋعا دايىن ەكەندىگىن ايتتى. سول سياقتى تۋريزم مەن ءبىلىم بەرۋ سالالارىندا دا ەكى ەلدىڭ دامىعان بازاسىنىڭ بولۋى ۇلكەن مۇمكىندىكتەرگە جول اشپاق. وسى رەتتە بەيبىت يساباەۆ جەتىسۋ وبلىسى ءوڭىر حالقىنىڭ الەۋمەتتىك-ەكونوميكالىق يگىلىگى ءۇشىن ىنتىماقتاستىققا اشىق ەكەنىن جەتكىزدى.
جالپى, جەتىسۋ وبلىسىنا ساپارى بارىسىندا چەح رەسپۋبليكاسىنىڭ رەسمي دەلەگاتسياسى وڭىردەگى اۋىل شارۋاشىلىعى تاۋار وندىرۋشىلەرىمەن كەزدەسىپ, ولارعا ءوز ەلىندە وندىرىلەتىن اۋىل شارۋاشىلىعى تەحنيكالارىن تانىستىردى.
جەتىسۋ وبلىسى
