پرەمەر-مينيستر ءاليحان سمايىلوۆتىڭ توراعالىعىمەن وتكەن كەڭەستە بيزنەستىڭ پروبلەمالىق ماسەلەلەرىن شەشۋ, سونداي-اق كاسىپكەرلىك سۋبەكتىلەرىنە قويىلاتىن نەگىزسىز تالاپتاردى قايتا قاراۋ جانە قىسقارتۋ جونىندەگى جۇمىس بارىسى قارالدى.
«تەزدەتۋ كەرەك. «اتامەكەن» ۇكپ تاراپىنان قولداۋ تاپقان جانە ماقۇلدانعان تالاپتار بويىنشا زاڭنامانى «تازارتۋ» قاجەت: بۇل نورمالاردى بۇيرىقتار مەن قاۋلىلاردان الىپ تاستاۋ كەرەك. تالداۋ جۇمىسى اياقتالعانشا كۇتپەڭىزدەر. قاجەتسىز تالاپتار انىقتالدى ما؟ جۇمىسىن توقتاتۋ ءۇشىن ولاردى جويۋ بويىنشا دەرەۋ شارالار قابىلداۋ قاجەت», دەدى ءاليحان سمايىلوۆ.
مەملەكەتتىك ورگاندار بۇرىن تالدانعان 18 سالا, سونىڭ ىشىندە اۋىل شارۋاشىلىعى, قۇرىلىس, مۇناي ءوندىرۋ, كولىك جانە ساۋدا سالالارىندا زاڭعا تاۋەلدى اكتىلەرگە جانە زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ ءراسىمىن باستادى.
بيلىك جۇمىستى 2023 جىلدىڭ ءبىرىنشى توقسانىندا اياقتايمىز دەپ ۋادە بەرىپ وتىر.
«بيزنەس ۇكىمەتكە پروبلەمالىق ماسەلەلەر ايتادى, ءبىز ولارعا ءوز ۇستانىمىمىزدى بىلدىرەمىز. ۇكىمەت بارلىق الەۋمەتتىك-ەكونوميكالىق جاعدايدى ەسكەرە وتىرىپ, بيۋدجەتتىڭ مۇمكىندىكتەرىن ەسكەرە وتىرىپ شەشىم قابىلدايتىندىقتان, بىزدە ارقاشان ورتاق پىكىر بولا بەرمەۋى مۇمكىن. بىراق كاسىپكەرلەردىڭ ارقاشان ءبىر نارسەمەن كەلىسپەيتىنىن ايتۋعا مۇمكىندىگى بار. ءبىز ديالوگقا اشىقپىز, وسى تاقىرىپتاردى تالقىلاپ, كەلىسىلگەن شەشىمدەر قابىلدايمىز», دەدى پرەمەر-مينيستر.
