ماسەلەن, تىكەلەي مەملەكەتتىڭ قارجىلاي قولداۋىمەن ەڭسە تىكتەگەن قوستانايداعى «Hydraulic systems Kazakhstan» كومپانياسى بۇگىندە جەڭىل كولىكتەن باستاپ, جۇك كولىكتەرىنە دەيىن جارايتىن جانە ءىرى ءوندىرىس ورىندارىنداعى قۇرىلعىلاردا پايدالانىلاتىن جوعارى قىسىمدى گيدراۆليكالىق ىشەكتەردىڭ 1,5 مىڭنان اسا ءتۇرىن جاساپ شىعارادى.
كاسىپورىن باسشىسى رۋسلان داندىباەۆ بۇعان دەيىن قۇرىلىس سالاسىندا قولدانىلاتىن سان الۋان قۇرىلعى-قۇرالداردى الىپ-ساتۋمەن اينالىسقان. ءبىراز تاجىريبە جيناقتاعان كاسىپكەر ءبىر قۇرىلعى ساتىپ العان كليەنتتى كەم دەگەندە ەكى-ءۇش جىلعا جوعالتىپ الاتىنىنا كوز جەتكىزەدى. وسىلايشا, نارىقتا ءجيى سۇرانىسقا يە تاۋارلاردى قاراستىرا باستايدى. بىرنەشە جىلعا سوزىلعان تىنىمسىز ىزدەنىستەن كەيىن ءتۇرلى سالادا پايدالانىلاتىن جوعارى قىسىمدى مايىشەكتەرگە سۇرانىس كوپ ەكەنىن جانە ونى جاساپ شىعارۋ ءوزىنىڭ دە قولىنان كەلەتىنىن تۇسىنەدى.
– العاش ستانوكتاردى ساتىپ الدىق. بىراق ءبىر جىل بويى پايدالانا المادىق. ويتكەنى مايىشەكتەر مەن ونىڭ باسىنا كيىلەتىن فيتينگتەردىڭ ءتۇرى وتە كوپ. مۇنىڭ ءبارىن مەڭگەرۋ كەرەك بولدى. ءبىر جىل ۋاقىتىمىزدى وسىعان جىبەردىك. رەسەيگە بارىپ ۇيرەندىك, ەۋروپادان مامان شاقىرتىپ وقىدىق. بىرتىندەپ ءونىم شىعارا باستادىق. 2021 جىلى ءوندىرىس اۋقىمىن كەڭەيتىپ, ءونىم ءتۇرىن كوبەيتۋ ماقساتىندا جاڭا ستانوكتار مەن وندىرىسكە قاجەت ساپالى ماتەريال ساتىپ الۋ ءۇشىن ەكىنشى دەڭگەيلى بانكتەن 19 پايىزدىق وسىممەن 16 ملن تەڭگە نەسيە الدىق. «دامۋ» قورى بۇل نەسيەنىڭ 13 پايىزىن سۋبسيديالادى. سونىڭ ناتيجەسىندە, قازىر ءبىز نەسيەمىزدى 6 پايىزدىق وسىمپۇلمەن جاۋىپ وتىرمىز, – دەيدى ر.داندىباەۆ.
كاسىپورىن جەڭىل كولىكتەر مەن جۇك كولىكتەرىنە, اۋىلشارۋاشىلىق تەحنيكالارىنا, اۋىر ونەركاسىپ سالاسىنا پايدالانىلاتىن قۇرىلعىلارعا جوعارى قىسىمدى ۇستاپ تۇرا الاتىن گيدراۆليكالىق مايىشەك جاسايدى. ماسەلەن, رۋدنىي, ليساكوۆ, جىتىقارا توڭىرەگىندەگى ءىرى كەنىشتەر اۋىر تەحنيكالارىنىڭ توزعان مايىشەكتەرىن اۋىستىرۋ ءۇشىن وسىندا تاپسىرىس بەرەدى.
– ءبىز جاڭا ءونىم شىعارۋمەن قاتار, ەسكىرىپ, توزعان جوعارى قىسىمدى گيدراۆليكالىق ىشەكتەردى جوندەۋمەن دە اينالىسامىز. مۇنداي تاپسىرىستار, اسىرەسە, كوكتەمگى, كۇزگى اۋىلشارۋاشىلىق ناۋقانى قىزعان كەزدە كوبەيەدى. تاپسىرىس بەرۋشى بىزگە جىرتىلعان شلانگىسىن اكەپ بەرەدى, ءبىز سوعان قاراپ وتىرىپ جاڭا مايىشەك جاساپ بەرەمىز. ىشەكتىڭ ۇلگىسى بولماعان جاعدايدا گيدراۆليكالىق جۇيەنىڭ سىزباسىنا قاراپ وتىرىپ جاسايمىز. ءبىزدىڭ بيزنەستە ءبىر مىڭ تەڭگە پايدا تابۋ ءۇشىن قويمادا كەم دەگەندە 100 مىڭ تەڭگەنىڭ تاۋارى جاتۋى كەرەك. تاپسىرىس بەرۋشى سەنى كۇتىپ تۇرمايدى, ىزدەگەن دۇنيەسىن ءدال سول ۋاقىتتا تاۋىپ بەرۋدى تالاپ ەتەدى. سوندىقتان قازىر ءبىز دايىنداپ قويعان تاۋاردىڭ قۇنى 100 ملن تەڭگەدەن اسادى, – دەيدى ساتۋ ءبولىمىنىڭ باستىعى ولەگ زگوننيك.
كاسىپورىن 12 ادامدى تۇراقتى جۇمىسپەن قامتىپ وتىر. مايىشەك جاسايتىن ستانوكتاردى ارنايى ءبىلىمى بار ينجەنەر ماماندار باسقارادى.
– قازىرگى اۋىلشارۋاشىلىق تەحنيكالارىنىڭ گيدراۆليكالىق مايىشەكتەرى ءبىر-ەكى ماۋسىمنان كەيىن توزىپ, جىرتىلا باستايدى. ءبىز سونى جوندەپ, جوندەۋگە كەلمەسە, ورنىنا ساپالى مايىشەك جاساپ بەرەمىز. ءوزىمىز جاساعان ونىمگە ءبىر جىلعا دەيىن كەپىلدىك بەرەمىز. ءبىزدىڭ شلانگىلەرىمىز دە, فيتينگتەرىمىز دە وتە ساپالى. سوندىقتان كوبى بىزگە تاپسىرىس بەرەدى. مايىشەك جاساۋعا جارايتىن شلانگى ءارتۇرلى بولادى. ونىڭ باسىنا كيىلەتىن گيدراۆليكالىق فيتينگتەردىڭ دە ءتۇرى كوپ. جاپوندىق, امەريكالىق, ەۋروپالىق, قىتايلىق, رەسەيلىك ستاندارتتارى بار. ونىڭ جالعاعىشتارى دا سان ءتۇرلى – شار, كونۋس پىشىندەس, تىك, 45, 90 گرادۋستىق بۇرىش بولىپ كەلەدى. مۇنىڭ ءبارى كولىككە بايلانىستى, ماسەلەن, قىتايدىڭ 40 توننالىق جۇك كولىگىندە ەۋروپالىق نەمەسە جاپوندىق فيتينگ تۇرۋى مۇمكىن. ال «بەلارۋس» تراكتورىنا رەسەيلىك, «دجون دير» كومباينىنا امەريكالىق, «Claas» كومباينىنا نەمىس ستاندارتى قاجەت, – دەيدى ستانوكشى دارحان الىمباەۆ.
قوستانايداعى «اگروماشحولدينگ» زاۋىتىنان شىعىپ جاتقان سۋ جاڭا كومباينداردىڭ دا گيدراۆليكالىق مايىشەكتەرى وسى جەردە جاسالادى. وسىلايشا, ەسكى قوسالقى بولشەكتەردى وڭداۋمەن قاتار, جاڭا ءونىمدى كوپتەپ شىعارىپ جاتقان كاسىپورىن وتاندىق ماشينا جاساۋ ءوندىرىسىنىڭ دە جەرگىلىكتى ۇلەسىن ارتتىرىپ وتىر.
قوستاناي وبلىسى
