جاڭا ۇيگە كىرگەن تۇرعىندار بىرنەشە كۇننەن كەيىن اۋلاداعى سەپتيكتىڭ ءىشى سۋعا تولىپ كەتكەنىن بايقاعان. الەۋمەتتىك جەلىدە تاراپ, ەلدىڭ نارازىلىعىن تۋعىزعان ۆيدەودا «بىرلىك» شاعىن اۋدانىنداعى №83 ءۇيدىڭ تۇرعىنى ءوز وتباسىندا 9 ادام بار ەكەنىن, مۇندا وسىدان ەكى كۇن بۇرىن عانا كوشىپ كەلگەنىن, ال سەپتيگىندەگى سۋدىڭ قۇدىقتىڭ ەرنەۋىنەن اسىپ ەسىكتىڭ الدىنا جايىلايىن دەپ تۇرعانىن ايتادى.
وعان كورشىلەس ۇيلەردىڭ دە جاعدايى ءماز ەمەس. بۇعان دەيىن تۇسكەن قار 1 قاراشادا ەرىپ, اۋلانى سۋ باسىپ كەتكەن.
«مىناۋ №69 ءۇي – مەنىڭ ءۇيىم. اۋلامىزدى تەلەگەي-تەڭىز سۋ باسىپ قالدى. بالالارىما ۇيدەگى سۋدىڭ شۇمەگىن اشپاڭدار دەدىم. ونسىز دا سۋ تولىپ كەتكەن سەپتيگىمدى كورسەتەيىن دەسەم, جاقىنداپ بارا الماي تۇرمىن», دەيدى ۆيدەوداعى ايەل ادام.
وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى بەرىك تاڭجارىقوۆتىڭ ايتۋىنشا, بۇل ۇيلەردىڭ ءاۋ باستاعى قۇرىلىس جوباسىندا سەپتيك قازۋ قاراستىرىلماعان. ال اۋلاداعى ۋاقىتشا سەپتيكتەردى مەردىگەرلەر ورناتىپتى.
«كۇن جىلىپ, بىرنەشە كۇن قاتارىنان قار ارالاس جاڭبىر جاۋدى. ناتيجەسىندە, تۇرعىن ۇيلەردىڭ اۋلالارىنا سۋ جينالىپ قالدى. ينجەنەرلىك-گەولوگيالىق زەرتتەۋ بويىنشا, ۇيلەردىڭ ىرگەتاسى ىلعال وتكىزبەيتىن قورعانىشپەن قاپتالعان, ۇيلەرگە سۋ كىرمەيدى, سۋ باسۋ قاۋپى جوق», دەلىنگەن باسقارما باسشىسىنىڭ اتىنان كەلگەن حابارلامادا.
ارتىنشا اۋليەكول اۋدانىنىڭ اكىمى ەرلان تەمەنوۆ سۋ باسقان اۋلالاردا سۋ سورعىتۋ جۇمىستارى ءجۇرىپ جاتقانىن مالىمدەدى.
«91 ءۇيلى «بىرلىك» شاعىن اۋدانىندا 12 ءۇيدىڭ اۋلاسىن سۋ باسىپ قالدى. بۇل ۇيلەردىڭ ىرگەتاسى ىلعال وتكىزبەيدى. ۇيگە سۋ كىرەدى دەپ الاڭداۋعا نەگىز جوق. قازىر 4 تەحنيكا, 2 موتوسورعى, وعان قوسا 25 ادام سۋ سورعىتۋ جۇمىستارىمەن اينالىسىپ جاتىر», دەدى اۋليەكول اۋدانىنىڭ اكىمى ەرلان تەمەنوۆ.
وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى الداعى ۋاقىتتا «بىرلىك» شاعىن اۋدانىنداعى ۇيلەرگە كارىز قۇبىرلارى تارتىلاتىنىن, قازىر ونىڭ سمەتالىق قۇجاتتارى ازىرلەنىپ جاتقانىن ايتتى.
قوستاناي وبلىسى
