سوڭعى جىلدارى ەلىمىزدە ۇشەمدەردىڭ دۇنيەگە كەلۋى قالىپتى قۇبىلىسقا اينالا باستاعان سەكىلدى. دەرەكتەرگە سۇيەنسەك, 2020 جىلى 43 ۇشەم دۇنيەگە كەلسە, 2021 جىلى دۇنيە ەسىگىن ايقارا اشقان ۇشەمدەردىڭ سانى – 45.
جاقىندا وبلىستىق كوپسالالى اۋرۋحانانىڭ پەريناتالدىق بلوگىنان جالپاقتوبە اۋىلىندا تۇراتىن ابدۋللاەۆتار وتباسى شاڭىراقتارىنا ۇلكەن قۋانىشپەن ورالدى. ءبىر ەمەس ءۇش بىردەي ارۋدىڭ اكەسى اتانعان ءالينۇر ابدۋللاەۆ سۋپەرۆايزەر بولىپ ەڭبەك ەتسە, اناسى ءۇميدا ءاشىروۆا – زەرتحاناشى. بۇعان دەيىن ايلانۋ جانە امەليا ەسىمدى قىزداردى دۇنيەگە اكەلگەن اناسى بىردەن ۇشەمنىڭ اناسى اتانام دەپ ويلاماسا كەرەك. وسىلايشا, وتباسى بۇگىندە بەس بالدىرعاننىڭ قىزىعىنا تويماي ءجۇر.
ۇشەم قىزدار مەرزىمىنەن بۇرىن, ياعني جۇكتىلىكتىڭ 35-اپتاسىندا دۇنيەگە كەلدى. ولاردىڭ ءبىرىنىڭ سالماعى 1 980 گرامم بولسا, ەكىنشىسىنىكى – 2 120, ۇشىنشىسىنىكى 2 020 گرامعا جەتكەن. شەكسىز قۋانىشقا كەنەلگەن وتباسى قىزدارىنىڭ ەسىمدەرىن ايلين, اليا جانە اليف دەپ قويىپتى.
شالا تۋعان نارەستەلەردى تەكسەرۋ, كۇتىپ-باپتاۋ جۇمىستارى قىزمەتكەرلەر تاراپىنان دەر كەزىندە قولعا الىنعان. ءيا, اۋرۋحانا قىزمەتكەرلەرى بۇل جۇمىسقا جۇدىرىقتاي جۇمىلعان. اۋەلدە نەوناتولوگيا بولىمىنە اۋىستىرىلىپ, سابيلەردىڭ جاعدايى تولىق, جان-جاقتى زەردەلەنگەن. ناتيجەسىندە, ۇشەمنىڭ دەنساۋلىعىنا ەشقانداي قاۋىپ تونبەگەنى ناقتىلانعان.
جالپى, جامبىل وبلىسىندا سوڭعى ءۇش ايدىڭ بەدەرىندە ەكىنشى رەت ۇشەم دۇنيەگە كەلدى. بۇعان دەيىن تامىز ايىندا ماقسات ەرىمبەتوۆ پەن ايتكۇل قىدىرباەۆانىڭ وتباسى كاۋسار, سەزىم, ءۇمىتىم ەسىمدى ءۇش بىردەي ارۋدىڭ اتا-اناسى اتانعان بولاتىن.
جامبىل وبلىسى
