ساناق نەگىزىنەن اڭشىلىق شارۋاشىلىقتاردىڭ اۋماعىندا ءجۇرىپ جاتىر. قبسق ماماندارى بۇل اۋماقتار ارقىلى شامامەن نەشە جىل قۇسى ۇشىپ وتەتىنىن انىقتاۋمەن قاتار, قورىقشىلارعا قازدار مەن قاراشا قازداردىڭ سيرەك كەزدەسەتىن قانداي تۇرلەرى بارىن, اۋلاۋعا رۇقسات ەتىلگەن قازداردان ولاردى قالاي اجىرتاۋعا بولاتىنىن تۇسىندىرۋدە.
مونيتورينگ بارىسىندا قوستاناي وبلىسى قامىستى اۋدانىنداعى ءىرى سۋقويمالارىنا قونعان قاز تۇقىمداس قاناتتىلاردىڭ 45-47,5 پايىزى سيرەك كەزدەسەتىن قىزىلجەمساۋلى قاراشاقاز بەن شيقىلداق قازدار ەكەنى انىقتالعان. قورىقشىلار قىزىل كىتاپقا ەنگەن قۇستاردىڭ كوبەيۋى كۇزدە زاڭسىز جورتۋىلعا شىعۋدى ادەت ەتكەن براكونەرلەردىڭ جيىلەپ كەتۋىنە اكەلۋى مۇمكىن دەپ قاۋىپتەنەدى. مامانداردىڭ بۇلايشا الاڭداۋى ابدەن ورىندى, ويتكەنى تاياۋدا عانا قىزىلجەمساۋلى قاراشاقاز اتۋعا شىققان بىرنەشە براكونەر ۇستالدى.
مامانداردىڭ ايتۋىنشا, جىل قۇستارىنىڭ جولىندا جاتقان سۋ قويمالارىنىڭ جاي-كۇيى دە ءماز ەمەس. بيىلعى جاز ىستىق, توپىراق قۇرامىندا ىلعال از بولعاندىقتان, قامىستى جانە ناۋىرزىم اۋداندارىنداعى كولدەردىڭ سۋى تارتىلىپ كەتكەن. وسىلايشا, جىل قۇستارى تايىز كولدەرگە, تۇبىنە كولشىك تۇنعان شاعىن شۇڭقىرلار مەن توعاندارعا قونۋعا ءماجبۇر بولعان.
– مۇنداي جاعدايدا ولار اسا قورعانسىز بولادى. كولدەردىڭ كەبۋى قىستا قاردىڭ, جازدا جاۋىن-شاشىننىڭ از مولشەردە تۇسۋىمەن بايلانىستى. الايدا سۋ قويمالارىنىڭ قۇرعاي باستاۋىنا اۋىل شارۋاشىلىعىنىڭ دا اسەر ەتۋى مۇمكىن. سوڭعى جىلدارى جەرگىلىكتى فەرمەرلەر ەگىندى شەكتەن تىس كوپ ەگە باستادى. ال ەگىن القاپتارى ەرىگەن قار سۋىنىڭ قالىپتى اعىنىنا بوگەت جاسايدى. سول سەبەپتەن وسى اۋماقتاعى ءبىز باقىلاعان 14 سۋ قويماسىنىڭ سەگىزى قۇرعاپ كەتكەن. ولاردىڭ كوبى حالىقارالىق ماڭىزى بار نەگىزگى ورنيتولوگيالىق اۋماق بولىپ سانالادى, – دەيدى قازاقستان بيوالۋانتۇرلىلىكتى ساقتاۋ قاۋىمداستىعىنىڭ ورنيتولوگ-مامانى الەكسەي تيموشەنكو.
ساناق بارىسىندا قىزىلجەمساۋلى قاراشا قازدان وزگە قوستاناي وبلىسى ارقىلى ۇشىپ وتەتىن جىل قۇستارىنىڭ 20 ءتۇرى انىقتالعان. ولاردىڭ ىشىندە اقباس قاز, اققۋ, ۇيرەك, قاسقالداق سياقتى قاناتتىلار بار.
قوستاناي وبلىسى
