ەۋرازيالىق وداق – زامان تالابىنان تۋعان قاجەتتىلىك

استانا. 27 مامىر. قازىرگى تاڭدا ەۋرازيالىق ەكونوميكالىق وداعىن قۇرۋ جاڭا تەحنولوگيالار مەن يننوۆاتسيا زامانىنىڭ تالابىنان تۋىنداپ وتىرعان قاجەتتىلىك بولىپ وتىر. بۇل تۋرالى تمد ەكونوميكالىق دامۋ ىسكەرلەر ورتالىعىنىڭ باس ديرەكتورى ۆلاديمير ساۆچەنكو BNews.kz تىلشىسىنە بەرگەن سۇحباتىندا اڭگىمەلەدى. «ەۋرازيالىق ەكونوميكالىق وداق – بۇگىنگى كۇنى ەڭ الدىمەن ءوندىرىس پەن تەحنولوگيا ءۇشىن باستى قاجەتتىلىك. ياعني – حالىقتى جۇمىسپەن قامتۋ ءۇشىن, تاۋار مەن قىزمەتتەردى تاراتۋ ءۇشىن, كەدەرگىلەردى ەڭسەرۋ ءۇشىن, حالىقتىڭ ءومىر ءسۇرۋ ساپاسىن ارتتىرۋ ءۇشىن اسا ماڭىزدى», - دەدى ساۆچەنكو. ساراپشىنىڭ ويىنشا, قازاقستاننىڭ مۇددەسىن ويلاعان ۇلت كوشباسشىسى ن.نازارباەۆ تا مۇنى جاقسى بىلەدى. «بۇل جايىندا ول بۇدان 20 جىل بۇرىن ايتقان بولاتىن. ول تەحنولوگيالىق وزگەرىستەرگە ۇشىرعان ەۋروپانىڭ جانە ادامي كاپيتالدى العا قوياتىن ازيانىڭ دامۋ پارامەترلەرىن جاقسى اڭعاردى. ن.نازارباەۆ اقىلعا سالىپ, مۇنىڭ ءبارىن ءبىر ارناعا توعىستىرىپ وتىر. بۇگىندە, ارينە, قازاقستاننىڭ ءوز پروبلەمالارى بار, سوعان قاراماستان تەحنولوگيالىق تۇرعىدا وتە قارقىندى دامۋدا. جالپى ىشكى ءونىم جەتى ەسەگە ارتقان. جانە بۇگىندە الەمدىك نارىققا جول تارتقان بىرقاتار وندىرىستەرى مەن تاۋارلارى بار. اۋىل شارۋاشىلىعى دامىپ, تەك ءوندىرىس قانا وسپەي, گاز بەن مۇنايعا سەرۆيستىك قىزمەت كورسەتۋ دەڭگەيى دە ارتىپ وتىر. ازيانىڭ ونىڭ تاۋارلارىمەن, ونىڭ قۋاتى جانە ادامي كاپيتالىمەن, ەۋروپامەن بىرلەسۋى جان-جاقتى دامىپ, العا ۇمتىلۋعا قولايلى جاعداي جاسايدى», - دەدى ول بۇدان ءارى. قازىر قولدانىستاعى الەمدىك حالىقارالىق ساۋدا جانە ەكونوميكالىق ۇيىمدارمەن سالىستىرعاندا, ءۇش ەل قۇرىپ وتىرعان ەاەو-نىڭ شوقتىعى بيىك, دەپ ەسەپتەيدى ۆ.ساۆچەنكو. ەسكە سالا كەتەيىك, ۇستىمىزدەگى جىلعى 29 مامىردا استانادا ەۋرازيالىق ەكونوميكالىق وداق قۇرۋ تۋرالى شارتقا قول قويىلادى دەپ كۇتىلۋدە. ۇيىم ءوزىنىڭ جۇمىسىن رەسمي تۇردە 2015 جىلدىڭ 1 قاڭتارىنان باستايدى. مۇرات ايتقوجا. دەرەككوز: Primeminister.kz. فوتو: eurobelarus.info.