ەۋرازيالىق ينتەگراتسيا اياسىندا ورتاق ەلەكتر ەنەرگەتيكاسى نارىعى قۇرىلادى

استانا. 27 مامىر. ەۋرازيالىق ەكونوميكالىق وداققا قاتىسۋشى ەلدەر اراسىندا 2019 جىلدىڭ 1 شىلدەسىنە دەيىن ورتاق ەلەكتر ەنەرگەتيكاسى نارىعىن قۇرۋ تۋرالى كەلىسىمگە قول قويىلادى. يندۋستريا جانە جاڭا تەحنولوگيالار ۆيتسە-ءمينيسترى باقىتجان جاقساليەۆ وسىلاي دەپ مالىمدەدى. بۇل تۋرالى Bnews.kz حابارلادى. ۆيتسە-ءمينيستردىڭ ايتۋىنشا, قازىرگى ۋاقىتتا كەدەن وداعى مەن بىرىڭعاي ەكونوميكالىق كەڭىستىك كولەمىندە ەلەكتر ەنەرگەتيكاسى سالاسىندا ىقپالداسۋ ۇدەرىستەرى جۇرگىزىلۋدە. قازاقستان, رەسەي جانە بەلارۋس مەملەكەتتەرىنىڭ اراسىندا ەلەكتر ەنەرگەتيكاسى سالاسى بويىنشا بۇرىننان قالىپتاسقان ءۇردىس بار. بىراق, بۇل ءۇش ەل ءۇشىن ورتاق ەلەكتر ەنەرگەتيكاسى نارىعى جونىندە ءسوز قوزعاۋ ءالى ەرتە. ويتكەنى, ەلەكتر ەنەرگەتيكاسى نارىقتارىنىڭ مودەلدەرى ءارتۇرلى. باقىتجان جاقساليەۆ: «قازاقستاندا ىرىقتاندىرىلعان ەلەكتر نارىعى بولسا, بەلارۋستە مەملەكەتتىك ساتىلاس بىرىكتىرىلگەن كومپانيا, ال رەسەيدە ەلەكتر ەنەرگياسى مەن قۋاتتار نارىعى توراپتى باعانى بەلگىلەيدى. ءبىر جىلدىڭ ىشىندە ساراپشىلار ەلەكتر ەنەرگەتيكاسى سالاسىنداعى ماسەلەلەردى قاراستىردى. قاتارلاس جۇمىس ىستەيتىن ەلەكتر ەنەرگەتيكاسى جۇيەلەرىنىڭ نەگىزىندە وداقتىڭ ورتاق ەلەكتر ەنەرگەتيكاسى نارىعىن كەزەڭ-كەزەڭمەن قۇرۋ بويىنشا قول جەتكىزىلگەن كەلىسىمدەر, ۇستانىمداردىڭ بارلىعى كەلىسىلدى», – دەدى. سونداي-اق, ول 2015 جىلدىڭ 1شىلدەسىنە دەيىن ورتاق ەلەكتر ەنەرگەتيكاسى نارىعىن قۇرۋ تۇجىرىمداماسى ازىرلەنەتىنىن, ال 2016 جىلدىڭ 1شىلدەسىنە دەيىن ورتاق نارىقتى قۇرۋ جونىندە باعدارلاما قابىلداناتىنىن جەتكىزدى. ۆيتسە-مينيستر: «باعدارلاما ءىس-شارالارىن ىسكە اسىرۋدى اياقتاعاننان كەيىن وداققا مۇشە مەملەكەتتەر 2019 جىلدىڭ 1 شىلدەسىنە دەيىن ورتاق ەلەكتر ەنەرگەتيكاسى نارىعىن قۇرۋ تۋرالى حالىقارالىق كەلىسىمگە قول قويادى. وندا جەلىلەردى قولدانۋدىڭ بىرىڭعاي ەرەجەلەرى دە قاراستىرىلادى», – دەدى. جولدىباي بازار. دەرەككوز: Bnews.kz. فوتو: gazeta.kz.