ەۋرازيالىق ەكونوميكالىق وداقتىڭ قۇرىلۋى بارلىق تاراپقا ءتيىمدى

استانا. 27 مامىر. ەۋرازيا ەكونوميكالىق وداق تۋرالى كەلىسىمگە قول قويىلۋى تاريحي وقيعا. پارلامەنت سەناتى مەن رەسەي فەدەرالدىق جينالىسى فەدەراتسيا كەڭەسى پارلامەنتتىك ىنتىماقتاستىق كوميسسياسىنىڭ بەسىنشى وتىرىسىندا سەنات توراعاسى قاسىم-جومارت توقاەۆ وسىلاي دەدى. بۇل تۋرالى «قازاقپارات» حابارلادى. قاسىم-جومارت توقاەۆتىڭ ايتۋىنشا, ءبىر بىرىمەن ىنتىماقتاسا ءومىر سۇرگىسى كەلەتىن ءۇش مەملەكەت حالىقتارىنىڭ مۇقتاجىنا تولىقتاي جاۋاپ بەرەتىن ەكونوميكالىق وداقتىڭ قۇرىلۋى وتە ماڭىزدى. جيىندا سەنات توراعاسى: «ەكونوميكالىق ىقپالداستىقتى دامىتۋ وداقتىڭ بارلىق قاتىسۋشىلارىنا ىڭعايلى», – دەدى. سونداي-اق, ول: «بۇگىندە الەمدە قىزمەت ەتىپ جاتقان 200 ىقپالداستىق بىرلەستىكتەر اراسىندا ەۋرازيالىق ەكونوميكالىق وداق ءوزىن مەيلىنشە ءتيىمدى جانە تابىستى ەتىپ كورسەتەتىنىنە تولىق نەگىز بار. بىراق, ول ءۇشىن قاجىرلى قىزمەت ەتۋگە تۋرا كەلەدى», – دەدى. كەزدەسۋدە سەنات توراعاسى ۇلى وتان سوعىسىنداعى جەڭىستىڭ 70 جىلدىعىن مەرەكەلەۋگە بىرلەسە ازىرلىك جاساۋعا قازاقستان جانە رەسەي سەناتورلارىنىڭ نازارىن اۋداردى. جولدىباي بازار. دەرەككوز: «قازاقپارات». فوتو: egemen.kz.