ءىس-شاراعا ۇلتتىق ۇلاننىڭ باس قولباسشىلىعى مەن ەلوردالىق اسكەري بولىمدەرىنىڭ وكىلدەرى, سونداي-اق №25 ورتا مەكتەپتىڭ وقۋشىلارى مەن ولاردىڭ اتا-انالارى قاتىستى.
«جاس بۇركىت» اسكەري-پاتريوتتىق كلۋبىنىڭ قالىپتاسۋى مەن قىزمەتىنە, سونداي-اق اسكەرگە دەيىنگى جاستاردى پاتريوتتىق رۋحتا تاربيەلەۋ ىسىنە اتالعان ءبىلىم ورداسىنىڭ جانە ۇلتتىق ۇلاننىڭ 6636 اسكەري ءبولىمىنىڭ باسشىلىعى ەلەۋلى ۇلەس قوسىپ كەلەدى.
– قۇقىقتىق ءتارتىپ اسكەرىنىڭ وكىلى رەتىندە, وقۋشىلاردى «جاس بۇركىت» كيىمىمەن عانا ەمەس, ۇلتتىق ۇلاننىڭ فورماسىمەن كورگەنىمە وتە قۋانىشتىمىن. مەكتەپتە العاشقى اسكەري دايىندىقتى وتكىزۋگە قاجەتتى ماتەريالدىق-تەحنيكالىق بازا بار. وقۋشىلاردىڭ بويىنا ۇلكەندەردى قۇرمەتتەۋ, ۇرپاقتار ساباقتاستىعى, ۇلتتىق تاريح پەن مادەنيەتتى تانۋ سىندى قۇندىلىقتاردى سىڭىرەمىز. بۇل ولاردىڭ ءوز ەلىنىڭ پاتريوتتارى رەتىندە قالىپتاسۋىنا وڭ اسەر ەتەرى ءسوزسىز. تاربيەلەنۋشىلەرگە جان-جاقتى ءبىلىم الۋعا, سپورتپەن جانە قولدانبالى عىلىمدارمەن شۇعىلدانۋعا, اسكەري سالادا ءوز داعدىلارىن جەتىلدىرۋگە شىن جۇرەكتەن تىلەكتەسپىن, – دەيدى ۇلتتىق ۇلان باس قولباسشىلىعى تاربيە جانە الەۋمەتتىك-قۇقىقتىق جۇمىستار باس باسقارماسىنىڭ باستىعى, پولكوۆنيك الەكساندر كرامار.
بۇگىنگى تاڭدا ۇلتتىق ۇلان مەن «جاس بۇركىت» كلۋبى بىرلەسىپ, جاس ساربازداردىڭ اسكەري انت قابىلداۋ راسىمدەرى, اسكەري بورىشىن وتەگەن جاۋىنگەرلەردى قۇرمەتتەۋ كەشتەرى, مەرەكەلىك سالتاناتتى جيىندار, تاقىرىپتىق ۆيكتورينالار مەن بايقاۋلار, «ەرلىك ساباقتارى», «اشىق ەسىك كۇندەرى» اكتسيالارى سياقتى اسكەري-پاتريوتتىق مازمۇنداعى كوپتەگەن ءىس-شارالار وتكىزۋدە.
1995 جىلعى 7 ساۋىردە تاجىك-اۋعان شەكاراسىندا قازا تاپقان ىشكى اسكەردىڭ 17 جاۋىنگەرىن ەسكە الۋعا ارنالعان جىل سايىنعى ەسكە الۋ شەرۋىنە اسكەري-پاتريوتتىق سىنىپتاردىڭ قاتىسۋى داستۇرگە اينالعان. اسكەري-پاتريوتتىق كلۋب وزدەرىنە جەتەكشىلىك ەتەتىن 6636 اسكەري ءبولىمىنىڭ قوعامدىق ومىرىنە بەلسەندى قاتىسىپ قانا قويماي, ەلوردا اۋماعىندا اۋقىمدى ءىس-شارالار وتكىزەدى.
جيىن سوڭىندا ۇلتتىق ۇلان باس قولباسشىلىعىنىڭ وكىلدەرى العاشقى اسكەري دايارلىقتىڭ ەڭ بەلسەندى وقۋشىلارى مەن وقىتۋشىلارىن «قۇقىقتىق ءتارتىپ اسكەرلەرىنە – 30 جىل» مەرەيتويلىق مەدالدارى جانە گراموتالارمەن ماراپاتتادى.
