جيىندا بىرقاتار وزەكتى ماسەلە تالقىلاندى. اتاپ ايتقاندا, ەلەكتر ەنەرگەتيكاسى ينفراقۇرىلىمىن (ەلەكتر جۇيەسى, كۇش ترانسفورماتورلارى, ستانسالار, قوسالقى ستانسالار ت.ب.) جاڭعىرتۋ, ەلەكتر ەنەرگياسىنىڭ ءوندىرىسى جانە قوسىمشا قۋات كوزدەرى.
باسقوسۋدا تالقىلانعان تاعى ءبىر ماسەلە – ەلەكتر جەلىلەرىنىڭ جاڭالانۋى. قازىرگى تاڭدا ەل اۋماعىندا ەلەكتر جەلىلەرىنىڭ توزعانى بايقالادى. پرەزيدەنتىمىز قاسىم-جومارت توقاەۆ حالىققا ارناعان جولداۋىندا جەلىلەر مەن قۋاتتاردىڭ توزۋىن كەم دەگەندە 15%-عا دەيىن ازايتۋ كەرەك دەگەن ەدى. سونداي-اق مەملەكەت باسشىسى گاز جانە ەنەرگەتيكا سالاسىندا ەلەكتر جەلىلەرىنىڭ ۇزدىكسىز جۇمىس ىستەۋى مەن جاڭا قۋات ءوندىرۋ جولدارىن جاساۋدى تاپسىردى.
وسى تۇستا قازاقستان ەلەكتر ماشينا جاساۋشىلار قاۋىمداستىعى ەسكى قۋات ترانسفورماتورلارىن جاڭاسىنا اۋىستىرۋدى ۇسىنىپ وتىر. بۇل ءۇشىن يمپورتتىڭ قاجەتى جوق, وزىمىزدە جابدىق ازىرلەيتىن ءوندىرىس ورىندارى مەن ءتيىستى تەحنولوگيالار جەتەرلىك.
بۇل كۇردەلى تاقىرىپتاردان بولەك وتاندىق جانە شەتەلدىك ارداگەر ەنەرگەتيكتەر سالا تاريحى مەن كاسىپوداقتىڭ وزەكتى ماسەلەلەرى بويىنشا بايانداما جاسادى. قازاقستان ارداگەر ەنەرگەتيكتەر كەڭەسىنىڭ توراعاسى سوۆەتحان نۇرپەيىسوۆ قاۋىمداستىقتىڭ اتقارعان جۇمىسىنىڭ ناتيجەلەرى تۋرالى باياندادى.
فورۋم بارىسىندا ەلەكتر ماشينا جاساۋ سالاسىنا ەڭبەگى سىڭگەن ارداگەر ەنەرگەتيكتەر «قەا ارداگەر ەنەرگەتيگى» بەلگىسىمەن ماراپاتتالدى.
سونىمەن بىرگە ءىس-شارا اياسىندا شەتەلدىك مەيماندار «Alageum Electric» كومپانياسىنىڭ ەكسپورتتىق باعىتقا نەگىزدەلگەن «Asia Trafo» زاۋىتىندا بولىپ, ونىمدەرمەن تانىستى.
«ازيا ترافو» جشس – «Alageum Electric» ەلەكتر جابدىقتارىن شىعاراتىن وتاندىق ءوندىرۋشىنىڭ قۇرامىنا كىرەتىن, ورتالىق ازياداعى ترانسفورماتورلىق جابدىق شىعاراتىن ەڭ ءىرى زاۋىت. كاسىپورىننىڭ نەگىزگى وندىرەتىن ونىمىنە قۋاتتىلىعى 500 مۆا-عا دەيىنگى كەرنەۋلى 35, 110, 220, 500 كۆ كلاستى مايلى ترانسفورماتورلار مەن اۆتوترانسفورماتورلار جانە رەاكتورلار كىرەدى. ءوندىرىس وشاعىنىڭ جوبالىق قۋاتتىلىعى جىلىنا 12 مىڭ مۆا-دان اسادى.
زاۋىت ونىمدەرىن ءوندىرۋ ءۇشىن زاماناۋي ءارى جوعارى وندىرىستىك تەحنولوگيا قولدانادى. بۇل ءوز كەزەگىندە ۇزاق مەرزىمگە شىداس بەرەتىن كولەمى شاعىن ءارى از ماتەريال قاجەتسىنەتىن ينجەنەرلى-تەحنيكالىق قۇرىلعى جاساۋعا زور مۇمكىندىك بەرەدى.
كاسىپورىن ترانسفورماتورلاردى جوبالاۋ كەزىندە «بۇكىلوداقتىق ترانسفورماتور جاساۋ ينستيتۋتى» نەگىزىندە قۇرىلعان ۋكرايندىق «Soft-Team Group» توبىنىڭ باعدارلامالىق قامتاماسىز ەتۋ جۇيەسىنە سۇيەنەدى.
ءاربىر تاپسىرىس جانە ءار ءوتىنىش جەكە قاراستىرىلادى. وڭتايلى ديزاين 3D مودەلدەۋ جۇيەلەرى ارقىلى ەسەپتەلەدى, تاپسىرىس بەرۋشىمەن كەلىسىپ, تالاپتاردى قاناعاتتاندىرعاننان كەيىن ءوندىرىستى باسقارۋ جۇيەسىنە اۆتوماتتاندىرىلعان دەرەكتەر ەنگىزىلەدى.
ترانسفورماتورلار ءوندىرىسى جوبالىق ازىرلەمەلەر مەن نورماتيۆتىك قۇجاتتاردىڭ تالاپتارىنا سايكەس. سوندىقتان وتاندىق ءونىم جوعارى سەنىمدىلىككە يە. جالپى, ساپالى ءونىم شىعارۋدا شۆەيتساريا, گەرمانيا, يتاليا, حورۆاتيا سياقتى جەتەكشى ەۋروپالىق كومپانيالاردىڭ تەحنولوگيالىق جابدىقتارى پايدالانىلادى.
اتالعان ءوندىرىس ورنى 2019 جىلى پايدالانۋعا بەرىلدى. جۇمىس ىستەگەن ءۇش جىل ىشىندە 35, 110, 220, 500 كۆ كەرنەۋ كلاسىنداعى 150-دەن استام ترانسفورماتور, اۆتوترانسفورماتور جانە رەاكتورلار شىعاردى. سونداي-اق سىناق زەرتحاناسىنىڭ جەكە قاجەتتىلىكتەرى ءۇشىن سەرىكتەستىك قۋاتتىلىعى 128 مۆا, كەرنەۋى 750 كۆ, 200 گتس جيىلىكتە 24 ساعات بويى جۇمىس ىستەۋگە شىدايتىن ترانسفورماتور جاسادى.
ايتا كەتۋ كەرەك, «Alageum Electric» – ەلىمىزدىڭ ەلەكتر تەحنيكا سالاسىنداعى كوشباسشى كومپانيا سانالادى. ونىڭ ەلەكتر ەنەرگەتيكا, ەلەكتر ماشينا جاساۋ مەن قۇرىلىس سياقتى باعىتتارى بويىنشا 30-دان استام كاسىپورىن مەن زاۋىتى بار. ولاردىڭ ىشىندە كەنتاۋ ترانسفورماتور جانە «ەلەكترمونتاجداۋ بۇيىمى» كاسىپورنىن اتاپ وتۋگە بولادى. ماسەلەن, كەنتاۋداعى زاۋىت كۇردەلى ترانسفورماتورلار شىعارسا, «ەلەكترمونتاجداۋ بۇيىمى» كەز كەلگەن كۇردەلى ەلەكتر مونتاجداۋ جۇمىستارىن جۇرگىزەتىن ءارى كابەلدى تراسسالار جۇيەسىن جاسايتىن قازاقستانداعى تەڭدەسى جوق جالعىز كاسىپورىن.
حولدينگ وتاندىق جانە حالىقارالىق ستاندارتتارعا ساي قۇرال-جابدىقتارمەن جابدىقتالعان. وندىرگەن ءونىمى ارقىلى وتاندىق نارىقتى قامتاماسىز ەتىپ قانا قويماي, تمد مەن ورتالىق ازيا ەلدەرىنە ەكسپورتتايدى. ماسەلەن, كەنتاۋداعى زاۋىت تاۋارىنىڭ 30%-ى, ورالداعى زاۋىتتىڭ 95%-ى, پەتروپاۆلداعى زاۋىتتىڭ 95%-ى, شىمكەنتتەگى زاۋىت ءونىمىنىڭ 50-60%-ى شەتەلدەرگە ەكسپورتقا جونەلتىلەدى. وتكەن جىلى كومپانيا سىرتقا 20 مىڭ ترانسفورماتور ساتقان.
«Alageum Electric» كومپانياسىنىڭ 14 زاۋىتى بار. ونىڭ 4-ەۋى ترانسفورماتور جاسايدى. ولاردىڭ قۋاتتىلىعى جىل سايىن 36 مىڭ ترانسفورماتور شىعارۋعا قاۋقارلى. جابدىقتاردىڭ نارىقتاعى باعاسى 1 ملن تەڭگەدەن 2 ملرد تەڭگەگە دەيىنگى ارالىقتى قامتيدى.
ترانسفورماتور سياقتى قۇرال-جابدىقتى ازىرلەۋ كۇردەلى عىلىمي زەرتتەۋلەردى قاجەت ەتەتىن بەينەتى كوپ جۇمىس. تاباندىلىق پەن كاسىبي بىلىكتىلىكتى دە تالاپ ەتەدى. ونىڭ ۇستىنە ترانسفورماتور شىعارۋ ءۇشىن زاۋىت الەمدىك ستاندارتتارعا ساي قوندىرعى, قۇرالدارمەن جابدىقتالۋى كەرەك. ماسەلەن, «Alageum Electric» كومپانياسى ەۋروستاندارت نەگىزىندە فرانتسيا, گەرمانيا, يتاليا, شۆەيتساريا, بەلگيا سىندى مەملەكەتتەردىڭ قوندىرعىلارىمەن جۇمىس ىستەيدى. ياعني زامان تالابىنا قاراي زاۋىتتار جاڭا تەحنولوگيالارمەن تولىقتىرىلىپ وتىرادى.
حولدينگ قازىرگى تاڭدا ۇلكەن قالانى توقپەن قامتيتىن قوسالقى ستانساعا قاجەتتى قۇرال-جابدىقتىڭ 80 %-ىن شىعارادى. الداعى جوسپار – 100%-عا جەتكىزۋ! بۇل ءۇشىن 110-500 كۆ-تىق توق ترانسفورماتورى مەن ەلەگازدى اجىراتۋ جابدىقتارىن جانە كەرنەۋ ترانسفورماتورىن جاساۋى قاجەت. ءدال قازىر كومپانيانىڭ عالىمدارى مەن كاسىبي ماماندارى وسى باعىتتا ەڭبەك ەتىپ جاتىر.
شىمكەنت
