اتاۋى وبلىستىق دەمەسەك, كەزىندە دىنمۇحامەد قوناەۆ پەن اسانباي اسقاروۆ سىندى الاشتىڭ ايتۋلى ازاماتتارىنىڭ باسىنا ءىس تۇسكەندە ءۇنسىز قالماي, قايراتكەر تۇلعالارعا العاشقىلاردىڭ ءبىرى بولىپ اراشا تۇسكەن باسىلىمنىڭ بەدەلى قاي كەزدە دە بيىك. سودان دا بولار, ءوڭىردىڭ باس باسىلىمىنىڭ 100 جىلدىق مەرەيتويىنا ەلىمىزدىڭ ءار قيىرىنان مارتەبەلى مەيماندار كەلىپ, اقجارما تىلەكتەرىن اقتاردى.
بالاساعۇن اتىنداعى ورتالىق كونتسەرت زالىنا جينالعان جۇرتشىلىق الدىمەن «Aq jol» گازەتىنىڭ ءفوتوتىلشىسى اقادىل رىسماحاننىڭ «تاسپادا قالعان تاريح» اتتى فوتوكورمەسىن تاماشالادى. كورمەگە ءوڭىردىڭ ءومىرى مەن تالايلى تاريحىنان سىر شەرتەتىن ەلۋگە جەتەعابىل سۋرەت قويىلىپتى. جينالعاندار ءار فوتونىڭ تاريحىنا ءۇڭىلىپ جاتتى. كەيىننەن باسىلىمدا ۇزاق جىل بويى ەڭبەك ەتكەن ارداگەر جۋرناليست تۇرسىنحان تولقىنباي ۇلى قۇراستىرعان «عاسىر شەجىرەسى» اتتى جيناقتىڭ تۇساۋى كەسىلدى.
سالتاناتتى ءىس-شارادا ءوڭىر باسشىسى نۇرجان نۇرجىگىتوۆ گازەت ارداگەرى تۇرسىنحان تولقىنباي ۇلىنا «قازاقستاننىڭ قۇرمەتتى ءجۋرناليسى» توسبەلگىسىن تاپسىرسا, باسىلىم قىزمەتكەرلەرى ءشاربانۋ دانياروۆا, ەسەن وتەۋليەۆ, ساندىبەك پىرەنوۆ وبلىس اكىمىنىڭ العىس حاتىنا يە بولدى.
بۇل كۇنى گازەتتىڭ 100 جىلدىعىنا وراي ۇيىمداستىرىلعان «Aq jol» گازەتى: قازاق ءباسپاسوزىنىڭ بۇگىنى مەن ەرتەڭى» تاقىرىبىنداعى رەسپۋبليكالىق جۋرناليستەر بايقاۋىنىڭ قورىتىندىسى شىعارىلدى. قازىلار القاسىنىڭ شەشىمىمەن ەلوردادان كەلگەن ولجاس ساندىبەك, اسحات رايقۇل, جەرگىلىكتى جۋرناليستەر اقمارال شاعاتاي, اقتوتى جاڭاباي, مارات ديحانباي جۇلدەگەرلەر قاتارىنان كورىندى. ولاردىڭ ارقايسىسىنا 500 مىڭ تەڭگەنىڭ سەرتيفيكاتى تاپسىرىلدى.
سالتاناتتى جيىن بارىسىندا ءسوز العان سەناتور ابدالى نۇراليەۆ باسىلىم قىزمەتكەرلەرى ورازكۇل ابدىكەرىموۆا مەن شىنار ساعيەۆانى سەنات توراعاسى ماۋلەن اشىمباەۆتىڭ العىس حاتىمەن ماراپاتتادى. ءماجىلىس دەپۋتاتتارى جاناربەك ءاشىمجان, مەيرامبەك تولەپبەرگەن, گۇلدارا نۇرىموۆانىڭ قۇتتىقتاۋلارى دا ارىپتەستەردىڭ مەرەيىن اسىردى. ءماجىلىس توراعاسى ەرلان قوشانوۆتىڭ سالەمىن جەتكىزگەن جاناربەك ءاشىمجان گازەت قىزمەتكەرلەرى دينارا بالاەۆا مەن ەسەت دوسالىعا العىس حات تاپسىردى.
مەرەيتويلىق ءىس-شارادا ءسوز سويلەگەن «Egemen Qazaqstan» رەسپۋبليكالىق گازەتى» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى ديحان قامزابەك ۇلى ارىپتەستەرىن مەرەيتويىمەن قۇتتىقتادى.
«حالىقتىڭ كوزى, قۇلاعى, ءتىلى» بولىپ جۇرگەن ارىپتەستەرگە دەگەن العىسىم زور. قازاق حاندىعى قاسيەتتى جامبىل جەرىندە قۇرىلدى. ءدىن مەن ءداستۇردىڭ ۇيلەسىم تاپقان جەرى دە اۋليەاتا ءوڭىرى سانالادى. ءجۇز جىلدان ارىدە جاتقان تاريحتىڭ ءبارى بالبال تاستاردا, سانامىزدا, ەلدىڭ كومەيىندە تۇر. باسىلىم اتاۋلى ءبىزدى بارلىق كەزەڭدە بىرىكتىرگەن. ءالى تالاي بيىكتەر مەن جاقسىلىقتارعا باستايتىنى داۋسىز», دەدى د.قامزابەك ۇلى. سونداي-اق «حابار» اگەنتتىگى باسقارما توراعاسى بەرىك ءۋالي دە ارىپتەستەرىنە دەگەن لەبىزىن جەتكىزدى.
ءىس-شارا سوڭىندا گازەت ارداگەرى ماحانبەتالى دۇيسەباەۆ, «Aq jol» گازەتى باس رەداكتورىنىڭ ورىنباسارى فاريزا ابدىكەرىموۆا, «Ar-ai» جاستار گازەتىنىڭ باس رەداكتورى تۇرسىنبەك سۇلتانبەك «اقپارات سالاسىنىڭ ۇزدىگى» توسبەلگىسىمەن ماراپاتتالدى.
تاراز
