شاھار باسشىسىنىڭ ايتۋىنشا, مۇنداعى نەگىزگى ماقسات – مەگاپوليستىڭ يمپورتقا تاۋەلدىلىگىن ازايتىپ, ەكسپورتتى كۇشەيتۋ. سونداي-اق وسى باعىتتا ينۆەستيتسيا تارتۋ جالعاسا بەرەتىنىن جانە سول ارقىلى جاڭادان اشىلاتىن جۇمىس ورىندارىنىڭ قاتارى ارتاتىنىن جەتكىزدى.
ايتا كەتۋ كەرەك, جاۋاپتى باسقارما باسشىلارى, اۋدان اكىمدەرى مەن ينۆەستورلار باس قوسقان جيىندا جالپى 12 جاڭا جوبا تانىستىرىلدى. ماسەلەن, «امينا ينتەكس» جشس باسشىسى الي گوحار «بوزارىق» اگرو-يندۋستريالدى ايماعىن مال ازىعى ءوندىرىسىن اشۋدى كوزدەپ وتىرعانىن ايتتى. 1 ملرد تەڭگەنى قۇرايتىن ينۆەست جوبانىڭ قۋاتتىلىعى جىلىنا 1 200 توننا ءونىم شىعارۋعا قاۋقارلى. 2023 جىلى جۇزەگە اسىرىلاتىن جوبانىڭ ناتيجەسىندە 200 ادام جۇمىسپەن قامتىلادى.
سونىمەن قاتار «SAN GRAND» جشس باسشىسى باعلان تاجەنوۆ «جۇلدىز» يندۋستريالدى ايماعىنداعى 9 گەكتار جەردە بىرنەشە جوبانى جۇزەگە اسىرماق. ونىڭ ءبىرىنشىسى – 13 ملرد تەڭگەنى قۇرايتىن سابيلەردىڭ جورگەگىن شىعاراتىن وتاندىق ءىرى كاسىپورىن بولسا, ەكىنشىسى – 9,3 ملرد تەڭگە بولاتىن شىنى تالشىقتى تەرەزە پروفيلدەرىنىڭ ءوندىرىسى. اتالعان جوبالاردى قولعا الۋ ارقىلى جۇمىسسىز جۇرگەن 300-گە جۋىق ازاماتقا كەلەشەكتە تۇراقتى جۇمىس تابىلادى.
بۇدان بولەك, «AnDa Company» جشس باسشىسى دميتري تارانوۆ بيوفارماتسەۆتيكالىق زاۋىتتىڭ جوباسىمەن تانىستىردى. جىلىنا 500 مىڭ دوزا ۆاكتسينا شىعاراتىن قۋاتتى ءوندىرىس وشاعى «تاسساي» يندۋستريالدى ايماعىنان سالىنادى. جوبانىڭ قۇنى – 1 800 ملن تەڭگە. نىسان قۇرىلىسى 2023-2024 جىلدارعا جوسپارلانعان. قۇرىلىس اياقتالعان ساتتە 35 ازامات تۇراقتى جۇمىسپەن قامتىلادى. ينۆەستور اتالعان جوبانى ىسكە اسىرۋ ءۇشىن جەرگىلىكتى اكىمدىكتەن قۇرىلىس نىسانىن ەلەكتر جارىعىمەن, گاز, اۋىز سۋ, اعىن سۋمەن جانە بايلانىسپەن قامتاماسىز ەتۋدى سۇراپ وتىر.
شتاب وتىرىسىندا بۇدان باسقا اياق كيىم, كارتون قوراپتارىن شىعاراتىن, دەنساۋلىق سالاسىنا قاجەتتى پرەپاراتتار وندىرەتىن, تۇرعىن ءۇي جانە كوتتەدج قۇرىلىسىنا قاجەتتى تاعى باسقا دا ءىرى وننان استام جوبا قارالدى. قالا اكىمى اربىرىمەن جەكە تانىسىپ, مەملەكەتتىك قولداۋ تۇرلەرى مەن شاھاردىڭ بۇل تۇرعىداعى جوعارى مۇمكىندىكتەرىن بايانداپ, بارلىعىن زەردەلەپ شىعۋ ءۇشىن جەتەكشى سالا باسشىلارىنا ارنايى تاپسىرمالار جۇكتەدى.
باستى جاڭالىقتىڭ ءبىرى, بيىل جىل سوڭىنا دەيىن دارىلىك زاتتار مەن گيگيەنالىق ونىمدەر وندىرەتىن وزبەكستاندىق «Dentafill» جانە ش ۇلىق وندىرىسىمەن اينالىساتىن تۇركيالىق «Ekol Ihracat» زاۋىتتارىن ىسكە قوسۋ كوزدەلىپ وتىر. سونىمەن قاتار شتاب جيىنىندا 35 ەلدىڭ 310 كومپانياسىن قالاعا ينۆەستيتسيا قۇيۋعا شاقىرۋ ماسەلەسى كۇن تارتىبىنە شىعارىلدى. قازىرگى تاڭدا اقش-تىڭ مەديتسينالىق جابدىقتار وندىرەتىن «GE Healthcare» كومپانياسىمەن, تۇرمىستىق-تەحنيكالىق جابدىقتار ءوندىرىسىنىڭ كوشباسشىسى «Haier», يتاليالىق «Maire Tecnimont», جاپوندىق «RP Canon Medical Systems» سىندى 8 الىپ كومپانيانى شىمكەنتكە تارتۋ بويىنشا كەلىسسوزدەر جۇرگىزىلىپ جاتىر.
شىمكەنت
