ء«بىر قاباتتى شىعىس» وڭىرلىك جوباسى اياسىندا سالىنعان جاڭا تۇرعىن ۇيلەرگە قول جەتكىزۋ كوپبالالى وتباسىلار ءۇشىن كوپتەن كۇتكەن ءسات ەدى. ماسەلەن, وسى باعدارلاما بويىنشا گلۋبوكوە اۋدانىندا 10 وتباسى, تارباعاتاي اۋدانىندا 6 وتباسى, ۇلان اۋدانىنا قاراستى گەراسيموۆكا اۋىلىندا 12 وتباسى جانە ساعىر اۋىلىندا 6 وتباسىنا پاتەر كىلتى تابىستالدى.
– بىزگە بۇگىن باسپانالى بولۋ باقىتى بۇيىردى. پرەزيدەنت قاسىم-جومارت توقاەۆتىڭ تاپسىرماسى بويىنشا ءۇيلى بولىپ جاتقان جايىمىز بار. ء«ۇيى جوقتىڭ كۇيى جوق» دەۋشى ەدى عوي. بۇيىرسا, ءۇيلى, كۇيلى كۇندەرگە قادام باستىق. ءبىز ەل يگىلىگى ءۇشىن جۇمىس ىستەيتىن بارلىق قىزمەتكەرلەرگە جانە وسى ۇيلەردىڭ قۇرىلىسىن جۇرگىزگەن قۇرىلىسشىلارعا العىسىمىزدى بىلدىرەمىز. بارشاڭىزعا اماندىق, بالالارىڭىزعا جارقىن بولاشاق تىلەيمىن! – دەپ جۇرەكجاردى لەبىزىن ءبىلدىردى گلۋبوكوە اۋدانىنىڭ تۇرعىنى مەرۋەرت ماحتيەۆا.
گلۋبوكوە اۋدانىنىڭ اكىمدىگىندە اتاپ وتكەندەي, گلۋبوكوە كەنتىندە 2021 جىلى ء«بىر قاباتتى شىعىس» باعدارلاماسى بويىنشا 20 جاڭا وتباسى قونىستانعان. ال 2022 جىلى تاعى 10 جاڭا ءۇي سالىندى. بۇل جاقسى كورسەتكىش دەۋگە نەگىز بار. ۇيلەردىڭ ساپاسى دا كوپتىڭ كوڭىلىنەن شىعىپ جاتىر.
ۇلان اۋدانىندا دا ەكىنشى جىل قاتارىنان ء«بىر قاباتتى شىعىس» باعدارلاماسى جۇزەگە اسىرىلىپ جاتىر. ساعىر اۋىلىنىڭ تۇرعىنى كۇلپاش دالەلدىڭ ايتۋىنشا, رەسپۋبليكا كۇنى مەرەكەسىنىڭ ماڭىزى ءۇي العان وتباسىلارى ءۇشىن ەكى ەسە ارتادى.
– مەرەكەلىك شاراعا وتە قۋانىشتىمىز. ەندى جىل سايىن رەسپۋبليكا كۇنى ءۇيلى بولدىق دەپ تويلاتىپ جاتاتىن شىعارمىز, – دەيدى ۇلان اۋدانىنىڭ تۇرعىنى كۇلپاش دالەل.
سونىمەن قاتار بۇل كۇندەرى وبلىستىڭ بىرقاتار اۋدانىندا جاڭا الەۋمەتتىك نىساندار اشىلدى. زايسان اۋدانىندا اۋداندىق مەشىت جانىنداعى جاڭا مادەنيەت ءۇيى مەن مەدرەسە مەكەمەسىنىڭ سالتاناتتى اشىلۋى ءوتتى. شەمونايحا اۋدانىندا دەنە شىنىقتىرۋ-ساۋىقتىرۋ كەشەنىنىڭ لەنتاسى قيىلدى. كەشەننىڭ اشىلۋىن اسىعا كۇتكەن جاستار مەملەكەت باسشىسىنىڭ حالىق ۇنىنە قۇلاق اسىپ جاتقانىن ايتىپ, ريزاشىلىعىن ءبىلدىردى.
– اۋدان جاستارىنا بوس ۋاقىتىن ءتيىمدى وتكىزەتىن ورىن وتە كەرەك ەدى. بۇل تۋرالى بۇرىن دا ايتىلعان. تەگى, تۇرعىنداردىڭ ۇسىنىسى قۇزىرلى ورگاندارعا جەتتى مە, ايتەۋىر تەز ارادا دەنە شىنىقتىرۋ-ساۋىقتىرۋ كەشەنى بوي كوتەردى. العىس ايتامىز, – دەدى شەمونايحا اۋدانىنىڭ تۇرعىنى ەكاتەرينا بەيسەمباەۆا.
مەرەكە كۇندەرى شىعىس قازاقستان وبلىسىندا تۇرعىن ۇيلەرمەن قاتار, وننان استام الەۋمەتتىك نىسان پايدالانۋعا بەرىلدى.
شىعىس قازاقستان وبلىسى
