ءسويتىپ كەپىلسىز تۇتىنۋشىلىق قارىز الىپ, قيىن جاعدايدا قالعان 500 مىڭنان استام ازاماتتىڭ – كوپبالالى, اسىراۋشىسىنان ايىرىلعان جانە مۇگەدەكتىگى بار بالالاردى تاربيەلەپ وتىرعان وتباسىلاردىڭ, اتاۋلى əلەۋمەتتىك كومەك الاتىن ازاماتتاردىڭ, جەتىم بالالاردىڭ شامامەن 115 ملرد تەڭگە قارىزى ءبىر جولعى تارتىپپەن كەشىرىلگەن. بۇعان قوسا, 1,2 ملن ازاماتتىڭ 33,6 ملرد تەڭگە سوماسىنداعى ايىپپۇلدارى مەن ءوسىمپۇلدارى وتەلگەن.
سول جىلعى 2 قىركۇيەكتە جاريالاعان «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى العاشقى جولداۋىندا مەملەكەت باسشىسى الەۋمەتتىك تۇرعىدان ءالسىز توپتاردىڭ تىم كوپ نەسيە الۋىنا تاعى دا نازار اۋدارىپ, ۇكىمەت پەن ۇلتتىق بانككە ەكى اي ىشىندە مۇنداي جاعدايدىڭ قايتالانباۋىنا كەپىلدىك بەرەتىن تەتىكتەردى ەنگىزۋدى تاپسىرعان. ناتيجەسىندە, ۇلتتىق بانك باسقارماسى 2019 جىلعى 26 قاراشادا «ميكروكرەديت بەرۋ تۋرالى شارت بويىنشا سىياقىنىڭ شەكتى ءمانىن بەلگىلەۋ تۋرالى» №209 قاۋلىسىن قابىلداپ, ول ادىلەت مينيسترلىگىندە تىركەۋدەن وتكەن سوڭ, 2020 جىلدىڭ 1 قاڭتارىنان باستاپ كۇشىنە ەندى.
اتالعان نورماتيۆتىك-قۇقىقتىق اكتىدە جەكە تۇلعامەن جاسالعان ميكروكرەديت بەرۋ تۋرالى شارت بويىنشا سىياقىنىڭ شەكتى ءمانى م ۇلىك كەپىلىمەن قامتاماسىز ەتىلگەن جاعدايدا بەرىلگەن ميكروكرەديت سوماسىنىڭ 20 پايىزى مولشەرىندە, ال م ۇلىك كەپىلىمەن قامتاماسىز ەتىلمەگەن جاعدايدا بەرىلگەن ميكروكرەديت سوماسىنىڭ 25 پايىزى مولشەرىندە بەلگىلەنگەن. ول رەسپۋبليكا اۋماعىندا ەكىنشى دەڭگەيلى بانكتەر مەن ميكروقارجى ۇيىمدارىنىڭ بارلىعى ءوز قىزمەتىندە بۇلجىتپاي باسشىلىققا الۋعا مىندەتتى قۇجات بولىپ سانالادى. الايدا كوپتەگەن ميكروقارجى ۇيىمى وعان «پىسقىرىپ» تا قاراماي, بۇرىنعىشا شەكتەۋسىز وسىمقورلىعىن ەشكىمنەن يمەنبەي جالعاستىرىپ, تابىسى تومەن ادامداردىڭ قانىن تەسپەي سورعانداي وزبىرلىق كورسەتىپ وتىر.
مىسالى, استانا قالاسىنداعى ءبىر ميكروقارجى ۇيىمى وتكەن جىلعى قاراشا ايىندا ك. دەگەن ازاماتقا 45 پايىزدىق جىلدىق سىياقى مولشەرلەمەسىمەن 400 مىڭ تەڭگە ميكروكرەديت بەرۋ تۋرالى شارت جاساسىپتى. التى ايدان سوڭ الدەبىر سەبەپپەن ءتيىستى تولەمدى تولەۋگە جاعدايى كەلمەگەن ازاماتتى ميكروقارجى ۇيىمى ەندى سوتقا بەرىپ وتىر. بۇل رەتتە ءبىزدى قىزىقتىراتىن جايت – سوت ميكروقارجى ۇيىمى ۇلتتىق بانك باسقارماسىنىڭ №209 قاۋلىسىنىڭ تالابىن ورىنداماعانىن ەسكەرىپ, ونىڭ ازامات ك.-مەن جاساعان شارتىن زاڭسىز دەپ تانىر ما ەكەن؟
جالپى, ەلىمىزدە وسى جىلدىڭ ءبىرىنشى جارتىسىندا ميكروقارجى ۇيىمدارىنا بەرەشەگىن 90 كۇننەن استام وتەمەگەن 550 مىڭ قارىز الۋشى بار ەكەن. ولاردىڭ اراسىندا جىلدىق سىياقى مولشەرلەمەسى 30 مىڭ پايىزعا دەيىن جەتكەن قارىزگەرلەر دە بار بولىپ شىقتى. جوقشىلىق ەكى بۇيىرىنەن قىسىپ, ەڭسەسىنەن ەزگەندە ەسى شىعىپ, كوزىنە «دالادا تەگىننەن-تەگىن جاتقان باتپانقۇيرىقتاي» بولىپ كورىنگەن قارىز شارتىن مۇقيات وقىماستان قولىن قويا سالعانىمەن, كىرىپتارلىققا تۇسكەنىن كەيىن تۇسىنگەن بورىشكەرلەردىڭ ءبىر بولىگى مۇنداي جۇگەنسىزدىككە شىداماي, قارىزدارىن تولەۋدەن ادەيى باس تارتاتىن كورىنەدى. بىراق ولاردىڭ ىشىندە سوتقا جۇگىنىپ, وزدەرىنىڭ اياققا باسىلعان قۇقىقتارىن قورعاپ جۇرگەن ازاماتتار نەكەن-ساياق ەكەن.
ال قولدانىستاعى زاڭنامانى بىلمەگەندىكتەن, ميكروقارجى ۇيىمدارىنا سىياقى مولشەرلەمەسى بەلگىلەنگەن شەكتەن الدەقايدا جوعارى قارىزىن اي سايىن ارەڭ تولەپ, زار يلەپ جۇرگەن قازاقستاندىقتاردىڭ سانى قانشا ەكەنى ءبىر اللاعا عانا ايان. «ەشتەن كەش جاقسى» دەمەكشى, ونداي ازاماتتاردىڭ دا ادىلدىك ىزدەپ سوتقا جۇگىنىپ, ارتىق تولەپ كەلگەن قاراجاتىن قايتارىپ الۋعا زاڭدى قۇقىعى بار. وسى ورايدا ولارعا قارجى نارىعىن رەتتەۋ جانە دامىتۋ اگەنتتىگى كومەك كورسەتىپ, اراندارىن اشقان تويىمسىز ميكروقارجى ۇيىمدارىن تارتىپكە شاقىراتىن ۋاقىتى جەتتى دەپ ويلايمىز.
