فەستيۆالعا قاتىسقان جەرگىلىكتى نەمىس ەتنومادەني بىرلەستىگىنىڭ وكىلدەرى وزدەرىنىڭ شىعارماشىلىق, اسپازدىق, ىسمەرلىك ونەرىن كورسەتتى. مەرەكەگە جينالعان كوپشىلىك نەمىستىڭ ۇلتتىق تاعامدارىنان اۋىز ءتيدى.
وتىز جىل بويى «ۆوزروجدەنيە» بىرلەستىگىنە جەتەكشىلىك ەتىپ كەلە جاتقان ەلەنا رۋسسماننىڭ ايتۋىنشا, بۇگىندە قازاقستاندا نەمىس ۇلتىنىڭ 171 مىڭنان استام وكىلى تۇرادى. ونىڭ شامامەن 25 مىڭدايى قوستاناي وبلىسىن مەكەن ەتكەن.
فەستيۆالگە استانا قالاسىنان ارنايى كەلگەن زارينا فەللەر دە ەلىمىزدەگى نەمىس ەتنومادەني بىرلەستىكتەرى اتقارىپ جاتقان يگى شارالارعا بەلسەندى اتسالىسىپ ءجۇر.
– اتا-بابالارىمىز قازاق توپىراعىنا 1940 جىلدارى جەر اۋدارىلىپ كەلگەن. سول كىسىلەردەن ءوسىپ-ونگەن ۇرپاقپىز. ءوز باسىم ۇلتتىق ورتالىقتار ءجيى وتكىزىپ تۇراتىن مەرەكەلەرگە وسىدان ەكى جىل بۇرىن عانا نەمىس مەكتەپ-گيمنازياسىندا وقيتىن قىزىمنىڭ ىقپالىمەن شىنداپ ارالاسا باستادىم. قازىر قىزىم نەمىس ءتىلىن اجەپتاۋىر مەڭگەرىپ الدى. ءوزىم دە ءتىل ۇيرەتۋ كۋرستارىنا بارىپ, ءوز ۇلتىمنىڭ تاريحىن, مادەنيەتىن تەرەڭىرەك وقىپ-ءبىلىپ جاتىرمىن, – دەيدى زارينا.
«Begeisterung» فەستيۆالىنە وڭىردە جۇمىس ىستەپ جاتقان وزگە دە ۇلتتىق-مادەني ورتالىقتاردىڭ وكىلدەرى قاتىستى. ولاردىڭ ايتۋىنشا, مۇنداي مادەني-تانىمدىق مەرەكەلەر ەلىمىزدە تاتۋ-ءتاتتى بەيبىت ءومىر ءسۇرىپ جاتقان ەتنوستاردىڭ بىرلىگىن ارتتىرىپ, تۇرمىسىن اجارلاندىرا تۇسەدى.
– بۇعان دەيىن ءبىز قازاق, سلاۆيان, تاتار جانە باشقۇرت مادەنيەتى فەستيۆالدەرىن وتكىزدىك. بۇگىنگى فەستيۆال جىل بويى اتقارىپ كەلە جاتقان ءىس-شارالارىمىزدىڭ زاڭدى جالعاسى. مۇنداي مەرەكەلەردى وتكىزۋدەگى باستى ماقساتىمىز – كوپشىلىك قاۋىمعا وبلىسىمىزدا ءومىر ءسۇرىپ جاتقان ۇلت وكىلدەرىنىڭ مادەنيەتى مەن سالت-داستۇرلەرىن ناسيحاتتاۋ. ولاردىڭ اراسىنان شىققان قايراتكەر ازاماتتاردىڭ ەلگە سىڭىرگەن ەڭبەگىن دارىپتەۋ, – دەيدى قوستانايداعى دوستىق ءۇيىنىڭ ديرەكتورى ناتاليا رامازانوۆا.
قوستاناي وبلىسى
