قىرعىز كينوسى كۇندەرىنىڭ اشىلۋىمەن باستالعان ءىس-شارالار كورمەلەر مەن كونتسەرتتەرگە, دوڭگەلەك ۇستەل مەن سپەكتاكلگە ۇلاستى. ماسەلەن, كينوكورسەتىلىم كۇندەرىندە «اكىركى كوچ» (رەجيسسەرى ب.مۇقۇل), «داراك ىرى» (رەجيسسەرى ا.دايىربەكوۆ), «شامبالا» (رەجيسسەرى ا.سۋيۋندۋكوۆ), «كول» (رەجيسسەرى ا.سۋيۋندۋكوۆ) كارتينالارى ۇسىنىلدى.
سونداي-اق مادەنيەت جانە سپورت ءمينيسترى داۋرەن اباەۆ قىرعىز رەسپۋبليكاسىنىڭ مادەنيەت, اقپارات, سپورت جانە جاستار ساياساتى ءمينيسترى التىنبەك ماقسۇتوۆپەن كەزدەسىپ, ەكى ەل اراسىنداعى مادەني-گۋمانيتارلىق ىنتىماقتاستىق ماسەلەلەرى, اتاپ ايتقاندا, استانادا ماناس ەسكەرتكىشىن ورناتۋ, «ەۋرازيا» كينوفەستيۆالىن جانە كوشپەلىلەردىڭ دۇنيەجۇزىلىك ويىندارىن وتكىزۋ ماسەلەلەرى تالقىلاندى.
ودان بولەك ۇلتتىق اكادەميالىق كىتاپحانادا ەكى ەلدىڭ زيالى قاۋىم وكىلدەرىنىڭ قاتىسۋىمەن «تۇركى الەمىنىڭ قوس الىبى: اۋەزوۆ جانە ايتماتوۆ» فورۋمى ءوتتى. ءىس-شارا, ەڭ الدىمەن ەكى ەل اراسىنداعى گۋمانيتارلىق بايلانىستاردى نىعايتۋدى ماقسات ەتتى. اتاپ ايتقاندا, تاراپتار ەكى زاڭعار جازۋشى مۇحتار اۋەزوۆ پەن شىڭعىس ايتماتوۆ شىعارماشىلىعىنىڭ مادەنيەتارالىق ىنتىماقتاستىقتاعى ءرولىن تالقىلادى. فورۋم جۇمىسىنا مەملەكەتتىك ورگانداردىڭ وكىلدەرى, قوعام قايراتكەرلەرى, قازاقستان مەن قىرعىز رەسپۋبليكاسىنىڭ شىعارماشىلىق جانە عىلىمي زيالى قاۋىمى قاتىستى.
ال ۇلتتىق مۋزەيدە قىرعىز سۋرەتشىلەرىنىڭ شىعارماشىلىعىنا قۇرىلعان «باستاۋ» كورمەسى اشىلدى. ءدال وسى كۇنى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترى ساحناسىندا قىرعىز ونەر شەبەرلەرىنىڭ گالا-كونتسەرتى ءوتتى. اتالعان كەشكە مەملەكەت باسشىسى قاسىم-جومارت توقاەۆ, قىرعىزستان پرەزيدەنتى سادىر جاپاروۆ جانە ەۋروپالىق كەڭەس پرەزيدەنتى شارل ميشەل قاتىستى. پرەزيدەنتتەر قىرعىزستاننىڭ ۇلتتىق تاريحي مۇراجايىنىڭ كوللەكتسياسى قويىلعان «ىقىلىم مۇراسى» كورمەسىمەن تانىستى. ال ساحنادا «ماناس» ەپوسىنان ءۇزىندى وقىلىپ, حالىق اقىنى توقتوعۇل ساتىلعانوۆتىڭ ساناتتارى (ديداكتيكالىق ولەڭدەرى) ورىندالدى. سونداي-اق حالىق جازۋشىسى شىڭعىس ايتماتوۆتىڭ شىعارمالارىنان ۇزىندىلەر قويىلدى.
سونىمەن قاتار قازاق جانە قىرعىز حالىقتارىنىڭ باۋىرلاستىعىن دارىپتەۋ ماقساتىندا قىرعىز ونەرپازدارى شوقان ءۋاليحانوۆ, اباي قۇنانباي ۇلى, جامبىل جاباەۆ, مۇحتار اۋەزوۆ سياقتى تۇلعالارىمىزدىڭ بەينەسىن سومداپ, ەكى حالىققا كەڭ تاراعان ءان-كۇيلەردى ورىندادى.
ال كەلەسى كۇنى «ماناس» ەپوسىنا ارنالعان كونتسەرت جانە نۇردين تۇگەلوۆ اتىنداعى «اق مارال» مەملەكەتتىك بي ءانسامبلى مەن چالاگىز يساباەۆ اتىنداعى «قامبارقان» فولكلورلىق-ەتنوگرافيالىق ءانسامبلىنىڭ كونتسەرتى ۇسىنىلدى.
قىرعىز مادەنيەتى كۇندەرىنىڭ سالتاناتتى جابىلۋىندا توقتوبولوت ءابدىمومىنوۆ اتىنداعى قىرعىز ۇلتتىق اكادەميالىق دراما تەاترىنىڭ «سامانچىنىن جولۋ» سپەكتاكلى قويىلدى. ايتا كەتەيىك, بۇل شىڭعىس ايتماتوۆتىڭ «قۇس جولى» شىعارماسىنىڭ جەلىسىمەن قويىلعان. سپەكتاكلدىڭ رەجيسسەرى مارات كوزۋكەەۆ. شىعارمادا ادامزات بالاسىنىڭ سوعىسقا قارسىلىعى, ءبىر تاعدىر ارقىلى جەر بەتىندەگى بارشا ايەلدىڭ تراگەدياسى, ءومىر ءۇشىن كۇرەس سۋرەتتەلەدى. قويىلىم اتالعان تەاتر رەپەرتۋارىنا جۋىردا قوسىلعان.
سالتاناتتى راسىمگە قاتىسقان قازاقستاننىڭ مادەنيەت جانە سپورت ۆيتسە-ءمينيسترى نۇرعيسا داۋەشوۆ, ەڭ الدىمەن قىرعىز دەلەگاتسياسىنا العىس ايتتى.
«قىرعىزستاننىڭ مادەنيەتى كۇندەرى دەلەگاتسياسىن باستاپ كەلگەن التىنبەك ماقسۇتوۆ مىرزاعا العىس بىلدىرەمىن. سونىمەن قاتار مادەني ءىس-شاراعا قاتىسقان 300-دەن استام حالىق ارتىستەرى, حالىق اقىن-جازۋشىلارى, كينو مايتالماندارى, عىلىم دوكتورلارى جانە كسرو حالىق ءارتىسى سامارا توقتاقۇنوۆا باستاعان قوعام قايراتكەرلەرىنە زور العىس ايتامىن. ال بۇگىن, قىرعىزستاننىڭ قازاقستانداعى مادەنيەتى كۇندەرىنىڭ توقبولوت ابدۋمومۋنوۆ اتىنداعى قىرعىز ۇلتتىق اكادەميالىق دراما تەاترىنىڭ «سامانچىنىن جولى» قويىلىمىمەن اياقتالۋىنىڭ ءوزى سيمۆوليكالىق مانگە يە», دەدى ۆيتسە-مينيستر.
سونداي-اق ول قىرعىزستاننىڭ تەاتر ونەرىمەن تانىسۋىمىز مۇنىمەن بىتپەيتىنىن, قاراشانىڭ 1-7 كۇندەرى ارالىعىندا الماتى قالاسىندا وتەتىن ورتالىق ازيا ەلدەرىنىڭ حالىقارالىق تەاتر فەستيۆالى اياسىندا ءوز جالعاسىن تاباتىنىن اتاپ ءوتتى.
قىرعىز رەسپۋبليكاسىنىڭ مادەنيەت, اقپارات, سپورت جانە جاستار ساياساتى ءمينيسترى التىنبەك ماقسۇتوۆ تا قازاقستاندىق تاراپقا ءىس-شارالاردىڭ جوعارى دەڭگەيدە ۇيىمداستىرىلعانى ءۇشىن ريزاشىلىعىن ءبىلدىردى.
«ۇلتتار اراسىنداعى مادەني بايلانىستاردى نىعايتۋ ماقساتىندا جىل سايىن ءتۇرلى حالىقارالىق ءىس-شارالار وتكىزىپ كەلەمىز. الايدا قازاقستانداعى بۇگىنگى مادەنيەت كۇندەرىمىزدىڭ ماڭىزى ەرەكشە. قىرعىز بەن قازاقتىڭ ءبىر تۋعانداي جاقىن ەكەنى تاريحتا دالەلدەنگەن. ەكى حالىقتىڭ ونەرى مەن مادەنيەتى, سالت-ءداستۇرى تەرەڭنەن تامىر تارتادى. قىرعىز مادەنيەتى كۇندەرى اياسىندا وتكەن ءار تاراپتاعى ءىس-شارالار جاقسى دەڭگەيدە ۇيىمداستىرىلدى. سول ءۇشىن العىس ايتامىن. الداعى ۋاقىتتا ەكى جاقتى مادەني, ادەبي, سپورت, جاستار سالاسىنداعى بايلانىستار بەكي تۇسەدى دەگەن سەنىمدەمىن», دەدى قىرعىز ءمينيسترى.
ايتا كەتەيىك, قىرعىزستان مادەنيەتى كۇندەرى دەلەگاتسياسىن قىرعىز رەسپۋبليكاسى مادەنيەت, اقپارات, سپورت جانە جاستار ساياساتىنىڭ ءمينيسترى التىنبەك ماقسۇتوۆ باسقارىپ كەلدى. مادەني ءىس-شاراعا قىرعىزستاننان 300-دەن استام ادام قاتىستى. اتاپ ايتساق, حالىق ارتىستەرى, حالىق اقىن-جازۋشىلارى, كينو مايتالماندارى, عىلىم دوكتورلارى جانە كسرو حالىق ءارتىسى سامارا توقتاقۇنوۆا باستاعان قوعام قايراتكەرلەرى, توقتوبولوت ءابدىمومىنوۆ اتىنداعى قىرعىز ۇلتتىق اكادەميالىق دراما تەاترى, ءابدىلاس مالدىباەۆ اتىنداعى قىرعىز ۇلتتىق اكادەميالىق وپەرا جانە بالەت تەاترى, كامەرالىق حور جانە كامەرالىق وركەستر توقتوعۇل ساتىلعانوۆ اتىنداعى قىرعىز ۇلتتىق فيلارمونياسى, نۇردين تۇگەلوۆ اتىنداعى «اق مارال» مەملەكەتتىك بي ءانسامبلى, شالاعىز يساباەۆ اتىنداعى «قامبارقان» فولكلورلىق-ەتنوگرافيالىق ءانسامبلى, قارامولدو وروزوۆ اتىنداعى حالىق اسپاپتار اكادەميالىق وركەسترى, اسانقان جۇماحماتوۆ اتىنداعى مەملەكەتتىك اكادەميالىق سيمفونيالىق وركەسترى, «ماناس» ۇلتتىق تەاترى, قىرعىزستان جازۋشىلارى, سۋرەتشىلەرى مەن كينەماتوگرافيستەر وداعى, قىرعىزستان ۇلتتىق تاريحي مۋزەيى, «اقاق» كومۋزيستەرى, ديزاينەرلەر مەن رەجيسسەرلەر بار.
