قاراقات ابدەن ءۇشىن بۇل مەرەكەنىڭ ورنى ەرەكشە ەكەندىگى بەلگىلى بولدى. «مەنى پرەزيدەنتتىككە كانديدات رەتىندە «كاسىبي الەۋمەتتىك قىزمەتكەرلەردىڭ ۇلتتىق اليانسى» ۇسىنعان بولاتىن. الەۋمەتتىك قىزمەتتىڭ ەلىمىز ءۇشىن قانشالىقتى ماڭىزدى ەكەنىن جاقسى بىلەمىن. كوپ جاعدايدا الەۋمەتتىك قىزمەتكەرلەردىڭ قيىن جۇمىسى كوپشىلىككە كورىنبەيدى. سونداي-اق بۇل سالادا ەڭبەك ەتەتىن جانداردىڭ 90% ايەلدەر قاۋىمى قۇرايدى. جالپى, الەۋمەتتىك قىزمەتكەرلەردىڭ جۇمىسىنا مەملەكەت تاراپىنان كوبىرەك كوڭىل ءبولىنۋ كەرەك دەپ سانايمىن», دەدى ق.ابدەن.
جيىن بارىسىندا پرەزيدەنتتىككە ۇمىتكەر ءوزىنىڭ سايلاۋالدى باعدارلاماسىن تانىستىرىپ, الەۋمەتتىك سالانى جەتىلدىرۋگە, قاريالارعا ارنالعان جەڭىلدىكتەردى كوبەيتۋگە قاتىستى سۇراقتار مەن ۇسىنىستاردى تالقىلادى.
بۇعان دەيىن ق.ابدەن پاۆلودار قالاسىنىڭ سايلاۋشىلارىمەن كەزدەسۋ وتكىزگەن بولاتىن. كانديدات ۇستازدارمەن جۇزدەسىپ, ءبىلىم بەرۋ سالاسىنداعى وزەكتى ماسەلەلەرگە نازار اۋداردى. «ستۋدەنتتەر, ءبىلىم الۋشى جاستار – ەلىمىزدىڭ بولاشاعى, ال ۇستازدار – قوعامداعى ورنى ەرەكشە تۇلعالار. سايلاۋالدى باعدارلامادا ءبىلىم بەرۋ سالاسىن جەتىلدىرۋگە كوپ كوڭىل بولىنگەن. اسىرەسە, ءبىلىم الۋشىلار ءۇشىن جوعارى ءبىلىمنىڭ تەگىن بولۋى, ولاردىڭ جاتاقحانامەن, يننوۆاتسيالىق قۇرال-جابدىقتارمەن قامتاماسىز ەتىلۋى اسا وزەكتى», دەدى كانديدات.
