ۇسىنىستاردىڭ كوبى الەۋمەتتىك قامسىزداندىرۋ سالاسىنا – 598 (21,2%), تۇرعىن ءۇي-كوممۋنالدىق شارۋاشىلىققا – 492 (17,4%), جەر قاتىناستارىنا – 358 (12,7%), بىلىمگە – 210 (7,4%) قاتىستى بولدى.
«ازاماتتار كانديداتتان نە قالايتىنىن, نە كۇتەتىنىن ايتىپ, ءوز ۇسىنىستارىمەن كەلىپ جاتىر. جاڭا قازاقستاندى قۇرۋ ىسىنە قاتىستى كوپ ادامنىڭ وزىندىك ۇسىنىستارى, پرەزيدەنتتىككە كانديداتتان نە كۇتەتىندەرى تۋرالى پايىم-پىكىرلەرى بار. ءار پىكىر ءجىتى نازارعا الىناتىن بولادى. بۇل – «حالىق ۇنىنە قۇلاق اساتىن مەملەكەت» تۇجىرىمداماسىنىڭ ورىندالىپ جاتقانىنىڭ ايقىن كورىنىسى. سونداي-اق سايلاۋعا قاتىستى كەز كەلگەن ماسەلە بويىنشا كەڭەس الۋعا بولاتىن Call-ورتالىق جۇمىس ىستەيدى», دەدى كانديداتتىڭ رەسپۋبليكالىق قوعامدىق قابىلداۋ بولمەسىنىڭ باسشىسى ءاليا سادىرباەۆا.
بۇگىندە ەل اۋماعىنداعى 227 قابىلداۋ بولمەسىندە سايلاۋشىلارمەن كەزدەسۋلەر ءوتىپ جاتىر. اتاپ ايتقاندا, وسى ۋاقىت ارالىعىندا 689 كەزدەسۋ ۇيىمداستىرىلىپ, 2 مىڭنان استام ادام قابىلداندى. ايتا كەتەيىك, كانديداتتىڭ قوعامدىق قابىلداۋ بولمەسىنە جەكە كەلۋمەن قاتار, ازاماتتار قاسىم-جومارت توقاەۆقا ارناعان ۇسىنىستارىن, تىلەك حاتتارىن toqaev2022.kz سايتىنا جولداي الادى نەمەسە بەينەحابارلاما جۇكتەۋىنە بولادى.
