شاراينا
ۋكرايناداعى ۋچاسكەلىك سايلاۋ كوميسسيالارى 25 مامىر كۇنى وتكەن كەزەكتەن تىس ەل پرەزيدەنتىن سايلاۋ بويىنشا داۋىستاردى ەسەپتەپ شىعاردى. بۇل تۋرالى ۋكراينا ورتالىق سايلاۋ كوميسسياسىنىڭ توراعاسى ميحايل وحەندوۆسكي حابارلادى.
سايلاۋشىلاردىڭ داۋىستارىن ساناۋ بارلىق سايلاۋ ۋچاسكەلەرىندە اياقتالدى, دەدى وسك توراعاسى. ونىڭ سوزىنە قاراعاندا, ۋچاسكەلىك سايلاۋ كوميسسيالارىنداعى بارلىق حاتتامالار مازمۇنى تۋرالى اقپاراتتار وكرۋگتىك سايلاۋ كوميسسيالارى ولاردىڭ دۇرىستىعىن تەكسەرىپ بىتكەنشە قولجەتىمسىز بولاتىنى تۇسىنىكتى. وسىدان كەيىن-اق دەرەكتەر «سايلاۋ» جۇيەسىنە ەنگىزىلەدى ەكەن. سوڭعى مالىمەت بويىنشا, وسك حاتتامالاردىڭ 60,15 پايىزىن قاراپ بولعان. بيزنەسمەن پەتر پوروشەنكو 53,72 پايىز داۋىسپەن جەكە-دارا كوش باستاپ تۇر.
تايلاندتاعى اسكەري توڭكەرىس
22 مامىردا تايلاندتا كورولدىك ارمياسىنىڭ قولباسشىسى گەنەرال پرايۋت چان-وچانىڭ تىكەلەي باسشىلىعىمەن اسكەري توڭكەرىس جۇزەگە اسىرىلعانى بەلگىلى. بۇعان شەتى-شەگى جوق ساياسي داعدارىس پەن ۇكىمەتكە قارسى جانە ونى جاقتاۋشى دەمونسترانتتاردىڭ كەلىسىمگە كەلۋ مۇمكىندىگى جوقتىعى سەبەپ بولدى.
چان-وچا ەلدە بەيبىتشىلىك پەن ءتارتىپتى ۇستاپ تۇرۋ ءۇشىن ءوزى قۇرعان ۇلتتىق كەڭەسكە باسشىلىقتى قولىنا السا, ءسال كەيىنىرەك اسكەري ۇكىمەتتىڭ پرەمەر-ءمينيسترى ورىنتاعىنا دا يەلىك ەتە باستادى. اسكەري توڭكەرىس سالدارىنان كومەندانتتىق ساعات پەن باق-قا تسەنزۋرا ەنگىزىلىپ, كونستيتۋتسيانىڭ ءىس-ارەكەتى توقتاتىلدى جانە ەلدىڭ كورنەكتى ساياسي قايراتكەرلەرى تۇتقىندالدى. نارازىلىق بىلدىرۋشىلەردىڭ لاگەرلەرى قۋىلىپ, پارلامەنتتىڭ جوعارعى پالاتاسى – سەنات تاراتىلدى. پرەمەر-مينيستر چيناۆاتتىڭ قايدا جۇرگەنى بەلگىسىز.
وبامامەن كەزدەسۋدەن باس تارتتى
اقش پرەزيدەنتى باراك وباما اۋعانستانعا كۇتپەگەن ساپار جاساعان ەدى. ول ءوزىنىڭ اۋعاندىق ارىپتەسى حاميد كارزايمەن باگرامداعى اۆيابازادا كەزدەسپەك نيەت تانىتقان-تىن. الايدا كارزاي كابۋلدان باگرامعا كەلۋدەن باس تارتقان. بۇل اقپاراتتى «فرانس-پرەسس» اگەنتتىگى تاراتتى.
امەريكا اكىمشىلىگى مەن اۋعانستاننىڭ مەرزىمى اياقتالىپ, كەتىپ بارا جاتقان پرەزيدەنتى كارزاي اراسىنداعى قارىم-قاتىناس ونىڭ قاۋىپسىزدىك تۋرالى ەكى جاقتى كەلىسىمگە قول قويۋدان باس تارتقانىنان كەيىن كۇردەلەنىپ كەتكەنى بەلگىلى. ال كەلىسىمگە قول قويىلعان جاعدايدا اقش ءوزىنىڭ 2014 جىلدىڭ اياعىنا جوسپارلانعان نەگىزگى كونتينگەنتىن شىعارعاننان كەيىن وسىنداعى اسكەري قاتىسۋىن ساقتاپ قالۋعا مۇمكىندىك الاتىن ەدى. دەگەنمەن, وباما «ءنومىرى ءبىرىنشى بورتتان» كارزايعا تەلەفون ارقىلى حابارلاسىپ, پىكىر الىسقان كورىنەدى. 14 ماۋسىم كۇنى اۋعانستاندا وتەتىن سايلاۋدىڭ ەكىنشى تۋرىندا پرەزيدەنت لاۋازىمى ءۇشىن بۇرىنعى سىرتقى ىستەر ءمينيسترى ابدۋللا ابدۋللا مەن بۇرىنعى قارجى ءمينيسترى اشراف عاني احمادزاي تالاساتىن بولادى.
ۆويتسەح يارۋزەلسكي ومىردەن ءوتتى
25 مامىر كۇنى پولشانىڭ سوڭعى كوممۋنيستىك كوشباسشىسى ۆويتسەح يارۋزەلسكي قايتىس بولدى. وسى ايدىڭ باسىندا ول ينسۋلت السا كەرەك. سودان بەرى ءوز-وزىنە كەلە الماپتى. بۇل تۋرالى «فرانس-پرەسس» اگەنتتىگى اقپارات تاراتتى.
الداعى 6 شىلدەدە يارۋزەلسكي 91-گە تولاتىن ەدى. ول 1980-ءشى جىلداردىڭ باسىندا شىعىس ەۋروپانىڭ سوتسياليستىك ەلدەرىنە باسشىلىق جاساعانداردىڭ ىشىندە ءتىرى قالعان سوڭعى ادام بولاتىن. يارۋزەلسكي 1985 – 1989 جىلدارى پولشا حالىق رەسپۋبليكاسى مەملەكەتتىك كەڭەسىنىڭ توراعاسى قىزمەتىن اتقاردى. بۇل ەلدەگى ەڭ جوعارى لاۋازىم بولاتىن. 1989 جىلى پولشا رەسپۋبليكاسىنىڭ پرەزيدەنتى بولىپ سايلاندى. 1990 جىلى ساياسي ساحنادان كەتىپ, بيلىكتى سايلانعان پرەزيدەنت لەح ۆالەنساعا تاپسىرعان ەدى. ۆ.يارۋزەلسكي كەزىندە ەلدە جازاعا دا تارتىلماق بولعان. بىراق ونىڭ ەلگە ىستەگەنى ارتىلعان كىنادان سالماقتىراق دەلىنىپ, جازا قولدانىلماعان-تىن.
تاۋەلسىزدىك پارتياسى كوش باسىندا
جالپىەۋروپالىق سايلاۋدا بىرىككەن كورولدىكتىڭ تاۋەلسىزدىك پارتياسى كوش باسىندا كەلەدى. داۋىس بەرۋدىڭ ارالىق قورىتىندىلارىنا سايكەس, بارلىق وڭىرلەردىڭ تورتتەن ۇشىندە اتالعان پارتيا 29 پايىز جيناعان.
ال بيلەۋشى كونسەرۆاتورلار پارتياسى 29 پايىزبەن ەكىنشى ورىندا كەلەدى. ەۋروسكەپتيكتەردىڭ سەركەسى نايدجەل فارادج بۇل جولعى سايلاۋدى قازىردىڭ وزىندە بريتانيا ساياساتىندا سوڭعى ءجۇز جىلداعى ەڭ ەرەكشە سايلاۋ دەپ اتادى. ويتكەنى, تاۋەلسىزدىك پارتياسى ەۋروپارلامەنتتە وتكەن جىلعىعا قاراعاندا 9 ورىندى ارتىق الىپ, مانداتتارىنىڭ سانىن 22-گە جەتكىزدى. پرەمەر-مينيستر دەۆيد كەمەروننىڭ كونسەرۆاتورلار پارتياسى 16-ورىنعا يە بولدى. ال نەگىزگى وپپوزيتسيالىق پارتيا – لەيبوريستەر 14-ورىندى قاناعات تۇتتى. فارادجدىڭ پىكىرىنشە, ەۋروسكەپتيكتەردىڭ جەر-جەرلەردەگى تابىستارى كارى قۇرلىقتاعى ودان ارعى ينتەگراتسيا ماسەلەسىن تۇيىققا تىرەي تۇسپەك.
قىسقا قايىرىپ ايتقاندا:
*ەۋروپارلامەنتتىڭ جاڭا قۇرامىندا كوپشىلىك ورىن ەۋروپا حالىقتىق پارتياسىنا (212 ماندات) تيەتىن بولدى. 2009 جىلى وتكەن سايلاۋعا قاراعاندا بۇل ناشارلاۋ كورسەتكىش. سول جولى ەحپ 274 مانداتقا يە بولعان ەدى. بىراق, ەحپ-نىڭ شەبى ءالى دە مىقتى دەۋگە نەگىز بار.
ۇندىستانداعى تەمىر جول اپاتىنان كەم دەگەندە 20 ادام قازا تاپتى. وقيعا ۋتتار-پرادەش شتاتىنداعى حاليلاباد قالاسىنا جاقىن ماڭدا ورىن الدى. جۇردەك پويىز جۇك پويىزى ءجۇرىپ كەلە جاتقان جولعا شىعىپ كەتىپ, ەكى پويىز سوقتىعىسقان. سالدارىنان 6 جولاۋشى ۆاگونى اۋدارىلىپ قالعان.
*رەسەي-قىتاي اسكەريلەرىنىڭ جاتتىعۋلارى اياقتالدى. ول «تەڭىزدەگى ءوزارا ءىس-قيمىل-14» دەپ اتالدى. ونىڭ العاشقىسى 2012 جىلدىڭ ساۋىرىندە سارى تەڭىزدە ۇيىمداستىرىلسا, ەكىنشىسى بىلتىر جاپون تەڭىزىندە وتكەن ەدى. جاتتىعۋلارعا كوپتەگەن كورابلدەر مەن سۇڭگۋىر قايىقتار, ۇشاقتار مەن تىكۇشاقتار قاتىستىرىلىپ كەلەدى.
زابايكالە ۇشقىشتارى جىل سوڭىنا دەيىن سۋ-30سم دەپ اتالاتىن كوپماقساتتى جويعىش ۇشاقتاردىڭ جاڭا پارتياسىن الاتىن بولدى. زابايكالە رەسەيدىڭ شىعىس اسكەري وكرۋگىنە جاتادى. اتالعان وكرۋگكە بيىل 10 ۇشاق جەتكىزىلەتىن بولسا, كەلىسىمشارت جاسالعان ولاردىڭ جالپى سانى 30-دى قۇرايدى.
ينتەرنەت ماتەريالدارى نەگىزىندە ازىرلەندى.
