قازاقستاندىق جانە شەتەلدىك مەديا ساراپشىلاردىڭ باسىن استانادا قوسىپ, سالاداعى وزەكتى ماسەلەردى تالقىلاپ, ءتۇرلى ماستەر كلاستار ۇيىمداستىرىلعان ءىس-شاراعا مەملەكەت باسشىسى ارنايى قۇتتىقتاۋ حات جولدادى. قۇتتىقتاۋدى اقپارات جانە قوعامدىق دامۋ ءمينيسترى دارحان قىدىرالى وقىپ بەردى.
«Astana Media Week – اقپاراتتىق ىنتىماقتاستىقتى نىعايتۋعا, وتاندىق بۇقارالىق اقپارات قۇرالدارىنىڭ قازىرگى قوعامداعى ءرولى مەن الەۋەتىن ايشىقتاۋعا ارنالعان اۋقىمدى ديالوگ الاڭى.
الەمدىك ءداستۇرلى مەديا ماماندارى, حالىقارالىق ساراپشىلار قاتىساتىن كوممۋنيكاتسيا سالاسىنداعى كەزدەسۋلەر, تالقىلاۋلار مەن تاجىريبە الماسۋلار وتاندىق مەديانىڭ دامۋىنا تىڭ سەرپىن بەرەدى», دەپ باعا بەردى پرەزيدەنت مەديا اپتالىق جۇمىسىنا.
سونداي-اق قۇتتىقتاۋدا «اقپارات سالاسى ازاماتتىق قوعامنىڭ قالىپتاسۋىنا ەرەكشە ۇلەس قوسىپ كەلەدى. ازاماتتار ءوز پىكىرىن ەركىن جەتكىزىپ, جۋرناليستەر قوعامداعى وزەكتى ماسەلەلەردى اشىق ايتادى. بۇل ەلىمىزدە ادىلەتتى قوعامدى قۇرۋعا سەپتىگىن تيگىزەتىن ماڭىزدى ءۇردىس», دەلىنگەن.
بيىل مەديا اپتالىق ءداستۇرلى «ۇركەر» ۇلتتىق بايقاۋىنىڭ سالتاناتتى ءىس-شاراسىمەن قورىتىندىلاندى.
