ءىس-شاراعا ەڭبەك جانە حالىقتى الەۋمەتتىك قورعاۋ مينيسترلىگىنىڭ ورتالىق اپپاراتىنىڭ, اۋماقتىق دەپارتامەنتتەردىڭ, ۆەدومستۆولىق باعىنىستى ۇيىمداردىڭ, سونداي-اق جەرگىلىكتى اتقارۋشى ورگانداردىڭ قىزمەتكەرلەرى قاتىستى.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءوزىنىڭ قۇتتىقتاۋ سوزىندە الەۋمەتتىك قورعاۋ سالاسى قىزمەتكەرلەرىنىڭ قارتتار مەن مۇگەدەكتىگى بار ادامداردىڭ, كوپبالالى جانە از قامتىلعان وتباسىلاردىڭ, جۇمىسسىز ازاماتتاردىڭ جانە حالىقتىڭ باسقا دا الەۋمەتتىك وسال توپتارىنىڭ ءومىر ءسۇرۋ ساپاسىن ارتتىرۋعا قوسقان ايرىقشا ۇلەسىن اتاپ ءوتتى.
«قۇرمەتتى الەۋمەتتىك قورعاۋ جۇيەسىنىڭ قىزمەتكەرلەرى, كاسىبي مەرەكەلەرىڭىزبەن شىن جۇرەكتەن قۇتتىقتايمىن!
سىزدەرگە ەرەكشە نازار مەن قامقورلىقتى قاجەت ەتەتىن ادامداردىڭ پروبلەمالارى جۇكتەلەدى. وسى جاۋاپتى جۇمىستارىڭىز تەك ەڭبەكقورلىق پەن ىسكە دەگەن ادالدىقتى عانا ەمەس, سونىمەن بىرگە سەزىمتالدىقتى, ۇلكەن شىدامدىلىقتى, جاناشىرلىقتى قاجەت ەتەدى. ازاماتتارعا قاجەتتى كومەك كورسەتۋ باستى مىندەت بولىپ تابىلاتىن مەيىربان ادامدار, ەلىمىزدىڭ دامۋى مەن نىعايۋىنا قوسقان ۇلەسى كوزگە كورىنە بەرمەيتىن باتىرلارىمىز دەسە بولادى. سىزدەردىڭ قامقورلىقتارىڭىز بەن قولداۋلارىڭىز ادامدارعا سەنىمدىلىك بەرەدى.
مۇقتاج جاننىڭ ءومىر سۇرۋگە دەگەن قۇلشىنىسىن ىنتالاندىرۋ مەن ۇكىلى ءۇمىتىن وياتا ءبىلۋ – بۇل ءومىر سىيلاۋمەن تەڭ. بارلىعى ءۇشىن سىزدەرگە العىس ايتقىم كەلەدى! وسى سالتاناتتى كۇنى سىزدەرگە دەنساۋلىق, اماندىق, باقىت, بەيبىتشىلىك پەن جاقسىلىق تىلەيمىن. كاسىبي مەرەكەڭىز – الەۋمەتتىك قورعاۋ جۇيەسى قىزمەتكەرلەرى كۇنى قۇتتى بولسىن», دەدى تامارا دۇيسەنوۆا.
تامارا دۇيسەنوۆا ءىس-شاراعا قاتىسۋشىلارعا ارناۋلى الەۋمەتتىك قىزمەتتەر كورسەتۋ جۇيەسىن جاڭعىرتۋ, بالالى وتباسىلاردى الەۋمەتتىك قولداۋدىڭ جاڭا شارالارى, ازاماتتاردى زەينەتاقىمەن قامسىزداندىرۋ جۇيەسىن جەتىلدىرۋ, وتباسىنىڭ تسيفرلىق كارتاسىن ەنگىزۋ جانە الەۋمەتتىك كودەكسىنىڭ جوباسىندا كوزدەلگەن باسقا دا قولداۋ شارالارىنىڭ ارقاسىندا مەملەكەتتىك قىزمەتتەر كورسەتۋدىڭ پرواكتيۆتى فورماتىنا كوشۋ تۋرالى ايتىپ بەردى.
مينيستر ەڭبەك جانە الەۋمەتتىك قورعاۋ كوميتەتىنىڭ سولتۇستىك قازاقستان وبلىسى بويىنشا دەپارتامەنتىنىڭ باسشىسى, الەۋمەتتىك قورعاۋ جۇيەسىندە 27 جىل جۇمىس ءوتىلى بار مەرەكە مۇحامەدياروۆتى «قۇرمەت» وردەنىمەن ماراپاتتادى. وسى ماراپاتقا ەڭبەك جولىنىڭ 33 جىلىن الەۋمەتتىك سالاعا ارناعان ەڭبەك جانە الەۋمەتتىك قورعاۋ كوميتەتىنىڭ قاراعاندى وبلىسى بويىنشا دەپارتامەنتى باسشىسىنىڭ ورىنباسارى ناتاليا كريۋكوۆا, سونداي-اق ەڭبەك جولىن 26 جىل بۇرىن الماتى قالاسىنىڭ اۋداندىق الەۋمەتتىك قورعاۋ بولىمىندە باستاعان مەملەكەتتىك الەۋمەتتىك ساقتاندىرۋ قورىنىڭ باس ديرەكتورىنىڭ كەڭەسشىسى ايناحان بەريكوۆا يە بولدى.
ەڭبەك جانە الەۋمەتتىك قورعاۋ كوميتەتىنىڭ قوستاناي وبلىسى بويىنشا دەپارتامەنتى باسشىسىنىڭ ورىنباسارى, الەۋمەتتىك سالادا 25 جىل ەڭبەك ەتىپ كەلە جاتقان اينۇر ساتاەۆا «ەرەن ەڭبەگى ءۇشىن» مەدالىمەن ماراپاتتالدى. قر ەحاقم قارجى دەپارتامەنتى ديرەكتورىنىڭ ورىنباسارى مارجان رايىمبەكوۆا «شاپاعات» مەدالىمەن ماراپاتتالدى.
الەۋمەتتىك-ەڭبەك سالاسىنداعى كوپ جىلعى ادال ەڭبەگى, سونداي-اق ەڭبەك جولىنداعى جوعارى ناتيجەلەرى ءۇشىن ءمينيستردىڭ قولىنان «ەڭبەك ارداگەرى» ۆەدومستۆولىق مەدالىن تۇركىستان وبلىسىنىڭ ەڭبەك ينسپەكتسياسىنىڭ ارداگەرى, زەينەتكەرى مۇحانماديار بايانديەۆ, جەتىسۋ وبلىسىنىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى دينا تالدانباەۆا, ەڭبەك جانە الەۋمەتتىك قورعاۋ كوميتەتى ماڭعىستاۋ وبلىسى بويىنشا دەپارتامەنتىنىڭ قىزمەتكەرى ايسۇلۋ اگجانوۆا الدى.
سونداي-اق 65 جاسقا تولۋىنا بايلانىستى ءمينيستردىڭ قۇتتىقتاۋ حاتى ساۋلە دۇيسەنوۆاعا تابىستالدى. ساۋلە ساعىنتايقىزى كوپتەگەن جىلدار بويى زەينەتاقى تولەۋ جونىندەگى مەملەكەتتىك ورتالىعىن, سونداي-اق مەملەكەتتىك الەۋمەتتىك ساقتاندىرۋ قورىن باسقاردى.
سالا قىزمەتكەرلەرىن سونىمەن قاتار ەڭبەك جانە حالىقتى الەۋمەتتىك قورعاۋ ۆيتسە-مينيسترلەرى اقمادي سارباسوۆ, ولجاس ورداباەۆ, ەربول وسپانوۆ, نازگۇل ساعىندىقوۆا, ەڭبەك جانە الەۋمەتتىك قورعاۋ كوميتەتىنىڭ توراعاسى تولەگەن وسپانقۇلوۆ, قر ەحاقم كوشى-قون كوميتەتى توراعاسىنىڭ مىندەتىن اتقارۋشى يلياس يسپانوۆ تا قۇتتىقتادى.
سالتاناتتى ءراسىم بارىسىندا ەلىمىزدىڭ ءتۇرلى وڭىرلەرىنەن بارلىعى 88 الەۋمەتتىك قورعاۋ جۇيەسىنىڭ قىزمەتكەرى ماراپاتتارعا يە بولدى. ونىڭ ىشىندە «قۇرمەت» وردەنىمەن 3 ادام, «ەرەن ەڭبەگى ءۇشىن» مەدالىمەن – 4 قىزمەتكەر, قازاقستان رەسپۋبليكاسىنىڭ قۇرمەت گراموتاسىمەن 1 ادام ماراپاتتالدى. «شاپاعات» مەدالىمەن – 1 ادام, «ەڭبەك ارداگەرى» ۆەدومستۆولىق مەدالىمەن – 10 قىزمەتكەر ناگراتتالدى. «الەۋمەتتىك-ەڭبەك سالاسىنىڭ ۇزدىگى» توسبەلگىسى 21 ادامعا تابىس ەتىلدى.
سالانىڭ 19 قىزمەتكەرى ۆەدومستۆونىڭ قۇرمەت گراموتاسىن الدى, قر ەڭبەك جانە حالىقتى الەۋمەتتىك قورعاۋ ءمينيسترىنىڭ العىس حاتىنا 29 قىزمەتكەر يە بولدى.
سالتاناتتى ءىس-شارا بارىسىندا قازاقستاننىڭ ەڭبەك سىڭىرگەن قايراتكەرلەرى, مادەنيەت ۇزدىكتەرى, رەسپۋبليكالىق كونكۋرستار لاۋرەاتتارىنىڭ قاتىسۋىمەن كونتسەرت ءوتتى.
