كونفەرەنتسيانىڭ سالتاناتتى اشىلۋىنا استانا قالاسىنىڭ اكىمى التاي كولگىنوۆ, وقۋ-اعارتۋ ۆيتسە-ءمينيسترى عاني بەيسەمباەۆ قاتىسىپ, فورۋم جۇمىسىنا ساتتىلىك تىلەدى. بۇدان كەيىن ءىس-شارانىڭ اۋقىمدى كۇن ءتارتىبى «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆانىڭ «وزگەرمەلى الەمدە بالالاردى جان-جاقتى دامىتۋ» اتتى بايانداماسىندا ايقىندالدى.
جالپى, بۇل فورۋمنىڭ كۇن تارتىبىندە اقپاراتتىق قوعام كونتەكستىندەگى فۋنكتسيونالدىق ساۋاتتىلىق, جاس مۇعالىمنىڭ كاسىبي دامۋى, قالىپتاستىرۋشى باعالاۋ سالاسىنداعى يننوۆاتسيالار, مەكتەپتە جايلى ورتا قۇرۋ, ينكليۋزيۆتى جانە دەربەستەندىرىلگەن وقىتۋ, تسيفرلىق مۇعالىمنىڭ ميسسياسى جانە ءبىلىم بەرۋ پروتسەسىنە جاساندى ينتەللەكتى ەنگىزۋ, سونداي-اق باسقا دا جاھاندىق پەداگوگيكادا سۇرانىسقا يە باسىمدىقتار بار.
حالىقارالىق كونفەرەنتسياعا الەمدىك ءبىلىم بەرۋ سالاسىنىڭ تانىمال وكىلدەرى قاتىستى. اتاپ ايتساق, فينلياندياداعى يۋۆياسكيۋل ۋنيۆەرسيتەتى توبىنىڭ Educluster Finland يننوۆاتسيالار جانە سىرتقى بايلانىستار جونىندەگى ديرەكتورى دەۆيد مارش, كورەي ءبىلىم بەرۋدى دامىتۋ ينستيتۋتىنىڭ عىلىمي قىزمەتكەرى سۋنگ دجي پارك, وكسفورد ۋنيۆەرسيتەتىنىڭ بالالاردى دامىتۋ جانە وقىتۋ پروفەسسورى يرام سيراج ( ۇلىبريتانيا), كەمبريدج ۋنيۆەرسيتەتىنىڭ ەمتيحاندىق كەڭەسى وكىلى تيم وۋتس ( ۇلىبريتانيا), جاپونياداعى ۇلتتىق ءبىلىم بەرۋ ساياساتىن زەرتتەۋ ينستيتۋتىنىڭ اعا عىلىمي قىزمەتكەرى توشيا چيچيبۋ, كوپتىلدى وقىتۋ ساراپشىسى پيتەر مەحيستو (ەستونيا) سەكىلدى مارتەبەلى مەيماندار استاناعا ات باسىن بۇرىپ كەلدى.
– بولاشاق ءۇشىن ءبىز قازىر وزگەرۋىمىز قاجەت. ءبىر سوزبەن ايتقاندا, بۇل – بولاشاققا دايىندىق. وسى كونفەرەنتسيادان جاعىمدى اسەر الدىم. مەن ەكى-ءۇش جىلدىڭ كولەمىندە نازارباەۆ زياتكەرلىك مەكتەپتەرىنىڭ ەكسپەرتتەرىمەن جۇمىس ىستەپ كەلەمىن. ءبىز جاڭا باعدارلامالار ويلاپ تاۋىپ, زياتكەرلىك مەكتەپ قىزمەتكەرلەرىنە ءبىلىم بەرەمىز. سوندىقتان مەن جاڭا اقپارات بەرۋ ءۇشىن ەمەس, سەرىكتەستىكتە بولىپ, اتقارىلعان جۇمىستاردىڭ ناتيجەسىن كورۋگە كەلدىم. قازاقستان مەن فينليانديانىڭ ءبىلىم بەرۋدەگى ۇقساستىعى مىنادا: ءبىز دە شەتەلدىك تاجىريبەنى تۇبەگەيلى ەنگىزبەي ونى وتاندىق باعدارلامالارمەن ۇشتاستىرۋعا تىرىسامىز, – دەدى يۋۆياسكيۋل ۋنيۆەرسيتەتىنىڭ Edcluster Finland يننوۆاتسيالار جانە سىرتقى بايلانىستار جونىندەگى ديرەكتورى دەۆيد مارش.
ال پورتۋگاليادان كەلگەن لۋسوفون ۋنيۆەرسيتەتىنىڭ ارنايى ءبىلىم بەرۋ كافەدراسى ديرەكتورىنىڭ ورىنباسارى ليۋسيا ليما-رودريگەس استانانى كورگەنىنە قۋانىشتى ەكەنىن, كونفەرەنتسيانىڭ جوعارى دەڭگەيدە ءارى قىزىقتى ءوتىپ جاتقانىن جانە قازاقستاندا وقۋشىلاردىڭ ءبىلىم الۋىنا ۇلكەن كوڭىل بولىنەتىنىن اتاپ ءوتتى.
– مەنىڭ كونفەرەنتسياعا كەلۋدەگى ماقساتىم – ەل مەن ەكونوميكانىڭ دامۋى ءۇشىن مەكتەپكە دەيىنگى ءبىلىم بەرۋدىڭ ماڭىزدىلىعى ماسەلەسىن كوتەرۋ. مەن اتا-انالار ۇيدە نەمەن اينالىساتىنى, مۇعالىمدەر مەن تاربيەشىلەردىڭ ءىس-ارەكەتتەرى جايىندا ايتامىن. سونداي-اق ءتۇرلى شەبەرلىك ساباقتارىن وتكىزىپ, ءوزىمنىڭ ۇلىبريتانيادا 3,5 مىڭ اداممەن 17 جىل بويى جۇرگىزگەن زەرتتەۋىمنىڭ ەسەبىن ۇسىنامىن. مەن ءوزىم دە كوپ نارسە ۇيرەنۋ ءۇشىن كەلدىم. سەبەبى كونفەرەنتسيا حالىقارالىق دەڭگەيدى وتەدى, – دەدى وكسفورد ۋنيۆەرسيتەتىنىڭ بالالاردى دامىتۋ جانە وقىتۋ پروفەسسورى يرام سيراج.
ءوز كەزەگىندە كورەي ءبىلىم بەرۋدى دامىتۋ ينستيتۋتىنىڭ عىلىمي قىزمەتكەرى سۋنگ دجي پارك تەحنولوگيامەن تىعىز بايلانىستى ءبىلىم بەرۋ تاقىرىبىن كەڭىنەن ءسوز ەتتى. بۇل رەتتە جاساندى ينتەللەكت جايىندا دا ايتىپ, ونىڭ ءداستۇرلى وقىتۋ فورماسىمەن قالاي ۇيلەسىم تاباتىنىن ناقتى مىسالدارمەن ءتۇسىندىردى. سونداي-اق كورەيالىق قوناق نازارباەۆ زياتكەرلىك مەكتەپتەرىنىڭ تاجىريبەسى وڭتۇستىك كورەيا مەكتەپتەرىنىڭ تاجىريبەسىمەن ۇقساس ەكەنىن اتاپ ءوتتى.
كونفەرەنتسيانىڭ جارقىن ساتتەرىنىڭ ءبىرى نيدەرلاندتاعى ساراپتاما جانە سەرتيفيكاتتاۋ زەرتتەۋ ورتالىعىنىڭ «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنا كونكۋرستىق ىرىكتەۋدى اككرەديتتەۋ تۋرالى RCEC سەرتيفيكاتىن تابىستاۋ ءراسىمى بولدى.
– بۇل NIS-ءتىڭ الەمدىك ءبىلىم بەرۋدەگى جاڭاشا مويىندالۋى, ول شىندىقتىڭ, سەنىمدىلىكتىڭ, وبەكتيۆتىلىكتىڭ جوعارى ستاندارتتارىن, سونداي-اق كونكۋرستىق ىرىكتەۋ جۇيەسىنىڭ حالىقارالىق تالاپتارعا سايكەستىگىن راستايدى, – دەدى RCEC سەرتيفيكاتىن تابىستاعان ارنولد دج.براۋەر.
سونىمەن قاتار ءداستۇرلى كونفەرەنتسيا الاڭىندا NIS-ءتىڭ «قازاقستان حالقىنا» قورى جانە «Aitas KZ» حولدينگىمەن بىرىگىپ ىسكە اسىرىپ جاتقان «اۋىلدىق جەردەگى تىرەك مەكتەپتەردىڭ الەۋەتىن دامىتۋ» اۋقىمدى جوباسىنىڭ قاتىسۋشىلارىنا پاسپورت تابىستالدى.
العاش رەت مەكتەپكە دەيىنگى ءبىلىم بەرۋ ماسەلەلەرى, سونىڭ ىشىندە, ەڭ الدىمەن, زەرتتەۋلەردىڭ ساپاسى جانە ۇزاق مەرزىمدى اسەرگە ارنالعان سەكتسيالىق وتىرىستاردىڭ تۇتاس سەرياسى ءوتتى. سۇرانىسقا يە سەكتسيالار قاتارىن بالالارعا قاۋىپسىز جانە جايلى ورتا – قالا, اۋىل مەكتەپ قۇرۋعا باعىتتالعان ارنايى وتىرىستار تولىقتىرادى. بۇعان قوسا ەڭبەك جولىن جاڭادان باستاپ جاتقان پەداگوگتەردىڭ بىلىكتىلىگىن ارتتىرۋعا باعىتتالعان ارنايى سەكتسيا NIS-ءتىڭ تامىز ايىندا ۇيىمداستىرعان جاس مۇعالىمدەردىڭ رەسپۋبليكالىق فورۋمىنىڭ زاڭدى جالعاسى دەۋگە بولادى.
پانەلدىك پىكىرتالاستار مەن سەكتسيالىق وتىرىستاردىڭ اۋقىمدى توپتاماسى مۇعالىمنىڭ كاسىبي كاپيتالىنا, ەڭ الدىمەن, تىكەلەي ونىڭ تاجىريبەسىن كورسەتەتىن «Action Research» جانە «Lesson Study» زەرتتەۋىنە ارنالدى. «سوزدەن – ىسكە» شەبەرلىك ساباقتارىندا قازاقتىڭ ۇلى ۇستازدارىنىڭ شىعارماشىلىق مۇراسى باستى تاقىرىپقا اينالدى. ولاردىڭ تانىمال تۋىندىلارىنا قازىرگى ءبىلىم وشاقتارىنداعى سۇرانىس جايىندا «احمەت بايتۇرسىن ۇلى ەڭبەكتەرىن باستاۋىش سىنىپتاردى وقىتۋدا قولدانۋ» اتتى شەبەرلىك ساباعىن دايىنداعان ءبىلىم بەرۋ باعدارلامالارى ورتالىعىنىڭ وكىلدەرى قالامقاس بايتەنوۆا, پەريزات بيعازينا, جانات قاجىعاليەۆا باياندادى.
اۆتوگراف-سەسسيادا كونفەرەنتسيا قاتىسۋشىلارى بالالارعا ارنالعان قازىرگى قازاق ادەبيەتىنىڭ ۇزدىك شىعارمالارىن جازىپ جۇرگەن بەلگىلى وتاندىق جازۋشىلار مەن سۋرەتشىلەر – ساۋران قاستەەۆ, اسەل يمايو, اسقار التاي, مەيىرحان جىلقىباي, سەرىكبول حاسان, سايات قامشىگەر, رۇستەم ساۋىتباي, ولگا گۋميروۆا, زاۋرە تورەحانمەن كەزدەستى.
