ايتۋلى كۇنى شىعىس قازاقستانعا ىسساپارمەن كەلگەن عىلىم جانە جوعارى ءبىلىم ءمينيسترى ساياسات نۇربەك جوعارى وقۋ ورنىنىڭ تەحنيكالىق ماتەريالدىق بازاسىمەن, عىلىمي جەتىستىكتەرىمەن, تىڭ جوبالارىمەن تانىستى. سونىمەن قاتار ۋنيۆەرسيتەتتىڭ عىلىمي ورتالىقتارىن ارالاپ, «پروتوتيپتەۋ جانە ماتەريالداردى وڭدەۋ» عىلىمي وندىرىستىك كەشەنىندە, قۇرىلىس جانە قۇرىلىس ماتەريالدارى سالاسىنداعى قۇزىرەتتىلىك جانە ترانسفەر ورتالىعىندا بولدى. عىلىمي ورتالىق قىزمەتكەرلەرى ۆەدومستۆو باسشىسىنا مەديتسينادا قولدانىلاتىن تيتان ونىمدەرىن, گاز-مۇناي سالاسىنا ارنالعان تيتان ونىمدەرىن, تانتال مەن نيوبيدەن دايىندالعان مەديتسينالىق بۇيىمداردى, ديقان پلانشەتىن, 3D-پرينتەرلەردى تانىستىردى. بۇگىنگى تاڭدا كەز كەلگەن نىساننىڭ 3D قۇجاتتاماسىن جاساۋ جانە ولشەۋ ناتيجەلەرىن وڭدەۋ ءۇشىن اپپاراتتىق جانە باعدارلامالىق جوبالار قاجەت. سونداي-اق تەحنيكالىق, تابيعي جانە مۇراجاي وبەكتىلەرىنىڭ 3D قۇجاتتاماسىن جاساۋ دا سۇرانىسقا يە. ودان بولەك 3D قۇرىلىس پرينتەرىمەن ءارتۇرلى كۇردەلى فورماداعى ونىمدەردى از ۋاقىت ىشىندە جوبالاپ الۋىڭىزعا بولادى. ال مۇنداي زاماناۋي مۇمكىندىك اتالعان جوعارى وقۋ ورنىنىڭ بازاسىندا بار.
وسى ورايدا ۋنيۆەرسيتەتتىڭ وزگە دە جۇمىستارىنا توقتالىپ وتەيىك. 2020 جىلى وبلىستىق مۇراعات, وبلىستىق كىتاپحانا جانە وبلىستىق مۋزەي ماتەريالدارىن تسيفرلاندىرۋ بويىنشا ۇلكەن جوبا ىسكە اسىرىلدى. اتاپ ايتساق, «وسكەمەن تيتان-ماگني كومبيناتى» اق ءۇشىن كىتاپ قورىنىڭ 3مىڭنان اسا داناسى تسيفرلاندىرىلدى. جالپى, شىعىس قازاقستان تەحنيكالىق ۋنيۆەرسيتەتىنىڭ عىلىمي كىتاپحاناسى – قازاقستان اۋماعىنداعى 1 ملن دانادان اسا قورى بار تەحنيكالىق بەيىندەگى ەڭ ءىرى جوعارى وقۋ ورنى. ونىڭ ۇستىنە جىل سايىن كىتاپحانا قورى 10-15 مىڭ دانا كىتاپقا تولىعىپ وتىرادى. كىتاپحانا قۇرامىنا 5 وقۋ زالى, ابونەمەنت ءبولىمى جانە 7 مامانداندىرىلعان ءبولىم كىرەدى. ستۋدەنتتەر, وقىتۋشىلار مەن عىلىمي قىزمەتكەرلەر قاجەتتى وقۋ, عىلىمي, كوركەم جانە انىقتامالىق ادەبيەتتەردى كەڭىنەن قولدانۋعا, رەفەراتتار, كۋرستىق, ديپلومدىق جۇمىستار جازۋ كەزىندە بىلىكتى كەڭەستەر الۋعا مۇمكىندىك مول. كىتاپحانانادا ينتەرنەت جەلىسىنە قوسىلعان 56 كومپيۋتەر, مۋلتيمەديالىق قور, پلانەتارلىق سكانەرلەر, پرينتەرلەر, كوشىرگىشتەر كىرەدى.
ايتقانداي, عىلىم سالاسى دا كوش ىلگەرى. الدىڭعى جىلدارى ءۇمز اق-مەن بىرلەسىپ, ۋنيۆەرسيتەت قابىرعاسىندا يمپلانتتاردىڭ 20-دان اسا ءتۇرىن دايىنداۋ تەحنولوگياسى ازىرلەندى. بۇگىندە ولاردى مەديتسينالىق ماقساتتا پايدالانىپ تا ۇلگەردى. ءونىمنىڭ 3 تاباقشاسى پاتسيەنتتەرگە ورناتىلعان. قازىر كلينيكالىق سىناق كەزەڭى ءجۇرىپ جاتىر. سونداي-اق يمپلانتتاردىڭ جاڭا تۇرلەرىن جاساۋ تەحنولوگيالارى ازىرلەنۋدە. اتاپ ايتساق, ۋكراينالىق جاق-بەت حيرۋرگياسى قاۋىمداستىعىنىڭ سەرىكتەستەرىمەن بىرگە مويىن اقاۋلارى بار ناۋقاستاردى وڭالتۋ ءۇشىن كومپيۋتەرلىك توموگرافيا دەرەكتەرى بويىنشا 3D-باسىپ شىعارۋ ادىسىمەن مەديتسينالىق يمپلانتتاردى مودەلدەۋ جانە دايىنداۋ جۇمىستارى جۇرگىزىلىپ جاتىر.
ۋنيۆەرسيتەتتىڭ عىلىم سالاسىندا اشىپ جاتقان جاڭالىقتارى كوپ. سەبەبى بىلىكتى مامانداردىڭ كوبى وسى وقۋ ورنى قابىرعاسىندا قىزمەت ەتەدى. سونىڭ ىشىندە جىلجىمالى جول زەرتحاناسىنىڭ ءرولىن ايتا كەتكەن ابزال. بۇل زەرتحانا اۆتوموبيل جولدارىنىڭ جاعدايىن دياگنوستيكالاۋعا, پاسپورتتاۋعا, باقىلاۋعا ارنالعان. جولداردىڭ نەگىزگى گەومەتريالىق پارامەترلەرىن, جول توسەمدەرىنىڭ بەرىكتىگىن, جابىننىڭ تەگىستىگىن, قوزعالىس قارقىندىلىعى مەن قۇرامىن, جولدىڭ قۇرىلىمدىق ەلەمەنتتەرىنىڭ بولۋى مەن جاي-كۇيىن انىقتاۋدى قامتاماسىز ەتەدى.
جالپى, شىعىس قازاقستان وبلىسىندا ينجەنەرلىك-تەحنيكالىق بەيىندەگى جوعارى بىلىكتى كادرلاردىڭ سۇرانىسىن ەسكەرە وتىرىپ, بەدەلدى ەۋروپالىق ۋنيۆەرسيتەت فيليالىنىڭ اشىلۋى وڭىردەگى جوعارى ءبىلىمنىڭ دامۋىنا ەلەۋلى سەرپىن بەرەدى. سونىمەن قاتار الداعى ۋاقىتتا نەمىس تەحنولوگيالارىن وبلىستىڭ وندىرىستىك كاسىپورىندارىندا پايدالانىپ, جۇمىس بارىسىن جەڭىلدەتىپ, ساپاسىن ارتتىرۋى ابدەن مۇمكىن.
بەرلين تەحنيكالىق ۋنيۆەرسيتەتى فيليالىنىڭ اشىلۋىنا بايلانىستى قازاقستاننان عانا ەمەس, تمد مەن ازيا ەلدەرىنەن دە تالاپكەرلەردىڭ ايتارلىقتاي كوبەيۋى كۇتىلۋدە. ىلكىمدى ىستەردىڭ ناتيجەسىندە د. سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ عالىمدارى بىرلەسكەن عىلىمي-زەرتتەۋلەردى جۇرگىزۋ جانە ولاردى ودان ءارى كوممەرتسيالاندىرۋ بولىگىندە ەۋروپالىق ارىپتەستەرمەن نەعۇرلىم ءتيىمدى ىنتىماقتاستىق قۇرا الادى.
كەزدەسۋ سوڭىندا ساياسات نۇربەك د.سەرىكباەۆ اتىنداعى شقتۋ ستۋدەنتتەرى مەن قىزمەتكەرلەرىنىڭ ءوڭىر مەن ەل دامۋىنا قوسىپ جاتقان عىلىمي جەتىستىكتەرىن جوعارى باعالادى. كەزدەسۋ سوڭىندا د. سەرىكباەۆ اتىنداعى شقتۋ باسقارما توراعاسى-رەكتور ساۋلە راحمەتۋللينا العىسىن ءبىلدىردى.
شىعىس قازاقستان وبلىسى
