الدىمەن سەمەيدەگى اسپالى كوپىردىڭ ماڭىنداعى قوعامدىق كەڭىستىكتىڭ جانىنا اعاش كوشەتتەرى ەگىلدى. ونىڭ ىشىندە الما اعاشتارى جانە 50 شىرشا كوشەتى بار.
«سەمەي كەزىندە ەلىمىزدىڭ ەڭ جاسىل قالالارىنىڭ ءبىرى بولعان. ەندى وبلىس ورتالىعى مارتەبەسىن العان سوڭ شاھاردى بۇرىنعىداي جاسىل جەلەگى مول ايماق رەتىندە دامىتۋعا كۇش سالىنادى. الداعى جىلدارى بۇدان دا كوپ اعاش وتىرعىزىلادى», دەدى اباي وبلىسىنىڭ اكىمى نۇرلان ۇرانحاەۆ.
بۇل ورايدا اتالعان كوپىر ماڭىنان 1 اي بۇرىن عانا زاماناۋي سپورتتىق ينفراقۇرىلىممەن جاراقتالعان قوعامدىق كەڭىستىك اشىلعان ەدى. مۇندا ۋوركاۋت-الاڭقايلارى, سكەيت-پارك, پاركۋر الاڭدارى قاراستىرىلعان. بۇل اۋماق بىرنەشە بولىككە بولىنگەن. ستريتبولعا ارنالعان سپورتتىق ايماق, فيتنەس ايماق جانە بالالار ويىن الاڭى بار. ەندى اتالعان كەڭىستىك اۋماعى اعاشتارمەن تولىعىپ وتىر. تۇتاستاي العاندا, وبلىس ورتالىعىندا 478 اعاش, 100 بۇتا ەگىلدى.
سونداي-اق مەرەكە قارساڭىندا ءوڭىر حالقى باسپانالى بولدى. ماسەلەن, قالاداعى قاراعايلى شاعىن اۋدانىندا 64 وتباسىعا كوپ قاباتتى تۇرعىن ءۇيدىڭ كىلتى تابىستالدى. وبلىس اكىمى جاڭا پاتەر يەلەرىن قونىس تويلارىمەن قۇتتىقتاپ, بۇل باعىتتا قۇرىلىس قارقىنى ەسەلەنەتىنىن ايتتى.
«مەملەكەت باسشىسىنىڭ قولداۋىمەن ءوڭىرىمىز ءوزىنىڭ دامۋ جولىنا ءتۇسىپ كەلەدى. كەشەندى جوسپار قابىلدانىپ, تىڭ جوبالار ىسكە اسىرىلادى. تۇرعىن ءۇي قۇرىلىسىنىڭ قارقىنىن ۇلعايتۋ جوسپارلانىپ وتىر. بيىل قالادا قارجىلاندىرۋدىڭ بارلىق كوزى ەسەبىنەن 5 166 پاتەرگە ارنالعان 496 415 مىڭ شارشى مەتر باسپانا سالۋ كوزدەلۋدە. وسىلايشا, كەزەڭ-كەزەڭىمەن باسپانا سانى ۇلعايتىلادى», دەدى ن.ۇرانحاەۆ.
سەمەيدىڭ وڭ جاعالاۋىندا بەكىتىلگەن باس جوسپارعا سايكەس «قاراعايلى» تۇرعىن الابىنىڭ جوباسى ازىرلەندى. سوعان سايكەس الداعى ۋاقىتتا 35 مىڭنان اسا ادامعا 227 تۇرعىن ءۇي سالۋ مەجەلەنىپ وتىر.
قازىر بۇل اۋدان سۋ قۇبىرى, كارىز-تازارتۋ جۇيەلەرى, تەلەكوممۋنيكاتسيا, جىلۋ جانە ەلەكتر ەنەرگياسىنىڭ ماگيسترالدىق جەلىلەرىمەن قامتاماسىز ەتىلگەن. مۇندا نازارباەۆ زياتكەرلىك مەكتەبى, 320 ورىندىق بالاباقشا, 5 600 كورەرمەندىك ورنى بار «ارەنا» مادەني-سپورتتىق كەشەنى ورنالاسقان. قازىر وسى جەردە جالپى اۋدانى 253,4 مىڭ شارشى مەتردى قۇرايتىن 41 ءۇي پايدالانۋعا بەرىلگەن.
ۇلتتىق مەرەكەگە بايلانىستى ءۇرجار اۋدانىنىڭ تاسكەسكەن اۋىلىندا 12 پاتەرلى 6 ءۇي پايدالانۋعا بەرىلدى. جاڭا باسپاناعا تۇرعىن ءۇي كەزەگىندە تۇرعان ءارتۇرلى الەۋمەتتىك توپتىڭ ساناتىنا كىرەتىن جەرگىلىكتى ازاماتتار يە بولدى.
سول سەكىلدى اقسۋاتتا اۋىل اراسىن جالعايتىن جولداردىڭ ءبىرى جوندەۋدەن وتكىزىلدى. اتاپ ايتقاندا, اقسۋات پەن ەسكى ۋچيليششە ەلدى مەكەنىنىڭ اراسىن جالعايتىن جولدىڭ ورتاشا جوندەۋ جۇمىستارى تولىعىمەن اياقتالدى. جوندەۋ جۇمىستارىنا قاراجات «اۋىل-ەل بەسىگى» باعدارلاماسى بويىنشا رەسپۋبليكالىق بيۋدجەتتەن ءبولىنىپتى. وسىلايشا, اۋدان حالقىنىڭ ءوتىنىشى قاناعاتتاندىرىلدى دەيدى جەرگىلىكتى اتقارۋشى ورگاننىڭ وكىلدەرى. بۇعان قوسا اتالعان اۋداندا مەملەكەتتىك قولداۋدىڭ اياسىندا 26 پاتەرلى 13 باسپانانىڭ ىرگەتاسى قالانىپ, قۇرىلىسى باستالدى.
«اقسۋات اۋىلىنداعى الەۋمەتتىك تۇرعىدان از قامتىلعان وتباسىلارعا ارنالعان تۇرعىن ءۇي زامان تالابىنا ساي سالىنادى. ءار پاتەردىڭ جالپى اۋماعى 85 شارشى مەتردى قۇرايدى. بۇل ارقىلى باسپاناعا مۇقتاج اۋىل تۇرعىندارىنىڭ الەۋمەتتىك ماسەلەسى بىرتىندەپ شەشىلەدى», دەدى اكىمدىك وكىلدەرى.
بۇدان باسقا ءۇرجار اۋدانىنىڭ قابانباي اۋىلىندا جاڭا سپورت ءمودۋلى پايدالانۋعا بەرىلدى. اتالعان كەشەنگە بيىل 330 جىلدىق مەرەيتويى ءوتىپ جاتقان داڭقتى قولباسشى قاراكەرەي قابانبايدىڭ قۇرمەتىنە ارناپ, «دارابوز» دەگەن اتاۋ بەرىلدى.
مەرەكە كۇنى جاڭا سپورت كەشەنىندە قازاق كۇرەسىنەن اۋداندىق سايىس ۇيىمداستىرىلدى. جەڭىمپازدار مەن جۇلدەگەرلەر اۋداندىق اكىمدىكتىڭ ارنايى ديپلومى جانە قارجىلاي سەرتيفيكاتىمەن ماراپاتتالدى. جارىسقا وسى وڭىردەن شىققان تانىمال سپورتشىلار قاتىسىپ, جاس بالۋاندارعا ساتتىلىك تىلەدى. «دارابوز» سپورت كەشەنى اۋىل جاستارىنىڭ بۇقارالىق سپورتپەن اينالىسىپ, بولاشاق چەمپيونداردى دايىنداۋعا سەپتىگىن تيگىزەتىنىن ايتتى ءوڭىردىڭ ىسكەر ازاماتتارى.
اباي وبلىسى
