قاسىم-جومارت توقاەۆ پەن شارل ميشەل اشىق, دوستىق جانە سىندارلى احۋالدا وتكەن كەلىسسوزدەر بارىسىندا سوڭعى 30 جىل ىشىندە قازاقستان رەسپۋبليكاسى مەن ەۋروپالىق وداق اراسىنداعى قارىم-قاتىناستاردىڭ جوعارى دەڭگەيى مەن سەرپىندى دامۋىن راستادى. ولار قازاقستان مەن ەو اراسىنداعى كوپقىرلى ىنتىماقتاستىقتى ودان ءارى نىعايتۋ, تەرەڭدەتۋ جانە كەڭەيتۋ تۋرالى ۋاعدالاستى.
تاراپتار وزدەرىنىڭ بۇۇ جارعىسىنا, حالىقارالىق قۇقىققا جانە ەگەمەندىكتىڭ, تاۋەلسىزدىك پەن اۋماقتىق تۇتاستىقتىڭ قاعيداتتارىنا بەرىك بەيىلدىگىن راستادى. پرەزيدەنتتەر بەيبىتشىلىك پەن قاۋىپسىزدىكتى ساقتاۋدىڭ, سونداي-اق داۋلاردى ديپلوماتيالىق جولمەن شەشۋدىڭ ماڭىزدىلىعىن باسا ايتتى.
قوس پرەزيدەنت قازاقستان مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى (كاىك), ەو-نىڭ ورتالىق ازيا جونىندەگى ستراتەگياسىن, سونداي-اق ەو-نىڭ ورتالىق ازيا ءۇشىن ءوزارا بايلانىس جانە باسقا دا سەكتورلارى جونىندەگى جاڭا باستامالارىن ودان ءارى جانە تولىق ىسكە اسىرۋ تۋرالى ۋاعدالاستى.
قوس تاراپ سوڭعى 30 جىل ىشىندەگى ساياسي جانە ساۋدا-ەكونوميكالىق ىنتىماقتاستىقتىڭ جوعارى سەرپىنىن قۇپتادى. ولار ەۋروپالىق وداق قازاقستاننىڭ نەگىزگى ساۋدا جانە ينۆەستيتسيالىق ارىپتەسى بولىپ تابىلاتىنىن قاناعاتتانۋشىلىقپەن اتاپ ءوتتى. وسىعان وراي, پرەزيدەنتتەر «جاسىل» ەكونوميكا, ەنەرگيانىڭ تيىمدىلىگى, تسيفرلاندىرۋ جانە قازاقستان مەن ەۋروپالىق وداق اراسىنداعى ءوزارا بايلانىس سالالارىندا قولدا بار الەۋەتتى پايدالانۋدىڭ ماڭىزدىلىعىن اتاپ كورسەتتى.
كەزدەسۋدە سىني شيكىزات ماتەريالدارى (سشم), اسىرەسە جەردە سيرەك كەزدەسەتىن مەتالدار سالاسىنداعى ىنتىماقتاستىق ماسەلەلەرى دە قوزعالدى. تاراپتار سشم سالاسىنداعى ستراتەگيالىق ارىپتەستىكتى دامىتۋعا دايىن ەكەندىكتەرىن راستادى جانە قازاقستان رەسپۋبليكاسى مەن ەۋروپالىق وداق اراسىندا شيكىزات, اككۋمۋلياتورلار جانە جاسىل سۋتەگى قۇنىنىڭ تۇراقتى تىزبەگى سالاسىنداعى ستراتەگيالىق ارىپتەستىك تۋرالى ءوزارا تۇسىنىستىك جونىندەگى مەموراندۋمعا قول قويۋدى قۇپتادى. وسى تۇرعىدا, ولار ىسكەرلىك احۋالدى ۇنەمى جاقسارتۋدىڭ جانە قازاقستانعا ەو ينۆەستيتسيالارىن ودان ءارى تارتۋعا قولايلى جاعدايلاردى قامتاماسىز ەتۋدىڭ ماڭىزدىلىعىن اتاپ ءوتتى.
ەۋروپالىق وداق سانكتسيالارىنىڭ قازاقستان ەكونوميكاسىنا ابايسىز تەرىس اسەرىن بولدىرماۋ ماسەلەسىنە ەرەكشە نازار اۋدارىلدى. پرەزيدەنت ش. ميشەل ەو سانكتسيالارى ءۇشىنشى ەلدەرگە قارسى باعىتتالماعانىن راستادى جانە حالىقارالىق سانكتسيالاردان جالتارۋعا جانە ولاردى اينالىپ وتۋگە جول بەرمەۋدىڭ ماڭىزدىلىعىن اتاپ كورسەتتى. تاراپتار دا سانكتسيالارعا جاتپايتىن تاۋارلاردى وندىرەتىن ەۋروپالىق كومپانيالاردى قازاقستانعا كوشىرۋ ماسەلەسىن تالقىلادى.
قازىرگى گەوساياسي جاعدايدى ەسكەرە وتىرىپ, پرەزيدەنت ق. توقاەۆ پەن پرەزيدەنت ش. ميشەل ءوندىرىس پەن جەتكىزۋدىڭ جاھاندىق تىزبەكتەرىن قامتاماسىز ەتۋ ءۇشىن ەۋروپا مەن ورتالىق ازيا اراسىنداعى قولدانىستاعى حالىقارالىق كولىك دالىزدەرىن كەڭەيتۋدىڭ جانە جاڭا دالىزدەردى دامىتۋدىڭ ماڭىزدىلىعىن باسا ايتتى. ولار سونداي-اق ترانسكاسپي حالىقارالىق كولىك باعدارىنىڭ الەۋەتىن, ونى ودان ءارى دامىتۋ نۇسقالارى مەن وڭىردەگى باسقا كولىك باعدارلارىنىڭ ءرولىن تالقىلادى.
ەكى پرەزيدەنت كليماتتىڭ وزگەرۋى قازاقستان مەن ەو وزدەرىنىڭ ەكونوميكالىق قىزمەتىن بەيىمدەۋگە ءتيىس اسا وزەكتى ماسەلەلەردىڭ ءبىرى بولىپ تابىلاتىنىن اتاپ ءوتتى. جاھاندىق جىلىنۋ پروبلەماسى الەمدىك قاۋىمداستىقتىڭ كەزەك كۇتتىرمەيتىن جانە ءتيىمدى ارەكەتتەرىن تالاپ ەتەدى. قوس تاراپ تا ءوز ەكونوميكالارىن تومەن كومىرتەكتى دامۋعا بەيىمدەۋ ءۇشىن ساراپتامالىق, تەحنولوگيالىق جانە تەحنيكالىق ىنتىماقتاستىقتى نىعايتۋدىڭ ماڭىزدىلىعىن اتاپ كورسەتتى. ولار سونداي-اق سۋ رەسۋرستارىن باسقارۋ سالاسىنداعى وڭىرلىك ىنتىماقتاستىقتى ودان ءارى قولداۋ قاجەتتىگىن باسا ايتتى.
ەكى كوشباسشى قازاقستان مەن ەۋروپالىق وداق اراسىنداعى ادام قۇقىقتارى مەن قۇقىق ۇستەمدىگى سالاسىنداعى سىندارلى ديالوگتى قۇپتادى. قازاقستان وسى سالالارداعى ءوزىنىڭ بەيىلدىگىن راستادى. ەۋروپالىق كەڭەستىڭ پرەزيدەنتى «ادىلەتتى قازاقستاننىڭ» ساياسي جاڭعىرۋى مەن كوزقاراسىن ىلگەرىلەتۋگە باعىتتالعان قازاقستاننىڭ ماڭىزدى رەفورمالارى باعدارلاماسىن, سونداي-اق قاڭتار وقيعالارىنا تولىق جانە ترانسپارەنتتى تەرگەپ-تەكسەرۋ جۇرگىزۋگە بەيىلدىگىن قۇپتادى.
پرەزيدەنت ق.توقاەۆ پەن پرەزيدەنت ش.ميشەل وڭىرلىك جانە حالىقارالىق كۇن ءتارتىبى, ونىڭ ىشىندە اۋعانستان ماسەلەلەرى جونىندە پىكىر الماستى. تاراپتار ءوڭىردىڭ وركەندەۋىنىڭ, ورنىقتىلىعىنىڭ جانە ودان ءارى تۇراقتى دامۋىنىڭ كىلتى بولىپ تابىلاتىن ورتالىق ازياداعى وڭىرلىك ديالوگتى نىعايتۋدىڭ ماڭىزدىلىعىن اتاپ ءوتتى.
