ۇيىمداستىرۋشىلاردىڭ ايتۋىنشا, بيىلعى بالالار جىلىنا وراي, بايقاۋدا كىشكەنتاي وقىرماندارعا ارنالعان ۇزدىك شىعارمالار جانە جاسوسپىرىمدەرگە ارنالعان ۇزدىك شىعارمالار دەگەن ەكى اتالىم بويىنشا سىيلىق تاعايىندالعان. مۇنىڭ سىرتىندا, ءبىر ارنايى سىيلىعى تاعى بار. قازىلار القاسى بايقاۋعا كەلىپ تۇسكەن ماتەريالداردى جابىق تۇردە وقىپ شىققان.
– اۆتوردىڭ اتى-ءجونى كورسەتىلمەدى. قازىلار جۇمىستاردى باعالاپ, قورىتىندىسىن بىزگە ۇسىندى, – دەدى وبلىستىق مادەنيەت باسقارماسىنىڭ باسشىسى ەرلان قالماقوۆ.
قازىلار القاسى قازاق تىلىندەگى ەكى نوميناتسيانى دا الماتى قالاسىنان كەلگەن مەيىرجان جىلقىبايعا بەرۋدى ۇيعارىپتى. «مەنىڭ اتام – قوجا» جانە «شۋاق» دەگەن ەكى اڭگىمەسىن بايقاۋعا تاپسىرعان جاس جازۋشىنىڭ باس جۇلدەسىن وڭىرگە ارنايى جۇمىس ساپارىمەن كەلگەن جازۋشىلار وداعىنىڭ باسقارما توراعاسى ۇلىقبەك ەسداۋلەت تاپسىردى.
اۆتوردىڭ ايتۋىنشا, العاشقى اڭگىمەسى بەردىبەك سوقپاقباەۆتىڭ ايگىلى شىعارماسىنداعى قوجا قارتايعاندا كىم بولار ەدى, ونىڭ نەمەرەلەرى قانداي بالا بولىپ شىعار ەدى دەگەن ويمەن جازىلعان. جەڭىمپازدىڭ شىعارماسى دا, شىعارماشىلىققا كەلۋ تاريحى دا قىزىق.
– 13 جاسىمدا كولىك قاعىپ كەتىپ, ءبىر جىل اۋرۋحانادا جاتتىم. توبەگە جاي قاراپ جاتا بەرگەنشە كىتاپ وقيىن دەپ ويلادىم. وسىلايشا, اعىلشىن جازۋشىسى الان ءميلننىڭ «ۆينني-پۋحىن» وقي باستادىم. بۇل كىتاپتىڭ ۇناعانى سونشالىق, وقىپ بىتكەننەن كەيىن «نەگە ماعان دا وسىنداي سۇيكىمدى كەيىپكەرلەر تۋرالى شىعارما جازىپ كورمەسكە» دەگەن وي كەلدى. وسىلايشا, تاۋەكەل دەپ قولىما قالام الدىم, – دەيدى مەيىرجان جىلقىباي.
كەيىن مەيىرجاننىڭ قولجازباسىن تاۋىپ العان اناسى قۋانىپ, ۇلىنىڭ اڭگىمەسىن مەكتەپتەگى ۇستازدارى مەن قۇربىلارىنا كورسەتەدى. قولجازبا ءسويتىپ ءجۇرىپ ءبىر كۇنى دۋلات يسابەكوۆتىڭ قولىنان ءبىر-اق شىعىپ, اقىرى ايگىلى جازۋشىنىڭ العىسوزىمەن كىتاپ بولىپ باسىلىپ شىعادى.
اۆتور بۇگىندە IT سالاسىندا جۇمىس ىستەيدى: ۆەب جانە اندرويد قوسىمشالارىن جاسايدى. كومپيۋتەر تەحنيكالارىن جوندەيتىن شەبەرحاناسى دا بار. جاس قالامگەردىڭ قازىرگى بالالار ادەبيەتى تۋرالى پايىمى دا بولەك.
– 2017 جىلى «باتىر قويان» دەگەن كىتابىم وڭتۇستىك كورەيادا ءتورت تىلدە باسىلىپ شىقتى. سول كەزدەن بەرى قازاق بالالار ادەبيەتىنىڭ وتكەنى مەن بۇگىنى, كەلەشەگى تۋرالى كوپ ويلاناتىن بولدىم. مەنىڭ تۇسىنگەنىم, بىزدە كونتەنت تۇتىنۋ مادەنيەتى ءالى دامي قويماعان. مەن كورگەن كورەيامەن سالىستىرۋعا مۇلدە كەلمەيدى. بىزدە جەتىسپەيتىن ءبىر نارسە – ماركەتينگ جوق. ياعني جازۋشى ءوزىنىڭ تۋىندىسىن ءونىم دەپ, ال وقىرماندى ءوزىنىڭ كليەنتى دەپ قارامايدى. كوبىمىز نە جازعىمىز كەلەدى, سونى جازىپ ءجۇرمىز. ۇلكەن قاتەلىگىمىز دە وسىندا. ال وقىرمان نە وقىعىسى كەلەدى؟ ونىمەن ساناسىپ جاتقان جوقپىز. سودان كەيىن جاستار كىتاپ وقىمايدى دەپ رەنجيمىز. كوبىنە كىتاپ پەن كىتاپتى, جازۋشى مەن جازۋشىنى عانا سالىستىرىپ, جارىستىرىپ قويامىز. ال نەگىزى, كىتاپقا ينتەرتەيمەنت, ياعني بىزدىڭشە ايتقاندا, ويىن-ساۋىقتىڭ ءبىر ءتۇرى رەتىندە قاراۋ كەرەك. ماسەلەن, قازىر بالاقايلار باس الماي قارايتىن شەتەلدىك مۋلتفيلمدەر دە ويىن-ساۋىقتىڭ ءبىر ءتۇرى. ءبىز سول مۋلتفيلمدەردىڭ اۆتورلارى قولدانعان اناليتيكالىق امالداردى شىعارماشىلىققا دا قولدانۋىمىز كەرەك. قاراپايىم عانا مىسال ايتايىن, ۇيىندە كىشكەنتاي قىزدارى بارلار بىلەدى, «لول» دەپ اتالاتىن قۋىرشاق شىعاراتىن MGA Entertainment دەگەن كومپانيا بار. بىلاي قاراساڭ, تۇككە تۇرمايتىن كىشكەنتاي عانا ويىنشىق, باعاسى 30-40 مىڭ تەڭگەگە دەيىن بارادى. باعاسى ۋداي بولسا دا, جۇرت بالاسى ءۇشىن ساتىپ الىپ جاتادى. ال ولار نە ىستەيدى؟ ولار ويىنشىقتىڭ ۇلگىسىن جاساماس بۇرىن بالالاردى قىزىقتىرا الاتىن نەندەي دۇنيەلەر بار ەكەنىن انىقتاپ الادى. وسى امالداردى ادەبيەتتە نەگە قولدانباسقا؟ – دەيدى مەيىرجان جىلقىباي.
بايقاۋعا قاراعاندى وبلىسىنان قاتىسقان ەلەنا پونومارەنكونىڭ «وپالەننوە دەتستۆو» اڭگىمەلەر جيناعى ورىس تىلىندەگى ۇزدىك شىعارما اتالىمى بويىنشا جەڭىمپاز اتاندى.
قوستاناي وبلىسى
