قولدانىستاعى زاڭناماعا سايكەس جۇمىستان بوساتىلعان قىزمەتكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايىرىلۋى بويىنشا الەۋمەتتىك تولەمدەر الادى. تولەم قىزمەتكەر جوعالتقان تابىستىڭ 40% - نا دەيىنگى مولشەردە ماسق قاراجاتى ەسەبىنەن جۇزەگە اسىرىلادى.
جۇمىستان بوساتىلعان قىزمەتكەرگە تولەم تاعايىنداۋ ءۇشىن:
- eGov.kz پورتالىندا تىركەلۋ;
- «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەپ جۇرگەن ادامداردى تىركەۋ» قىزمەتىن تاڭداۋ;
- ونلاين قىزمەتكە تاپسىرىس بەرىپ, بارلىق جولداردى تولتىرۋ جانە ەتسق-مەن قول قويۋ ارقىلى ءوتىنىمدى جىبەرۋ قاجەت;
- ءبىر كۇن ىشىندە ءوتىنىش بەرۋشىنىڭ تۇرعىلىقتى جەرى بويىنشا جۇمىسپەن قامتۋ ورتالىعى (بۇدان ءارى – حجقو) بوس جۇمىس ورىندارىن ۇسىنادى;
- ەگەر جۇمىس تابىلماسا, 3 كۇن ىشىندە قاشىقتان جۇمىسسىز مارتەبەسى بەرىلەدى (قاجەت بولعان جاعدايدا قوسىمشا اقپارات جيناۋ ءۇشىن ءوتىنىش بەرۋشىمەن حجقو قىزمەتكەرى حابارلاسادى).
بۇل قىزمەتتى ونلاين رەجيمدە ەلەكتروندىق ەڭبەك بيرجاسى (enbek.kz) ارقىلى دا الۋعا بولادى.
ازامات جۇمىسسىز رەتىندە تىركەلگەن سوڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەسى پرواكتيۆتى فورماتتا ماسق-تان تولەم تاعايىنداۋ بويىنشا قىزمەت كورسەتۋگە كەلىسىم بەرۋ ءۇشىن ۇيالى تەلەفونعا SMS-حابارلاما جىبەرەدى. كەلىسكەن جاعدايدا SMS-حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى.
ەستەرىڭىزگە سالا كەتەيىك, ماسق قاراجاتى ەسەبىنەن جۇمىسىنان ايىرىلعان جاعدايدا تولەنەتىن الەۋمەتتىك تولەم جۇمىستان بوساتىلۋ سەبەپتەرىنە قاراماستان جۇزەگە اسىرىلادى جانە جۇمىسسىز ادام جۇمىس ىزدەپ جۇرگەن كەزەڭدە ونى قولداۋعا ارنالعان.
مەملەكەت باسشىسىنىڭ وسى جىلعى 1 قىركۇيەكتەگى قازاقستان حالقىنا جولداۋىندا ايتىلعان تاپسىرماسىن ورىنداۋ ءۇشىن 2023 جىلعى 1 قاڭتاردان باستاپ ماسق-تەن جۇمىسىنان ايىرىلعان جاعدايدا تولەنەتىن الەۋمەتتىك تولەم مولشەرى ورتا ەسەپپەن 13% - عا ۇلعايتىلادى. الەۋمەتتىك ساقتاندىرۋ جۇيەسىن دامىتۋدىڭ وسى جانە باسقا دا شارالارى قر الەۋمەتتىك كودەكسىنىڭ جوباسىندا كوزدەلگەن.
بۇدان بۇرىن حابارلانعانداي, ەڭبەك جانە حالىقتى الەۋمەتتىك قورعاۋ مينيسترلىگى ەلەكتروندىق ەڭبەك بيرجاسى ارقىلى حالىقتى جۇمىسپەن قامتۋ ورتالىقتارىنىڭ قاشىقتان قىزمەت كورسەتۋ فۋنكتسيونالىن ىسكە قوستى.
بۇل جۇمىسسىزداردى تىركەۋ جانە جۇمىسپەن قامتۋدى قولداۋ بويىنشا مەملەكەتتىك قىزمەتتەردى, ونىڭ ىشىندە جۇمىسىنان ايىرىلۋ بويىنشا الەۋمەتتىك تولەمدەردى الۋ راسىمدەرىن جەڭىلدەتۋگە مۇمكىندىك بەردى. ەندى بارلىعىن تەك ينتەرنەت, كومپيۋتەر جانە ەلەكتروندىق تسيفرلىق قولتاڭبانىڭ كومەگىمەن جاساۋعا بولادى.
