رەسپۋبليكا كۇنى قارساڭىندا ورال قالاسىندا 52 پاتەرلىك تۇرعىن ءۇي ءوزىنىڭ جاڭا يەلەرىن تاپتى. ءتورت قاباتتى عيماراتتى مەملەكەتتىك-جەكەمەنشىك ارىپتەستىك نەگىزىندە «دامۋ جول ورال» جاۋاپكەرشىلىگى شەكتەۋلى سەرىكتەستىگى سالىپ شىقتى.
بۇرىن بۇل جەردە تۇرعان ءۇيدى ماماندار ابدەن توزىعى جەتىپ, اپات جاعدايىنا كەلدى دەپ باعالاعان. ءسويتىپ ونى رەنوۆاتسيا, ياعني, جاڭارتۋ ۇردىسىندە قالپىنا كەلتىرۋگە شەشىم قابىلداندى. ياعني عيماراتتىڭ بۇرىنعى بەت-بەينەسى ساقتالىپ, جاڭارتىلدى. جالپى اۋدانى 3 476 شارشى مەترلىك عيمارات 1,5 جىل ىشىندە قايتا سالىندى.
جاڭا پاتەرلەردىڭ كىلتىن تاپسىرۋ سالتاناتىنا ورال قالاسىنىڭ اكىمى ميرجان ساتقانوۆ ارنايى كەلدى. ول جيىلعان جۇرتتى رەسپۋبليكا كۇنىمەن قۇتتىقتاپ, قوس قۋانىشى قاتار كەلگەن جاڭا پاتەر يەلەرىنە ىزگى تىلەكتەرىن جولدادى. سونداي-اق قۇرىلىس نارىعىنداعى كۇردەلى وزگەرىستەرگە, باعا نارىعىنداعى اۋىتقۋعا قاراماستان قۇرىلىستى ساپالى جۇرگىزىپ شىققانى ءۇشىن مەردىگەر فيرما قۇرىلىسشىلارىنا العىس ايتتى.
جاڭا ءۇيدىڭ 12 پاتەرى بۇرىن وسى جەردە بولعان اپاتتى ءۇي تۇرعىندارىنا بەرىلدى.
بيىلعى رەسپۋبليكا كۇنى مەرەكەسى اۋىل تۇرعىندارىنا دا قۋانىش اكەلۋدە. ماسەلەن, شالعايداعى قازتالوۆ اۋدانىنىڭ جاڭاجول اۋىلدىق وكرۋگىندەگى ءابىش, كوكتەرەك اۋىلدىق وكرۋگىنە قاراستى ەلامان جانە سارالجىن ەلدى مەكەندەرىنە كوگىلدىر وتىن قۇبىرى تارتىلدى. ايتا كەتەيىك, بۇل – بۇرىن سوۆحوز بولىمشەسى بولعان كىشى ەلدى مەكەندەر.
باتىس قازاقستان
