– بۇگىن جارتىلاي مارافونعا رەسەي, قىرعىزستان جانە وزبەكستاننان قاتىسۋشىلار بار. سىرتتان قاتىسۋشىلاردىڭ بارلىعى دەرلىك 21 شاقىرىم قاشىقتىقتاعى جۇگىرۋگە ءوتىنىش بەردى. 21 شاقىرىمعا 163 قاتىسۋشى تىركەلدى. بۇعان دەيىنگى مارافوندا بۇل قاشىقتىقتا جۇگىرەتىندەر سانى 60 شاماسىندا ەدى. ال قازىر كوبەيگەنىن كورىپ وتىرمىز. ازاماتتاردىڭ سپورتقا كوپتەپ دەن قويۋى قۋانتادى, – دەيدى وبلىس اكىمىنىڭ ورىنباسارى ەربول الىقۇلوۆ.
وبلىستىق جەڭىل اتلەتيكا وليمپيادالىق رەزەرۆىنىڭ مامانداندىرىلعان بالالار مەن جاسوسپىرىمدەر مەكتەبىنىڭ باسشىسى نۇرلان ءتۇسىپوۆتىڭ ايتۋىنشا, مارافونعا بارلىعى 3 600 ادام تىركەلگەن. دەگەنمەن مارافوندا 3000 نومەر تاراتىلعان. اۋا رايىنىڭ كۇرت سۋىتۋى دا بۇعان ىقپال ەتسە كەرەك. قاتىسۋشىلاردىڭ جاسىنا كەلسەك, ەڭ ۇلكەنى 80-نەن اسسا, ەڭ كىشىسى 8 جاستا.
سونىمەن تاڭەرتەڭ ساعات 10-دا قاراعاندىدا ورتالىق كوشەلەر اۆتوكولىك قوزعالىسىنا جابىلىپ, جەلاياقتارعا جول بوساتىلدى. تاۋەلسىزدىك الاڭىندا مارافوننىڭ اشىلۋى ءوتىپ, مارافوندى 8-13 جاس ارالىعىنداعى بالالار باستادى. ولار ەكى شاقىرىمدى «بالاپان» قاشىقتىعىن 20 مينۋتتا باعىندىردى. ۇلدار اراسىندا ءبىرىنشى ورىندى قاراعاندىلىق ۆيتالي كراسيكوۆ, قىزدار اراسىندا سابينا كرىشكينا الدى. ەكىنشى ورىندى شىعىس قازاقستاننان كەلگەن دميتري سپاسسك پەن استانالىق مەدينا ماقۇلجانوۆا ءبولىستى.
جالپى, مارافون ءتورت قاشىقتىقتان تۇردى. ونىڭ ەڭ باستىسى – «Armanǵa jol» – 21 شاقىرىم. مارافوندا بۇل قاشىقتىقتىڭ مارە سىزىعىن ەرلەر اراسىندا رەسەيدىڭ ومسك قالاسىنان كەلگەن ميحايل كۋليكوۆ ءبىرىنشى بولىپ كەستى. ايەلدەر اراسىندا قوستانايلىق تاتيانا نەروزناك جەڭىمپاز اتاندى. جەڭىمپازدار 350 000 تەڭگەنىڭ سەرتيفيكاتىمەن ماراپاتتالدى. ەكىنشى جانە ءۇشىنشى ورىن الماتى, استانا, اقتوبە جەلاياقتارىنا بۇيىردى. ءتۇرلى قاشىقتىقتاعى مارافون 4 ساعاتقا سوزىلدى.
– بۇگىن مىقتى جۇگىرۋشىلەر, مارافون جانە جارتىلاي مارافون جەڭىمپازدارى جينالدى. ولاردىڭ قاتارىندا بىلتىرعى جارتىلاي مارافوننىڭ جەڭىمپازى اتانعان الماتىلىق تا بار. «Armanǵa jol»-دان باسقا قاشىقتىققا جۇگىرۋ تەگىن. ءبىز ميلليون تەڭگەدەن استام قارجى جينادىق. قاراجات قايىرىمدىلىققا جۇمسالادى. 50% – تسەرەبرالدى سال اۋرۋىنا شالدىققان بالالاردى ەمدەۋگە, 5 % – ءبىلىم بەرۋگە باعىتتالادى, – دەيدى جارتىلاي مارافوننىڭ ۇيىمداستىرۋشىسى رۋسلان يسكاكوۆ.
پاۆلوداردان ارنايى كەلگەن Freedom Team جۇگىرۋ كلۋبىنىڭ قۇرامىندا 20 ادام. مارافوننىڭ حالىقتى بىرىكتىرۋدەگى ىقپالىن ەرەكشە اتايدى كلۋب جەتەكشىسى.
– ءبىز 20 ادامبىز. ۇلكەنىمىز 43-تە, كىشىسى 23-تە. بارلىق جاستاعىلار جۇگىرۋگە قابىلەتتى. بۇل – ءبارىمىزدى بىرىكتىرەتىن, ءتان مەن جاندى سەرگىتەتىن سپورت ءتۇرى, – دەيدى كلۋب جەتەكشىسى بولات ورداباەۆ.
سونداي-اق مارافونعا قاتىسۋعا وتباسىمەن كەلگەندەر قاتارىندا قاراعاندىلىق جانايدار زەكەنوۆ تە بار. جانايدار ءوزىنىڭ مارافونعا تۇراقتى قاتىسۋشى ەكەنىن, وتباسىمەن سالاۋاتتى ءومىر سالتىن ۇستاناتىنىن, بالالارىن دا سوعان تاربيەلەيتىنىن ايتادى.
– مارافونداردىڭ تۇراقتى قاتىسۋشىسىمىن. 14 شاقىرىمدىق قاشىقتىققا جۇگىرەمىن. ءبىز بۇكىل وتباسىمىزبەن كەلدىك مارافونعا. قىزدارىم ايجان مەن ايناگۇل ەكىنشى رەت جۇگىرەدى, – دەيدى جانايدار زەكەنوۆ.
76 جاستاعى اقساقال سەرىك ابىشەۆ جارتىلاي مارافونعا ءتورتىنشى رەت قاتىسقان ەكەن. اقساقالدىڭ ايتۋىنشا, وتباسى تۇگەل سپورتقا بەيىم. جۇگىرۋدەن الدارىنا جان سالمايدى. قاريا بارشا جۇرتتى سپورتپەن اينالىسۋعا شاقىرادى.
– ۇيىمداستىرۋشىلاردىڭ ءتۇرلى قاشىقتىقتى ۇسىنعانى جاقسى. مەن «دوستىق» جارىسىندا جۇگىرەمىن. بۇكىل وتباسىم جۇگىرۋگە دەن قويعان. مارافوندارعا بالالار دا, نەمەرەلەر دە قاتىسادى. قازاقستاندىقتاردى سپورتپەن شۇعىلدانۋعا شاقىرامىن, – دەيدى سەرىك ابىشەۆ.
قاراعاندى وبلىسى
