اتالعان كەشەننىڭ اشىلۋ سالتاناتىنا جەتىسۋ وبلىسى دەنە شىنىقتىرۋ جانە سپورت باسقارماسىنىڭ باسشىسى المات ۇشكەمپىروۆ, اۋدان اكىمىنىڭ ورىنباسارى عازيز وتارباي ۇلى جانە اۋىل تۇرعىندارى قاتىستى.
جالپى, قۇنى 350 ملن تەڭگە بولاتىن قۇرىلىس جۇمىستارىن «ستروي مونتاج ۆەكتور» جاۋاپكەرشىلىگى شەكتەۋلى سەرىكتەستىگى جۇرگىزگەن. كەشەندە 4 جاتتىعۋ زالى بار دەسەك, ولار تۇگەلدەي قاجەتتى سپورتتىق جابدىقتارمەن قامتىلعان. ياعني اۋىل بالالارىنىڭ باسكەتبول, ۆولەيبول, شاعىن فۋتبول, بوكس, ۇستەل تەننيسى, توعىزقۇمالاق, قازاقشا جانە ەركىن كۇرەسپەن اينالىسۋىنا مۇمكىندىك جاسالعان. نىساندا ءبىر مەزگىلدە 180 بالا سپورتپەن شۇعىلدانا الادى.
«بۇعان دەيىن بالالار ەركىن كۇرەستەن اۋىلداعى مامانيا مەكتەبىنىڭ سپورت زالى بازاسىندا جاتتىعىپ كەلدى. ولاردى اۋداندىق بالالار مەن جاسوسپىرىمدەر سپورت مەكتەبىنەن بولىنگەن مامان جاتتىقتىراتىن. ەندى كۇرەسپەن قاتار باسقا دا سپورت تۇرلەرىنە قىزىققان بالالار وسى كەشەنىنىڭ ارنايى زالدارىندا شىنىعاتىن بولادى. شتاتقا جاتتىقتىرۋشىلار سپورت مەكتەبىنەن تارتىلادى», دەدى اقسۋ اۋداندىق بۇقارالىق سپورتتىق ءىس-شارالاردى وتكىزۋ ورتالىعىنىڭ ديرەكتورى اسحات ساۋعانباەۆ.
كەشەن جاستاردى سالاماتتى ءومىر سالتىنا باۋلىپ قانا قويماي, ۋاقىتتى ءتيىمدى پايدالانۋعا, تاباندىلىق پەن توزىمدىلىگىن شىڭداۋعا مۇمكىندىك بەرمەك. اقسۋ اۋىلى تۇرعىندارىنىڭ ورتالىقتا بولاشاق چەمپيوندار ءوسىپ شىعارىنا سەنىمدەرى مول.
جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە, جالپى وڭىردە اقسۋداعى سپورت كەشەنىنەن بولەك 5 سپورتتىق ساۋىقتىرۋ كەشەنى بار. بيىل وبلىستا تاعى 8 سپورت نىسانىنىڭ قۇرىلىسى ءجۇرىپ جاتىر. سونىڭ ىشىندە الاكول اۋدانىنداعى دوستىق جانە لەپسى اۋىلدارىندا دەنە شىنىقتىرۋ-ساۋىقتىرۋ كەشەنى, الاكول اۋدانى بەسكول اۋىلىندا, پانفيلوۆ اۋدانى ۇلكەن شىعان, پەنجىم اۋىلدارىندا سپورت كەشەندەرى سالىنۋدا.
جەتىسۋ وبلىسى
