ەلدىگىمىزدى تۋ ەتكەن ەرەكشە كۇن – رەسپۋبليكا كۇنى قارساڭىندا «مەرەيلى وتباسى» ۇلتتىق بايقاۋىنىڭ جەڭىمپازدارى «قازاقستان» ورتالىق كونتسەرت زالىندا سالتاناتتى تۇردە ماراپاتتالدى.
وسىناۋ ىزگى ءىس-شارانىڭ باسىندا ءسوز العان پرەزيدەنت اكىمشىلىگى باسشىسىنىڭ ورىنباسارى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا بايقاۋ جەڭىمپازدارىنا مەملەكەت باسشىسى قاسىم-جومارت توقاەۆتىڭ قۇتتىقتاۋىن وقىپ بەردى.
«جىل سايىن وتكىزىلەتىن بايقاۋ شاڭىراعى شاتتىققا بولەنىپ, بەرەكەلى بىرلىك پەن تاتۋلىققا ۇيىعان ونەگەلى وتباسىلاردى كۇللى ەلگە تانىتتى. مۇنداي ۇلگىلى اۋلەتتەر ەلىمىزدە وتە كوپ. حالقىمىز قاي زاماندا دا وتباسى داستۇرلەرىن بەرىك ۇستانىپ, قادىرلەي بىلگەن. ۇلكەنگە قۇرمەت, كىشىگە ىزەت كورسەتۋ – ءبىزدىڭ قانىمىزعا سىڭگەن قاسيەت. ءاربىر ازاماتتىڭ ادامگەرشىلىك بولمىسىنىڭ قالىپتاسۋىنا وتباسىنداعى احۋال ايرىقشا ىقپال ەتەدى. اكە-شەشەسىنىڭ, اتا-اجەنىڭ تاربيەسىن كورىپ, ۇلكەندەردەن تاعلىم الىپ وسكەن بالا ەسەيگەندە وتانشىل, ءبىلىمپاز, ەڭبەكقور ازاماتقا اينالادى», دەلىنگەن پرەزيدەنتتىڭ قۇتتىقتاۋىندا.
استانادان – ساعيتوۆتار, الماتىدان – كىشكەنەباەۆتار, شىمكەنتتەن – جاقىپوۆتار, اقمولا وبلىسىنان – بوجەنوۆالار, اقتوبە وبلىسىنان – وسپانوۆتار, الماتى وبلىسىنان – دارىباەۆتار, اتىراۋ وبلىسىنان – جاناباەۆتار, شىعىس قازاقستان وبلىسىنان – بوزجىگىتوۆتەر, جامبىل وبلىسىنان – ەرجانوۆتار, باتىس قازاقستان وبلىسىنان – حالىق ۇلى, قاراعاندى وبلىسىنان – الىمباەۆتار, قىزىلوردا وبلىسىنان – بايجانوۆتار, قوستاناي وبلىسىنان – شارىپوۆتەر, ماڭعىستاۋ وبلىسىنان – سەبەپباەۆتار, پاۆلودار وبلىسىنان – مۇحتاروۆتار, سولتۇستىك قازاقستان وبلىسىنان – مۋحيندەر, تۇركىستان وبلىسىنان – كۇلبايىمبەتوۆاتەر, اباي وبلىسىنان – زامزەباەۆتار, جەتىسۋ وبلىسىنان – انداس, ۇلىتاۋ وبلىسىنان ايتەنوۆتەر وتباسى قۇرمەتكە بولەندى.
رۋحاني قۇندىلىقتارىمىزدى دارىپتەيتىن يگى داستۇرگە اينالعان بيىلعى بايقاۋعا 2 542 وتباسى قاتىسۋعا نيەت تانىتتى. ولاردىڭ جارتىسىنان استامى, دالىرەك ايتساق, 63,4%-ى – اۋىل تۇرعىندارى. بۇل, ءبىر جاعىنان, ايرانداي ۇيىپ وتىرعان اۋىل-ايماقتا ءالى كۇنگە دەيىن قازاقىلىقتىڭ قايماعى بۇزىلا قويماعانىن, اق-ادال پەيىلى, كول-كوسىر كوڭىلى, تاتۋ-ءتاتتى تۇرمىسى بار ەكەنىن كورسەتەدى.
بۇعان قوسا ۇيەلمەلى-سۇيەلمەلى بالالارى بار 1 166 ۇلگىلى وتباسى قاتىستى. سونداي-اق ەرلى-زايىپتىنىڭ ەكەۋى دە 29 جاسقا تولماعان 501 جاس وتباسى وسى بايقاۋدا باق سىنادى.
ءتۇرلى كاسىپ پەن ەڭبەك اۋلەتتەرىنىڭ, سپورت جانە شىعارماشىلىق وكىلدەرىنەن قۇرالعان 20 وتباسى ءوڭىر جەڭىمپازدارى اتاندى. «مەرەيلى وتباسى» ۇلتتىق بايقاۋى – ۇلكەنگە قۇرمەت, كىشىگە ىزەت رۋحاني-ادامگەرشىلىك قاعيداسىنا نەگىز-
دەلگەن جانە ونى ۇرپاقتان-ۇرپاققا جەتكىزۋدى كوزدەيتىن وتباسى قۇندىلىعىن دارىپتەپ كەلەدى. بارلىق وتباسىنىڭ ءاربىر مۇشەسى اۋىلداستارىنىڭ, قالا تۇرعىندارىنىڭ, ارىپتەستەرىنىڭ, كورشى-قولاڭنىڭ قۇرمەتىنە بولەنگەن, وتانىنا ادال قىزمەت ەتىپ جۇرگەن ەڭبەك ادامى, اۋىلدىڭ, قالانىڭ قاراپايىم ەڭبەككەرلەرى.
ماراپاتتاۋ راسىمىنە مەملەكەتتىك ورگانداردىڭ وكىلدەرى, پارلامەنت سەناتى مەن ءماجىلىسىنىڭ دەپۋتاتتارى, قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى قاتىستى.
لاۋرەات وتباسىلار ديپلومدارمەن جانە ەستەلىك سىيلىقتارمەن ماراپاتتالدى. ماراپاتتاۋ ءراسىمى قازاق ەسترادا جۇلدىزدارىنىڭ قاتىسۋىمەن وتكەن مەرەكەلىك كونتسەرتپەن جالعاستى.
جالپى, ەلىمىزدە وتباسى قۇندىلىقتارىنىڭ ءرولىن ارتتىرىپ, وتباسى مەن نەكەنىڭ وڭ ءيميدجىن دارىپتەيتىن اۋقىمدى دا ماڭىزدى بايقاۋعا 2014 جىلدان بەرى 20 مىڭنان اسا وتباسى قاتىسقان.
