تۇركى الەمىنە ورتاق «قورقىت اتا» تەلەحيكاياسىنىڭ ستسەناريى وتكەن جىلى جازىلىپ, بيىلعى جىلدىڭ 5 قازانىنان ءتۇسىرىلىم جۇمىستارى باستالدى. تاريحي تۋىندى 4 بولىمنەن تۇرادى.
«دالا ابىزىنا قاتىستى اڭىزداردىڭ كوپشىلىگى قازاق دالاسىندا ساقتالعان. وزدەرىنىڭ ءتۇپ-تامىرىن, شىعۋ تەگىن قورقىتپەن بايلانىستىراتىن حالىقتار كوپ. سوندىقتان بۇل تەلەحيكايا حالىقارالىق نارىقتا تانىمال جوبا بولاتىنىنا سەنەمىز. ەڭ الدىمەن, ءوز تۇلعالارىمىزدى دارىپتەۋدە وسىنداي تەلەحيكايالاردىڭ ماڭىزى زور», دەدى مينيستر د.قىدىرالى.
مينيستر ءتۇسىرىلىم توبىنا حالىقارالىق تۇركى اكادەمياسى زەرتتەۋشىلەرىنىڭ التايدىڭ قاراقابا جازىعىنان تاپقان V-ءVى عاسىرعا تيەسىلى قوبىزدى پايدالانۋدى ۇسىندى. «قازاقستان» رەسپۋبليكالىق تەلەراديوكورپوراتسياسىنىڭ باسقارما ءتورايىمى ءلاززات تانىسبايدىڭ ايتۋىنشا, بۇل ۇلتتىق ارنانىڭ وزگە مەملەكەتپەن بىرلەسە قولعا العان العاشقى تەلەحيكاياسى.
ء«بىز ءۇشىن العاشقى تاجىريبە جانە العاش رەت ءوندىرىس ۇزاق مەرزىمگە سوزىلىپ وتىر. قاراشا ايىندا وزبەكستاننىڭ بۇحارا قالاسىندا تۇسىرىلىمدەر باستالادى. سەريالدىڭ ەكراندالۋى 2024 جىلعا جوسپارلانعان», دەدى باسقارما ءتورايىمى.
جوبا پروديۋسەرى بۇعان دەيىن «Qazaqstan» ۇلتتىق تەلەارناسىنداعى جوعارى رەيتينگتى «اۋىل مۇعالىمى», «شىراعىم», «شابدالى18» تەلەحيكايالارىنا جەتەكشىلىك ەتكەن شولپان باتىرباەۆا, رەجيسسەرى قاناعات مۇستافين. ق. مۇستافين العاشقى وتاندىق 100 ءبولىمدى تەلەحيكايا «قارا شاڭىراق» سەريالىنىڭ رەجيسسەرى رەتىندە تانىمال. جوبانىڭ تاريحي كەڭەسشىسى – ەتنوگراف بەرىك ءجۇسىپ. رەداكتورى – بولات جەتەكباي. قورقىتتىڭ ءار كەزەڭدەگى رولدەرىنە ءدىنيسلام نۇرماعامبەت, ءادىل احمەتوۆ جانە ايدوس بەكتەمىر بەكىتىلدى.
